އެމްޕީއެލް ތެލުގެ ބޮޑު ހިޔާނާތުގައި ކަނޑާލި މީހަކަށް ހައި ކޯޓުން ބަދަލުގައި ނަގައިދިނީ އެއް ރުފިޔާ

މޯލްޑިވްސް ޕޯޓްސް ލިމިޓެޑް (އެމްޕީއެލް) ގައި ހިންގި ތެލުގެ ބޮޑު ހިޔާނާތުގައި ތުހުމަތުކުރެވިގެން ވަޒީފާއިން ކަނޑާލި މުވައްޒަފަކާ މެދު ފުރިހަމަކުރަން ޖެހޭ އިޖުރާއަތެއް ފުރިހަމަނުކޮށް އޮތުމުގެ ސަބަބުން ބަދަލުގެ ގޮތުގައި އެއް ރުފިޔާ ނަގައިދޭން ހައި ކޯޓުން ހުކުމްކޮށްފި އެވެ.

ހައި ކޯޓުން މި ގޮތަށް ހުކުމްކުރީ ކޮވިޑްގެ ބަލިމަޑުކަމުގެ ތެރޭގައި އެމްޕީއެލްގެ ބައެއް މުވައްޒަފުން ބައިވެރިވެގެން ހިންގި އެތައް މިލިއަން ރުފިޔާއެއްގެ މި ހިޔާނާތުގައި ބައިވެރިވާ ކަމަށް ޝައްކު ކުރެވިގެން ވަޒީފާއިން ވަކިކުރި މުހައްމަދު އައިމަންގެ މައްސަލައިގަ އެވެ. ހުކުމުގައިވާ ގޮތުން އެމްޕީއެލް އާއި ފިއުލް ސަޕްލައި މޯލްޑިވްސްގެ ބައެއް މުވައްޒަފުން ގުޅިގެން ހިންގި މި ހިޔާނާތުގައި އެމްޕީއެލްގެ ލިޔުންތައް ފޯޖްކޮށް 976،972 ލިޓަރުގެ ތެޔޮ އެމްޕީއެލް އަށް ގަތް ކަމަށް ލިޔެކިޔުމުން ދައްކާފައިވެ އެވެ. ތެޔޮ ނުލިބެނީސް، އެ ލިބުނު ކަމަށް ލިޔުންތަކުން ދެއްކުމަށް ފަހު 8.7 މިލިއަނަށް ވުރެ ގިނަ ރުފިޔާ އަށް ހިޔާނާތްތެރިވެފައިވާ ކަމަށް އެމްޕީއެލް އިން ބުނެފައިވާކަން ހުކުމުގައި ވަނީ ފާހަގަކޮށްފަ އެވެ.

އެމްޕީއެލްގެ ޕްރޮކިއުމެންޓް ޑިޕާޓްމެންޓްގައި މަސައްކަތްކުރި އައިމަން ވަޒީފާއިން ވަކިކުރީ ހިޔާނާތުގައި ބައިވެރިވި ކަމަށް ބަލާނެ އެކަށީގެންވާ ސަބަބުތަކެއް ހުރުމުން ކަމަށް އެމްޕީއެލްއިން ބުނެފައިވެ އެވެ. ނަމަވެސް، އައިމަން ބުނެފައިވަނީ އޭނާ ވަޒީފާއިން ވަކިކޮށްފައިވަނީ އިޖުރާއަތްތައް ފުރިހަމަނުކޮށް ކަމަށެވެ.

އެ މައްސަލަ އައިމަންގެ ފަރާތުން ވަޒީފާއާ ބެހޭ ޓްރައިބިއުނަލަށް ހުށަހެޅުމުން އެ ތަނުން ނިންމާފައިވަނީ އައިމަން ވަޒީފާއިން ވަކިކޮށްފައިވަނީ އިޖުރާއީ އަދި މައުޟޫއީ އަދުލުވެރިކަން ގާއިމްކުރުމެއް ނެތި ކަމެވެ. އޭނާއަށް ބަދަލުގެ ގޮތުގައި މުސާރަ އާއި އިނާޔަތުގެ ގޮތުގައި ލިބެމުން ދިޔަ ގާތްގަނޑަކަށް 19،000ރ. ވަޒީފާއިން ވަކިކުރި ތާރީހުން ފެށިގެން ޓްރައިބިއުނަލުން މައްސަލަ ނިންމި ތާރީހާ ދެމެދުގެ މުއްދަތަށް ދިޔުމަށް އަމުރުކޮށްފައިވެ އެވެ. އެއީ ގާތްގަނޑަކަށް 112،164ރ. އެވެ.

އަދި، އޭނާގެ ވަޒީފާ ރުޖޫއަކުރުމަށް ވެސް އަމުރުކޮށްފައިވެ އެވެ. މި އަމުރާ މެދު ހިތްހަމަނުޖެހިގެން އެމްޕީއެލްއިން އެ މައްސަލަ ހައި ކޯޓުގައި އިސްތިއުނާފުކުރުމުން އެ ކޯޓުން ބެލި މައްސަލާގައި ހުކުމްގައިވާ ގޮތުން، ހިޔާނާތް ހިނގާފައިވަނީ އައިމަންގެ މަސްއޫލިއްޔަތުތަކަށް އިހުމާލުވެފައި އޮތުމުންކަން ތަހުގީގުން އެނގެ އެވެ.

