ޕަރިނީތީ ހަނީމޫނަށް ނުގޮސް ރާއްޖެ އަތުވެއްޖެ

މިފަހުން ކައިވެނިކުރި ބޮލީވުޑްގެ ތަރި، ޕަރިނީތީ ޗޯޕްރާ ޗުއްޓީ އަށް ރާއްޖެ އަތުވެއްޖެ އެވެ.

ޕަރިނީތީ ރާއްޖެ އައީ މިދިޔަ ހޯމަ ދުވަހު އެވެ. ބައެއް މީހުން ހީކުރީ އޭނާ ރާއްޖެ އައީ ކައިވެންޏަށް ފަހު ހަނީމޫނަށް ކަމަށެވެ. އެކަމަކު، ކަންތައް ވީ އެހެނެއް ނޫނެވެ.

އޭނާގެ އިންސްޓަގްރާމްގައި އިއްޔެ ކުރި ޕޯސްޓެއްގައި ބުނީ އޭނާ ރާއްޖެ އައީ ހަނީމޫނަށް ނޫން ކަމަށާއި މިއީ "ގާލްސް ޓްރިޕް"އެއް ކަމަށެވެ.

ޕަރިނީތީ އޭނާގެ އެންމެ ގާތް ރައްޓެހިންނާއި އާއިލީ ގޮތުން ވެސް އެންމެ ގާތް މީހުންނާ އެކު ޗުއްޓީ ހޭދަކުރަމުން އަންނަނީ މާލެ އަތޮޅުގައި އޮންނަ ވޮލްޓޯފް އެސްޓޯރިއާ މޯލްޑިވްސް އިތާފުށި ރިސޯޓުގަ އެވެ.

މި ދަތުރުގައި އޭނާ ނަގާ ބައެއް ފޮޓޯތަކާއި ވީޑިއޯތައް އިންސްޓަގްރާމްގައި އަންނަނީ ހިއްސާކުރަމުންނެވެ.

ޕަރިނީތީ އާއި އިންޑިއާގެ ސިޔާސީ ލީޑަރެއް ކަމަށްވާ ރަގަވް ޗާދާ ކައިވެނިކުރީ މިދިޔަ މަހު 24 ގަ އެވެ. އެމީހުންނަކީ ކޮލެޖުގައި ކިޔެވި ދުވަސްވަރުން ފެށިގެން ވެސް ރައްޓެހިންނެވެ.