ޝާހުގެ "ޖަވާން"ގެ ޓްރެއިލާ ނެރެފި

ބޮލީވުޑްގެ ސުޕަސްޓާރު ޝާހްރުކް ހާންގެ ކުރިއަށް އޮތް އެކްޝަން ފިލްމު "ޖަވާން"ގެ ޓްރެއިލާ އިއްޔެ ނެރެފި އެވެ.

ގާތްގަނޑަކަށް ތިން މިނެޓުގެ މި ދިގު ޓްރެއިލާގައި ވަނީ ފިލްމުގެ ޝައުގުވެރި ގިނަ މަންޒަރުތަކެއް ހިމަނައިފަ އެވެ. އަދި މި ފިލްމުގައި ހާއްސަ ފެނިލުމަކުން ފެންނާނެ ދީޕިކާ ޕަދުކޯންގެ އިތުރު މަންޒަރުތަކެއް ވެސް ވަނީ ހިމަނައިފަ އެވެ.

މި ފިލްމުގައި ޝާހު ފެންނާނީ މީގެ ކުރިން ފިލްމެއްގައި އޭނާ ނުފެންނަހާ ތަފާތުކޮށެވެ. ބައެއް މަންޒަރުތަކުގައި ފެނުނީ ޝާހުގެ މޫނުމައްޗަށް ވަރަށް ބޮޑަށް އަނިޔާވެ، ބެންޑޭޖް އަޅާފައި ހުއްޓަ އެވެ. ޝާހު ޑަބަލް ރޯލެއް ކުޅޭ މި ފިލްމުގައި އޭނާ ތަލަކޮށް ހުންނަ ލުކެއް ވެސް ފެންނާނެ އެވެ.

ދެކުނު އިންޑިއާގެ ފިލްމު އިންޑަސްޓްރީގައި މަޝްހޫރު ޑައިރެކްޓަރު އަޓްލީ ކުމާރުގެ މި ފިލްމުގައި ޝާހުއާ އެކު ލީޑު ރޯލުތަކުން ފެންނާނީ، ދެކުނު އިންޑިއާގައި މަޝްހޫރު ތަރިން ކަމަށްވާ ނަޔަންތާރާ އާއި ވިޖޭ ސެތޫޕަތީ އަދި ސަންޔާ މަލްހޯތުރާ އެވެ.

ހިންދީ ބަހުގެ އިތުރުން ތަމަޅަ، ތެލުގޫ، މަލަޔާލަމް އަދި ކަންނަޑާ ބަހުން މި ފިލްމު ނެރެން ވަނީ ނިންމައިފަ އެވެ.

މި ފިލްމު ސިނަމާތަކުގައި އަޅުވަން ފަށަނީ އަންނަ ބުރާސްފަތި ދުވަހުން ފެށިގެންނެވެ.