ކެޕްޓަން ބޭންޑް ނެގުމުން ވެސް މެގުއާ ދެއްކީ ރީތި މިސާލެއް: ފެނާންޑޭޒް

ވޮޝިންޓަން (ޖުލައި 24) - މެންޗެސްޓާ ޔުނައިޓެޑްގެ ކެޕްޓަން ބޭންޑް، ހެރީ މެގްއާ އަތުން ނެގުމުން ވެސް، އޭނާ ދެއްކި މިސާލަށް ތައުރީފް ކުރަން ޖެހޭ ކަމަށް، އެ ޓީމުގެ އާ ކެޕްޓަން ބްރުނޯ ފެނާންޑޭޒް ބުނެފި އެވެ.

ޕްރީ ސީޒަން ޓްެއާގައި އެމެރިކާ އަށް ފުރުމުގެ ކުރިން، ޔުނައިޓެޑްގެ ކޯޗު އެރިކް ޓެން ހަގް ވަނީ، ޔުނައިޓެޑްގެ ކެޕްޓަން ބޭންޑް މެގުއާ އަތުން ނަގައިފަ އެވެ.

މިދިޔަ ސީޒަންގައި މެގްއާ ނުކުޅޭ ގިނަ މެޗުތަކުގައި ޔުނައިޓެޑްގެ ކެޕްޓަން ބޭންޑް އެޅި ފެނާންޑޭޒް ބުނީ މެގްއާ އަތުން ކެޕްޓަން ބޭންޑް ނެގިކަން ކުޅުންތެރިންނަށް އެނގޭ ކަމަށެވެ. ނަމަވެސް ކެޕްޓަން ބޭންޑް ދޭނީ ކޮން ކުޅުންތެރިޔެއްކަން އެއްވެސް މީހަކަށް އޭރު ނޭނގޭ ކަމަށެވެ.

"އެޗް [ހެރީ] މެގުއާ ބޭނުންވީ އެންމެންގެ ތެރޭގައި އެ ވާހަކަ ދައްކަން،" ފެނާންޑޭޒް ބުންޏެވެ.

"އެޗް [ހެރީ މެގުއާ] ގެ ހާލަތު [ކެޕްޓަން ބޭންޑް ނެގިކަން] އެންމެންނަށް ކުރިން ވެސް އެނގުނު ނަމަވެސް ދެން ކެޕްޓަނަކަށް ވާނީ ކާކުކަން އެކަކަށް ވެސް ނޭނގޭތީ އޭނާ އެކަން ކުރީ އެންމެން އެކުގައި ބޭއްވި ޓީމް މީޓިންއެއްގައި، އެއީ ގިނަ ފަހަރަށް ކުރަން ޖެހޭ ކަމެއް، އެތެރޭގައި ހުރި ކަންކަން ހިފަހައްޓައި، އެތެރޭގައި ހުރި ތައުރީފުތައް އަހަރެމެންނަށް ރައްދު ކުރުން."

ފެނާންޑޭޒް ބުނީ ޔުނައިޓެޑްގެ ކެޕްޓަނަކަށް އޭނާ ހަމަޖެއްސުމަކީ އޭނާގެ އާއިލާ އަށް ލިބުނު އުފަލެއް ކަމަށެވެ.

""ޔަގީނުން ވެސް އެއީ ވަރަށް ބޮޑު ޝަރަފެއް، ހުވަފެނެއްގައި ވެސް ނުފެނުނު ކަމެއް. އެއީ ހުވަފެންތަކަށް ވުރެ މައްޗަށް ދިޔަ ކަމެއް. ނަމަވެސް އެއީ އަހަންނާއި އަހަރެންގެ އާއިލާ އަށް ވެސް ވަރަށް ބޮޑު އުފަލެއް ލިބުނު ކަމެއް. މިހުރިހާ ކަމެއްގައި އަހަންނާ އެކު ތިބީ އެ މީހުން. އެއީ އެންމެންނަށް ވެސް ލިބޭ ފަހުރެއް،" ފެނާންޑޭޒް ބުންޏެވެ.