ޕަރީގެ ދެމަފިރިން އެނިވާސަރީ ފާހަގަކުރަން ރާއްޖޭގައި

ބޮލީވުޑްގެ ތަރި ޕަރިނީތީ ޗޯޕްރާ އާއި އޭނާގެ ފިރިމީހާ ރާގަވް ޗަންދާ، އެ ދެމަފިރިންގެ ކައިވެނީގެ ފުރަތަމަ އެނިވާސަރީ ފާހަގަކުރަން ރާއްޖެ އަތުވެއްޖެ އެވެ.

ޕަރީ އާއި ރާގަވްގެ ކައިވެންޏަށް އެއް އަހަރުވީ އިއްޔެ އެވެ. އިންޑިއާގެ ގާނޫނު ހަދާ މަޖިލީހުގެ މެމްބަރެއް ކަމަށްވާ ރާގަވް އާއި ޕަރީ ކައިވެނި ކުރީ މިދިޔަ އަހަރު ސެޕްޓެމްބަރު 24 ގަ އެވެ.

އެ ދެމަފިރިން ރާއްޖެ އައީ ކޮން ދުވަހަކު ކަމެއް އަދި ޗުއްޓީ ހޭދަކުރަނީ ކޮން ރިސޯޓެއްގައި ކަމެއް އަދި ނޭނގެ އެވެ.

ނަމަވެސް، އެ ދެމަފިރިންގެ ކައިވެނީގެ ފުރަތަމަ އަހަރީ ދުވަސް ފާހަގަކުރީ ރާއްޖޭގައި ކަން ޔަގީންވީ މިއަދު އިންސްޓަގްރާމްގައި ކުރި ޕޯސްޓުތަކުންނެވެ.

ރިސޯޓުގައި ނަގާފައިވާ ދެމަފިރިންގެ ލޯބި ފޮޓޯތަކާއި ވީޑިއޯތަކާ އެކު، ޕަރީ އިންސްޓާގައި ކުރި ޕޯސްޓުގައި ބުނިގޮތުގައި، އިއްޔެއަކީ އެ ދެމަފިރިންނަށް ވަރަށް ހާއްސަ ދުވަހެކެވެ. އަހަރީ ކައިވެނީގެ އެނިވަސަރީގެ މުނާސަބަތުގައި އެންމެން ފޮނުވި ހެޔޮ ދުއާ އާއި މެސެޖުތަކަށް ޝުކުރު ވެސް އަދާކުރި އެވެ.

"ރަގާއީ... އަހަރެންގެ މާޒީގެ ހަޔާތުގައި އަދި މި ދިރިއުޅުމުގައި އަހަރެން ކުރި ކަމެއް ނޭނގޭ، އަހަންނަށް އޭނާ ހައްގުވާކަށް،" އެ ޕޯސްޓުގައި ޕަރީ ބުންޏެވެ.

ޕަރީ ބުނީ ރާގަވް ވަރުގެ ފިރިޔަކު ނުލިބޭނެ ކަމަށެވެ. އޭނާއަކީ ރަނގަޅު ފިރިއެއްގެ އިތުރުން ރަނގަޅު ދަރިއެއް، ޅިޔަނެއް އަދި ޅީދަރިއެއް ކަމަށް ވެސް ޕަރީ ބުންޏެވެ.

ރާގަވް ގައުމަށް ކޮށްދޭ ހިދުމަތަށް ވެސް ޕަރީގެ ޕޯސްޓުގައި ތައުރީފުކުރި އެވެ.

ރާގަވްގެ އިންސްޓަގްރާމް ޕޯސްޓުގައި ބުނީ އޭނާގެ ހަޔާތުގައި މިހާރު ދިމާ ކޮންމެ ކަމެއްގައި ވެސް އޭނާގެ އެންމެ ބޮޑު ހިތްވަރަކީ ޕަރީ ކަމަށެވެ.

"ތިއީ، އަހަރެންގެ އެންމެ ހިތްވަރަކީ، އަހަރެންގެ ސަޕޯޓް ސިސްޓަމަކީ އަދި އަހަރެންގެ އެންމެ ގާތް ރަހުމަތްތެރިޔަކީ ވެސް،" އޭނާ ބުންޏެވެ.

ޕަރީ ވަނީ މީގެ ކުރިން ވެސް އެކި ފަހަރު މަތިން ޗުއްޓީ ހޭދަކުރަން ރާއްޖެ އައިސްފަ އެވެ.