ސޮކަ ވެޓަރަންސްގެ އެކަޑަމީ މުބާރާތް: ޖުމުލަ 106 މެޗު، ފުރަތަމަ މެޗުގައި އީގަލްސް އާއި ހުޅުމާލެ

ސޮކަ ވެޓަރަންސް އެސޯސިއޭޝަން އޮފް މޯލްޑިވްސްއިން ބާއްވާ އެކަޑަމީ ފުޓްބޯޅަ މުބާރާތުގެ ޖުމުލަ 106 މެޗު ކުޅޭ ގޮތަށް ނިންމައި މުބާރާޓުގެ ޝެޑިއުލް އާންމުކޮށްފި އެވެ.

އެކަޑަމީތަކަށާއި ކިޑްސް ފުޓްބޯޅައިގެ ހަރަކާތްތައް އެންމެ ގިނައިން ބާއްވާ ސޮކަ ވެޓަރަންސްގެ މިފަހަރުގެ މުބާރާތް ހާއްސަކޮށްފައި ވަނީ 12 އަހަރުން ދަށުގެ ކެޓަގަރީ އަށެވެ.

ޖުމުލަ 22 އެކަޑަމީ އަކުން ވާދަ ކުރާ މުބާރާތް ކުރިއަށްދާނީ އަންނަ ހުކުރު އަދި ހޮނިހިރު ދުވަހު އެވެ. ހުކުރު ދުވަހު ހެނދުނު ހަތެއް ޖަހާއިރު މުބާރާރާތުގެ ފުރަތަމަ މެޗުގައި ވާދަކުރާނީ އީގަލްސްގެ އެކަޑަމީ އާއި ހުޅުމާލޭ ސްޕޯޓްސް ސްކޫލް އެކަޑަމީ އެވެ.

މުބާރާތުގެ އެންމެ ފަހުގެ ޗެމްޕިއަން ޓީމަކީ ވެލެންސިއާ އެކަޑަމީ އެވެ. އެ ޓީމު ހިމެނެނީ މާޒިޔާ އާއި ޓީސީ އާއެކު ގުރޫޕް އީގަ އެވެ. ދެން އެ ގުރޫޕްގައި ހިމެނެނީ އޭފްއޭ، ޖޭފްއޭ އެވެ.

ގްރާސްރޫޓް ފުޓްބޯޅަ އަށް ހާއްސަކޮށް މި އަހަރު ވެސް އިތުރު އިވެންޓްތަކެއް ބާއްވާން ސޮކަ ވެޓަރަންސްއިން ވަނީ އެ ކްލަބްގެ ކަލަންޑަރުގައި ހިމަނައިފަ އެވެ.

ގްރޭޑް 3 އަދި ގްރޭޑް 4 ގެ ދަރިވަރުންނަށް ހާއްސަކޮށް ސްކޫލް ފުޓްބޯޅަ މުބާރާތެއް އޮކްޓޯބަރު މަހު ބާއްވަން ހަމަޖެހިފައި ވެއެވެ. އުމުރުން 14 އަހަރުން ދަށުގެ ކުދިންނަށް ހާއްސަ އެކަޑެމީ މުބާރާތެއް ވެސް މި އަހަރު ސޮކަ ވެޓަރަންސްއިން ބާއްވާނެ އެވެ.