މުސްލިމް ގައުމުތަކާ އެކު އެމެރިކާގެ ވިޔަފާރި 220 ބިލިއަން ޑޮލަރަށް

ވޮޝިންޓަން (ފެބްރުއަރީ 1) - މުސްލިމް ހަތް ގައުމެއްގެ މީހުން އެމެރިކާ އަށް ވަނުން މަނާކުރުމާ ގުޅިގެން މެދުއިރުމައްޗާއި އޭޝިއާގެ ބައެއް ގައުމުތަކުގައި ވަނީ ކަންބޮޑުވުން އުފެދިފަ އެވެ. އެއް ސަބަބަކީ މުސްލިމް ގައުމުތަކާ އެކު އެމެރިކާ އިން ފުޅާދާއިރާއެއްގައި ވިޔަފާރި ހިންގަމުން ގެންދާތީ އެވެ.

ރައީސް ޑޮނަލްޑް ޓްރަމްޕުގެ އިމިގްރޭޝަން ސިޔާސަތަށް ގެނައި ބަދަލާ ގުޅިގެން އިސްލާމީ ގައުމުތަކާ އެކު ކުރާ ވިޔަފާރި އަށް އަސަރު ކުރާނެ އެވެ. މުސްލިމުންގެ އަޣުލަބިއްޔަތު އޮންނަ 47 ގައުމާ އެކު އެމެރިކާ އިން 2015 ވަނަ އަހަރު ކުރި ވިޔަފާރި 220 ބިލިއަން ޑޮލަރަށް އަރާ ކަމަށް ސެންސަސް ބިއުރޯ އިންނެވެ. މިދިޔަ އަހަރުގެ ފުރަތަމަ 11 މަސް ދުވަހު ވަނީ އެމެރިކާ އާއި އިސްލާމީ ގައުމުތަކާ އެކު ކުރި ވިޔަފާރި 194 ބިލިއަން ޑޮލަރަށް އަރައިފަ އެވެ.

މުސްލިމް އެތައް ގައުމެއް ތަމްސީލްކުރާ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ބުނީ އެމެރިކާގެ ފިޔަފަޅުގެ ސަބަބުން ވަރަށް ކަންބޮޑުވާ ކަމަށެވެ. އަރަބި ލީގުން ވެސް ވަނީ އެމެރިކާ އަށް ވަރަށް ބޮޑަށް ފާޑު ކިޔައިފަ އެވެ.

މަނާކުރި ހަތް ގައުމުގެ ތެރޭން އެމެރިކާއާ އެކު ފުޅާ ދާއިރާއެއްގައި ވިޔަފާރި ކުރާ އެއް ގައުމަކީ އިރާގެވެ. އިރާގަކީ އެމެރިކާ އަށް ހަ ވަނަ އަށް އެންމެ ގިނައިން ތެޔޮ ބޭރުކުރާ ގައުމެވެ. އެމެރިކާ އިން ދެން އެންމެ ފުޅާ ދާއިރާއެއްގައި ވިޔަފާރި ކުރާ ގައުމުތަކުގެ ތެރޭގައި މެލޭޝިއާ، ސައުދީ އަރަބިއާ، ޔުނައިޓެޑް އަރަބި އެމިރޭޓްސް، ތުރުކީ، އިންޑޮނީޝިއާ ހިމެނެ އެވެ.

މެލޭޝިއާ

މުސްލިމް ގައުމުތަކުގެ ތެރޭން އެމެރިކާ އިން އެންމެ ފުޅާ ދާއިރާއެއްގައި ވިޔަފާރި ކުރާ ގައުމަކީ މެލޭޝިއާ އެވެ. އެމެރިކާގެ ބޮޑެތި ކުންފުނިތައް ކަމަށްވާ އެގްޒޮން މޯބިލް، ޗެވްރޮން، ކޮނޮކޯފިލިޕްސް، މާފީ އޮއިލް އަދި ޑޯ ކެމިކަލް އިން މެލޭޝިއާގައި ވަނީ އެތައް ބިލިއަން ޑޮލަރެއް އިންވެސްޓްކޮށްފަ އެވެ. ބިއުރޯ އޮފް އިކޮނޮމިކް އެނަލިސިސް އިން ބުނެފައި ވަނީ އެމެރިކާގެ ކުންފުނިތަކުން 2015 ވަނަ އަހަރު ވަނީ 14 ބިލިއަން ޑޮލަރު އިންވެސްޓް ކޮށްފައި ކަމަށެވެ.