އެހެންކަމުން، އެފަދަ ތުހުމަތުތަކެއް އޮއްވައި ވަޒީފާއިން ވަކިކުރި މީހަކަށް އަލުން ވަޒީފާ ދިނުމަކީ ގާނޫނީ އަދި އަދާލަތުގެ ހަމައަކުން ވެސް ކުރެވޭނެ ކަމެއް ނޫން ކަމަށް ހުކުމްގައިވެ އެވެ. ވަޒީފާގެ ގުޅުމުގެ ސަބަބުން އުފެދޭ އަމާނަތްތެރިކަމާއި އިތުބާރު ގެއްލިފައިވާކަން ސާފުކޮށް އެނގޭ ކަމަށެވެ. ވަޒީފާ އަލުން ދެވޭ ފަދަ މީހަކަށް އޭނާ ނުވާތީ، މުސާރަ އާއި އިނާޔަތްތައް ވެސް ނަގައިދޭން ނުފެންނަ ކަމަށް ހައި ކޯޓުގެ ހުކުމްގައިވެ އެވެ.

ހައި ކޯޓުގެ ފަނޑިޔާރު މުހައްމަދު ނިޔާޒު ނެރުއްވި ރައުޔުގައި ބުނީ ވަޒީފާއިން ވަކިކުރީ އިޖުރާއީ އަދުލުވެރިކަން ނެތް ކަމަށް ބުނެ، ކޮންމެ މައްސަލައެއްގައި ބޮޑު ބަދަލެއް ލިބޭ ގޮތަށް ޓްރައިބިއުނަލުން އަދި ކޯޓުތަކުން ނިންމުމަކީ އިންސާފުގެ ތަރާދަކުން ކިރާއިރު ބުއްދި ގަބޫލު ކުރެވޭ ކަމެއް ނޫން ކަމަށެވެ.

"އިޖުރާއަތެއް ފުރިހަމަ ނުވެގެން ނަގައިދޭ ބަދަލު އަދުލުވެރިވުމަކީ ވަޒީފާއިން ވަކިކުރެވޭ މީހާއަށް ފައިސާގެ ގޮތުން ކޮންމެ މައްސަލައަކާ ގުޅިގެން ބައިވަރުތަކެއް ދިނުމެއް ނޫން. ބަދަލު ނަގައިދިނުމުގައި ވެސް، ކޮންމެ މައްސަލައެއް ވެސް ބަލަންވާނީ އެ މައްސަލައެއްގައި ކަންހިނގާފައިވާ ގޮތަށް،" ފަނޑިޔާރުގެ ރައުޔުގައިވެ އެވެ.

މި މައްސަލައަކީ އަށް މިލިއަން ރުފިޔާއަށްވުރެ ގިނަ ފައިސާ ހިމެނޭ ތެލުގެ ހިޔާނާތަކާ ގުޅިގެން އެކަމުގައި އިހުމާލު އޮތް ކަމަށް ބުރެވެވޭ މީހަކާ ގުޅޭ މައްސަލައަކަށްވާއިރު، އޭނާ ވަޒީފާއިން ވަކިކުރުމުގައި އިޖުރާއީ ގޯހެއް އޮތް ކަމަށް ބުނެ އެތައް ލައްކަ ރުފިޔާއެއް ނަގައިދިނުމަކީ އިންސާފެއް ނޫން ކަމަށް ފަނޑިޔާރު ވިދާޅުވި އެވެ.

މި މައްސަލާގައި ޓްރައިބިއުނަލުން ނިންމި ގޮތަށް އިޖުރާއަތާ ހިލާފުވެފައިވާ ކަމަށް ބެލި ނަމަވެސް، އޭގެ ސަބަބުން އައިމަންއަށް ސީދާ ލިބުނު ގެއްލުމެއް ނެތްކަން ހުކުމްގައި ފާހަގަކުރި އެވެ. އެހެންވީމާ، ގާނޫނީ ގޮތުން ފުރިހަމަ ކުރަން ޖެހޭ އިޖުރާއަތެއް ފުރިހަމަކޮށްފައި ނެތުމުގެ މައްޗަށް ބަލައި، ބަދަލުގެ ގޮތުގައި އެހާ ބޮޑު ބަދަލެއް ނަގައިދޭން ނުފެންނަ ކަމަށް ނިންމި އެވެ. އަދި، ރަމްޒީ ބަދަލެއްގެ ގޮތުން އެއް ރުފިޔާ ނަގައިދޭން ކަނޑައެޅި އެވެ.

ފަނޑިޔާރު ނިޔާޒުގެ މި ރައުޔަށް ފަނޑިޔާރު ހަސަން ޝަފީއު ތާއިދު ކުރެއްވި އެވެ. ނަމަވެސް، ފަނޑިޔާރު ފާތިމަތު ފަރްހީޒާގެ ރައުޔު ތަފާތުވި އެވެ. ފަނޑިޔާރު ދެކެވަޑައިގަންނަވާ ގޮތުގައި ބަދަލުގެ ގޮތުގައި ތިން މަހުގެ މުސާރަ ނަގައިދޭންޖެހޭނެ އެވެ. ނަމަވެސް، އައިމަންއަށް އަލުން ވަޒީފާ ދިނުމަށް ނިންމާފައި ނިންމުން ބާތިލްކުރަން ފެންނަ ކަމަށް ފަރްހީޒާގެ ރައުޔުގައިވެސް ވެ އެވެ.

ހައި ކޯޓުން މިއަދު މި މައްސަލަ ނިންމާފައިވަނީ އައިމަންއަށް ވަޒީފާ އަލުން ދޭން ނުޖެހޭ ކަމަށް މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމައި، ބަދަލުގެ ގޮތުގައި އެއް ރުފިޔާ އައިމަންއަށް ނަގައިދީ، އެ ހަތް ދުވަސް ތެރޭގައި ދެއްކުމަށް އެމްޕީއެލްގެ މައްޗަށް ދެ ފަނޑިޔާރުންގެ އިއްތިފާގުން ކަނޑައެޅުމަށެވެ.