ބީއެމްއެލްގެ އެހީގައި ހޯނޑެއްދޫ "އޮޅަމައްތާ އިކޯ ޕާކު" ތަރައްގީކޮށްފި

ބީއެމްއެލް ކޮމިއުނިޓީ ފަންޑުގެ އެހީގައި ހޯޑެއްދޫ ސްޕޯޓްސް އިން ތަރައްގީކުރި "އޮޅަމައްތާ އިކޯ ޕާކު" ގެ ދެ ވަނަ ފިޔަވަހީގެ މަސައްކަތްތައް ނިންމައި އާންމުންނަށް ހުޅުވާލާއިފި އެވެ.

މި ޕާކުގެ އަޕްގްރޭޑިން އާއި އެކްސްޓެންޝަންގެ މަސައްކަތް ކުރުމަށް ބީއެމްއެލް ކޮމިއުނިޓީ ފަންޑުން ވަނީ އެހީ ދީފަ އެވެ. މި ޕްރޮޖެކްޓަކީ ކޮންމެ އަހަރަކު ވެސް އުދައިގެ އަސަރުކުރާ ދުވަސްވަރު ލިބޭ ގެއްލުންތައް ކުޑަކުރުމުގެ ގޮތުން ތަރައްގީކުރި ޕާކެކެވެ.

މި ޕްރޮޖެކްޓްގެ ދަށުން ވަނީ އަތިރިމަތީގައި ގަސް އިންދައި، ޕާކުގެ ވޯކްވޭ ސާފުކޮށް، ފަސް ބެންޗު ބަހައްޓައި ސޯލާ ލައިޓް ހަރުކޮށް، ހަޓު ބަހައްޓައި، ކުޅީގައި ހެދޭ ގަސްގަހާގެއްސަށް ނާސަރީއެއް ހަދައިފަ އެވެ.

މި ޕްރޮޖެކްޓުގެ މަސައްކަތްތައް ކުރިއަށް ގެންދިޔަ ހޯޑެއްދޫ ސްޕޯޓްގެ މެމްބަރު މަހްދޫން އާދަމް ވިދާޅުވި ގޮތުގައި މި ޕްރޮޖެކްޓްގެ ސަބަބުން އާއިލީ ގުޅުން ބަދަހިކުރުމަށް ހާއްސަ ސަރަހައްދެއް ލިބި، އިކޯ ޓުއަރިޒަމްގެ ފުރުސަތުތައް ފުޅާވެގެންދާނެ ކަމަށެވެ. އަދި އާންމުންގެ ތިމާވެއްޓާ ގުޅުންހުރި ކަންކަމުގައި ހޭލުންތެރިކަން އިރުތުވެގެންދާނެ ކަމަށް ވެސް ވިދާޅުވި އެވެ.

ބީއެމްއެލް ކޮމިއުނިޓީ ފަންޑަކީ ކޮމިއުނިޓީ ފަންޑަކީ ހިލޭ ސާބަހަށް މަސައްކަތްކުރާ ޖަމިއްޔާތަކުން ރަށްރަށުގައި ހިންގަން ބޭނުންވާ ޕްރޮޖެކްޓްތަކަށް މާލީ އެހީތެރިކަން ފޯރުކޮށްދޭ ފަންޑެކެވެ. މިހާތަނަށް ކޮމިއުނިޓީ ފަންޑުގެ ދަށުން 90 ޕްރޮޖެކްޓް ހިންގުމަށް ފައިސާގެ އެހީ ވަނީ ދީފަ އެވެ.