ގައުމީ މަޖިލިސް 99 ޕަސެންޓް މިހާތަނަށް ބަރުލަމާނީއަށް ބުނަނީ ނޫނެކޭ: ރައީސް

އެމްޑީޕީއާ އަލުން ގުޅިވަޑައިގަތުމަށް އެ ޕާޓީގެ ކުރީގެ ރައީސް މުހައްމަދު ނަޝީދު ފޮނުއްވާފައިވާ މެސެޖާއި ބަރުލަމާނީ ނިޒާމަށް ވެރިކަން ފުރޮޅާލުމާ ގުޅޭ ގޮތުން އެމްޑީޕީގެ ގައުމީ މަޖިލީހުގެ މެމްބަރުންގެ ރޫހް ހުރި ގޮތަށް ބަލާއިރު 99 ޕަސެންޓް މީހުން މިހާތަނަށް ބުނަނީ ނޫނެކޭ ކަަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.

ރިޔާސީ އިންތިހާބުގެ ނާކާމިޔާބީއަށް ފަހު ފުރަތަމަ ފަހަރަށް ބޭއްވި ނިއުސް ކޮންފަރެންސްގައި ނަޝީދު އެމްޑީޕީއާ އަލުން ގުޅިވަޑައިގަތުމާ ގުޅޭ ގޮތުން ނޫސްވެރިން ތަކުރާރުކޮށް ކުރި ސުވާލުތަކާ ގުޅިގެން ރައީސް ވިދާޅުވީ އެމަނިކުފާނަށް ވެސް ނަޝީދުގެ މެސެޖެއް ލިބިވަޑައިގަތް ކަމަށެވެ. އެކަމަކު "ވަކި މީހަކު ޕާޓީއަށް ގެނައުން މިވަގު މުހިއްމެއް ނޫން" ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި ވަކި މީހަކު އެމްޑީޕީގައި ދެމިހުންނެވުން ވެސް އެހާ މުހިއްމެއް ނޫނެވެ. އެމްޑީޕީ އެއަށް ވުރެން ވަރުގަދަ ކަމަށާއި ވޭތުވެދިޔަ ތަނުގައި އެތަން އޮންނާނީ ފެނިފައި ކަމަށް ވިދާޅުވި އެވެ.

"ވަކި މީހަކު ޕާޓީން ވަކިވެގެން ގޮސް، ވަކި މީހަކު ޕާޓީއަށް އެނބުރި އައިސްގެން ވާ ކަމެއް ނޫން އެމްޑީޕީއަކީ. އެއަށް ވުރެން މާ ވަރުގަދަ ހަމަތަކަކާ އުސޫލްތަކެއް މަތީގައި ތަރުތީބުވެގެން ހިނގާ ޕާޓީއެއް. އަޅުގަނޑު ނެތަސް ޕާޓީ ހިނގާނެ،" ރައީސް ވިދާޅުވި އެވެ.

ގައުމީ މަޖިލީހުގައި އިންނަވާތީ، ނަޝީދުގެ ހުށަހެޅުއްވުމާއި ބަރުލަމާނީއާ ގުޅޭ ގޮތުން ގައުމީ މަޖިލީހުގެ ރޫހް ހުރި ގޮތް ފެނިވަޑައިގަންނަވާ ކަމަށް ރައީސް ވިދާޅުވި އެވެ.

"ގާތްގަނޑަކަށް، އަޅުގަނޑަށް ދެންނެވިދާނެ 99 ޕަސެންޓް މިހާތަނަށް ހަމަ ނޫނެކޭ ބުނަމުން އަންނަނީ. ބަރުލަމާނީއަށް ވެސް ހަަމަ ނޫނެކޭ ބުނަމުން އަންނަނީ. އެކަމަކު އެއީ ދެން މަޝްވަރާގެ ތެރެއިން ކުރެވޭނެ ކަންތައްތައް. މިހާތަނަށް ޝުއޫރު ހުރި ގޮތް މި ދަންނަވާލީ. އަޅުގަނޑު އެއަކު އެއްޗެއް ނުދަންނަވަން،" ރައީސް ވިދާޅުވި އެވެ.

"އަޅުގަނޑު ކޮންމެހެން ރައީސް ނަޝީދަށް ތާއީދުކުރުން އެއީ މިހާރު ދެން އަޅުގަނޑު ނިންމާފައި އޮތް ކަމެއްތޯ ނޫންތޯ އެއީ އަޅުގަނޑު ނިންމާފައި އޮތް ކަމެއް ނޫން. އަޅުގަނޑު އަބަދުވެސް މަސައްކަތް ކުރާނީ އެމްޑީޕީއަށް ފައިދާ ހުރި ގޮތަށް. އެމްޑީޕީގެ މުސްތަގުބަލަށް އެންމެ ފައިދާހުރި ގޮތަށް،" ރައީސް ވިދާޅުވި އެވެ.

ރައީސް ވިދާޅުވި ގޮތުގައި އެމަނިކުފާނު ތާއީދު ކުރައްވަނީ ރިޔާސީ ނިޒާމަށެވެ. ވެރިކަމުގެ ނިޒާމާ ބެހޭ ގޮތުން ގާނޫނުއަސާސީއަށް ގެންނަ އެއްވެސް ބަދަލެއް އެމަނިކުފާނު ތަސްދީގު ކުރައްވާނީ ރައްޔިތުންގެ ވޯޓަކަށް ފަހު ކަމަށް ވެސް ރައީސް ވިދާޅުވި އެވެ.