14 އަހަރުންދަށުގެ އެކަޑަމީ ޗެމްޕިއަންކަން ސަސް އަށް

ސޮކަ ވެޓަރަންސް އެސޯސިއޭޝަނުން ބޭއްވި 14 އަހަރުންދަށުގެ އެކަޑަމީ މުބރާތުގެ ޗެމްޕިއަންކަން ސުޕަ ޔުނައިޓެޑް ސްޕޯޓްސް (ސަސް) ގެ އެކަޑަމީން ހޯދައިފި އެވެ.

އިއްޔެ ހަވީރު ކުޅުނު ފައިނަލު މެޗުގައި، އެޑްވެންޗާ ފުޓްބޯޅަ އެކަޑަމީގެ މައްޗަށް ސަސްގެ އެކަޑަމީ ޓީމުން ކާމިޔާބު ހޯދީ 7-0 ންނެވެ.

މިދިޔަ އަހަރު ވެސް، އެ އުމުރުފުރާގެ ޗެމްޕިއަންކަން ހޯދީ ސަސްގެ އެކަޑަމީންނެވެ.

މުޅި މުބާރާތުގައި ސަސްގެ ޓީމުން ވަނީ 19 ލަނޑު ޖަހައިފަ އެވެ. އެ ޓީމު ކޮޅަށް ވަނީ އެންމެ ލަނޑެކެވެ.

ސަސްގެ އައިމަން އަލީ ވަނީ މުބާރާތުގައި 12 ލަނޑު ޖަހައިފަ އެވެ. ވިދިވިދިގެން ދެ މެޗުގައި ހެޓްރިކް އޭނާ ހެދި އެވެ. ތިން މެޗުގައި މޮޅު ކުޅުންތެރިޔާގެ މަގާމު ހޮދި އެވެ.

އެކަމަކު މުބާރާތުގެ އެންމެ މޮޅު 11 ކުޅުންތެރިންގެ ތެރޭގައި އައިމަން ނުހިމެނުމުން، ސަސްގެ އެކަޑަމީގެ ކޯޗު ފަރީދު މުހައްމަދު ވަނީ އެކަމާ ސުވާލު އުފައްދައިފަ އެވެ.

"މިއީ ހުރީ އައިމެންގެ ސްޓެޓްސް. މި ފެންވަރުގައި ޕާފޯމް ކުރި ކުޅުންތެރިޔަކު އެންމެ ރަނގަޅު 11 ކުޅުންތެރިންގެ ތެރޭގައި ނުހިމެނުމުން ހައިރާންވި،" ފަރީދު ބުންޏެވެ.

ސަސްގެ އެކަޑަމީގެ 10 އަހަރުންދަށުގެ ޓީމާއި 12 އަހަރުންދަށުގެ ޓީމުން ދަނީ މި މަހު ތައިލެންޑްގައި ބާއްވާ ލަލީގާ މުބާރާތުގައި ވާދަކުރަން ތައްޔާރުވަމުންނެވެ. އެ ދެ އުމުރުފުރާގެ ޓީމުތަކުގެ ހައި އިންޓެންސިޓީ ޓްރޭނިންތަކެއް ކުރިއަށް ގެންދަން ތަޖުރިބާކާރު ކޯޗު މުހައްމަދު އާތިފްއާ ވަނީ ހަވާލުކޮށްފަ އެވެ.