މާލޭން ވަރުގަދަ ޓީމެއް ނެރެ، އެހެން ރަށްރަށަށް ޗެލެންޖް ދޭނެ

ފުޓްބޯޅައިގެ ހުނަރުވެރި ކުޅުންތެރިން މާލެ އިން ހުސްނުވާ ކަމަށާއި ގޯލްޑް ކަޕުން އެކަން ފެންނާނެކަމަށް މުބާރާތުގައި ވާދަކުރާ މާލޭ ޓީމުގެ ކޯޗު އަދި ގައުމީ ޓީމުގެ ކުރީގެ ކުޅުންތެރިޔާ އަހްމަދު ނާޒު (އާކޭ) ބުނެފި އެވެ.

ގައުމީ ޓީމުގެ ބޮޑު ޕަސެންޓެއް ނިސްބަތް ވަނީ އަތޮޅު ތެރެއަށެވެ. މާލޭގެ ކްލަބްތަކަށް އެކަނި ބަރޯސާވެފައި އޮތް ރާއްޖޭގެ ފުރަތަމަ ޑިވިޝަނުގެ ކްލަބްތަކުގައި ވެސް ގިނައީ ރަށްރަށަށް ނިސްބަތްވާ ކުޅުންތެރިންނެވެ.

ރާއްޖޭގެ ފުޓްބޯޅައިގެ އެންމެ ފޯރިގަދަ އަހަރުތައް ކަމަށްވާ 80 އާއި 90 ގެ އަހަރުތަކުގައި ފުޓްބޯޅައިގައި ނަގާ ކިޔަން ތިބީ މާލޭގެ ކުޅުންތެރިންނެވެ. ގައުމީ ޓީމުގައި އޭރު ޑޮމިނޭޓް ކުރަނީ މާލެ އަށް ނިސްބަތްވާ ކުޅުންތެރިންނެވެ.

އެކަމަކު ދެހާސް ވަނަ އަހަރުގެ ފަހުން، އެކަން ބަދަލުވަމުން އައިސް ބައެއް ފަހަރު މާލެ އަށް ނިސްބަތްވާ އެންމެ ކުޅުންތެރިޔަކު ވެސް ގައުމީ ޓީމަށް ނާރާ ފަހަރު ވެސް ދެ އެވެ. ބަންގްލަދޭޝްގައި 2018 ގައި ބޭއްވި ސާފް ޗެމްޕިއަންޝިޕު ކާމިޔާބު ކުރި ދިވެހި ޓީމުގައި މާލެ އަށް ނިސްބަތްވާ ކުޅުންތެރިޔަކަށް ކުޅެން ލިބުނީ އެންމެ 22 މިނެޓްގަ އެވެ. އެވެ. ސްރީ ލަންކާއާ ދެކޮޅަށް ކުޅުނު މެޗުގައި މާލެ އަށް ނިސްބަތްވާ ރިހާމް އަބްދުލް ގަނީ (ބޮބީ) ކުޅެން ނުކުތީ މެޗުގެ 68 ވަނަ މިނެޓްގަ އެވެ. އޭގެ ފަހުން އެ މުބާރާތުގައި އޭނާ ދެން ކުޅެން ފުރުސަތެއް ނުލިބުނެވެ.

ފުޓްބޯޅައިގެ އެންމެ ފަހި ވަސީލަތާއި އެންމެ ބޮޑު ފުރުސަތު އޮތް ސަރަހައްދުން، ގައުމީ ޓީމަށް ޓޮޕް ޓެލެންޓެއް އިމްޕޯޓް ނުކުރެވެ އެވެ.

އެކަމަކު، ކޯޗު އާކޭ ބުނީ މާލޭގައި އޮތް ފުޓްބޯޅައިގެ ހުނަރު ފެންނާނެ ކަމަށެވެ. މުބާރާތް ކާމިޔާބު ކުރެވޭނެ ފެންވަރު ހުރި ޓީމެއް މާލެއިން ނެރޭނެ ކަމަށް އޭނާ ބުންޏެވެ.

"ފުޓްބޯޅައިގެ އެންމެ ވަރުގަދަ ރަށްރަށާއި ވާދަކޮށްލެވޭ ވަރުގެ ޓީމެއް އިރާދަކުރެއްވިއްޔާ ފެންނާނެ،" އާކޭ ބުންޏެވެ.

"ކޮންމެ މަގާމަކަށް ވެސް ހަމަ ފެންވަރު ރަނގަޅު ކުޅުންތެރިތަކެއް އެބަތިބި. ވަރުގަދަ ފައިޓެއް ދެވޭނެ ކުޅުންތެރިންތަކެއް ފެންނާނެ."

ފުޓްބޯޅައިގެ ފޯރި އަލުން ގެނައުމުގެ މަގުސަދުގައި ނައިންޓީ ޕްލަސްއިން ބާއްވާ ގޯލްޑް ކަޕް ހާއްސަކޮށްފައި ވަނީ ސިޓީތަކާއި ރަށްތަކަށެވެ.

އެ މުބާރާތް ވެގެންދާނީ ހުރިހާ މެޗެއް ޓީވީން ވަގުތު ދައްކާ ރާއްޖޭގައި ބާއްވާ އެންމެ ބޮޑު ލޯކަލް މުބާރާތަށެވެ. މި މަހު 20 ގައި ފަށާ މުބާރާތް، އަންނަ މަހު 25 ގެ ނިޔަލަށް ގަލޮޅު ދަނޑުގައި ކުރިއަށްދާނެ އެވެ.