ސައުދީ އަރަބިއާ

ސައުދީ އަރަބިއާ އިން އެމެރިކާއާ އެކު މިދިޔަ އަހަރުގެ ފުރަތަމަ 11 މަސް ދުވަހު ވަނީ 31 ބިލިއަން ޑޮލަރުގެ ވިޔަފާރި ކޮށްފަ އެވެ. އެމެރިކާގެ ކުންފުނިތަކުން ވަނީ ސައުދީ އަރަބިއާ އަށް ކާރާއި އިންޑަސްޓްރިއަލް މެޝިނަރީ، ކޮންސްޓްރަކްޝަން ސާމާނު، ސިވިލް މަތިންދާ ބޯޓު، ޑިފެންސް ސިސްޓަމް، އައިޓީ އަދި ހެލްތުކެއާ ސާމާނު އެކްސްޕޯޓް ކޮށްފަ އެވެ. ސައުދީ އަރަބިއާ އިން އެމެރިކާ އަށް 2015 ވަނަ އަހަރު ވަނީ 386 މިލިއަން ފީފާ ތެޔޮ އެތެރެކޮށްފައި ކަމަށް އެމެރިކާގެ އެނާޖީ އިންފޮމޭޝަން އެޑްމިނިސްޓެރޭޝަނުން ބުނެ އެވެ. އެމެރިކާގެ ކުންފުނިތަކުން ސައުދީގައި ވަނީ 10 ބިލިއަން ޑޮލަރު އިންވެސްޓްކޮށްފަ އެވެ.

ޔޫއޭއީ

އެމެރިކާ އާއި ޔޫއޭއީ އިން 2016 ވަނަ އަހަރުގެ ފުރަތަމަ 11 މަސް ދުވަހު ވަނީ 23.3 ބިލިއަން ޑޮލަރުގެ ވިޔަފާރިކޮށްފަ އެވެ. މެދުއިރުމަތީގައި އެމެރިކާގެ އެންމެ ބޮޑު އެކްސްޕޯޓް މާކެޓް އޮތީ ޔޫއޭއީގަ އެވެ. އެމެރިކާގެ ކުންފުނިތަކުން ޔޫއޭއީގައި ވަނީ 15.6 ބިލިއަން ޑޮލަރު އިންވެސްޓްކޮށްފަ އެވެ. ޔޫއޭއީގައި އެމެރިކާގެ 1،000 އށް ވުރެ ގިނަ ކުންފުނި އޮޕަރޭޓް ކުރެ އެވެ.

އިންޑޮނީޝިއާ

ދުނިޔޭގެ އެންމެ މުސްލިމުން ގިނަ އިންޑޮނީޝިއާ އިން އެމެރިކާއާ އެކު 2016 ވަނަ އަހަރުގެ ފުރަތަމަ 11 މަސް ދުވަހު ކުރި ވިޔަފާރި 23 ބިލިއަން ޑޮލަރަށް އަރަ އެވެ. އިންޑޮނީޝިއާގައި އެމެރިކާގެ ކުންފުނިތަކުން ވަނީ 13.5 ބިލިއަން ޑޮލަރު އިންވެސްޓް ކޮށްފަ އެވެ.

ތުރުކީ

ތުރުކީ އާއި އެމެރިކާގެ ވިޔަފާރި 2009 ވަނަ އަހަރުން 2015 ވަނަ އަހަރަށް ވަނީ 10.8 ބިލިއަން ޑޮލަރުން 17.4 ބިލިއަން ޑޮލަރަށް އިތުރުވެފަ އެވެ. ވޭތުވެދިޔަ އަހަރުތަކުގައި އެމެރިކާގެ ކުންފުނިތަކުން ވަނީ ތުރުކީގައި 3.6 ބިލިއަން ޑޮލަރު އިންވެސްޓްކޮށްފަ އެވެ.