ޔާމީން އުފައްދާ ޕާޓީން ބުނަނީ ވަފާތެރިންނާ އެކު ރާއްޖެ ބަދަލުކޮށްލާނެ ކަމަށް

ކުރީގެ ރައީސް އަބްދުﷲ ޔާމީންގެ ވަފާތެރިންނާއެކު، އަލަށް އުފައްދާ "ޕީޕަލްސް ނޭޝަނަލް ފްރޮންޓް" (ޕީއެންއެފް) އިން ރާއްޖޭގެ ސިޔާސީ ދަތުރު ބަދަލުކޮށް، ވެރިކަން ކުރާނެ ކަމަށް، އެ ޕާޓީ އުފެއްދުމުގައި އިސްކޮށް ހަރަކާތްތެރިވާ ބޭފުޅުން މިއަދު ބުނެފި އެވެ.

އާ ސަރުކާރާއެކު ޕީޕީއެމުން އެ މަނިކުފާނު އެކަހެރިކުރުމުގެ ވަރަށް ބޮޑެތި ޝަކުވާތަކާއެކު، ޔާމީން ވަނީ މިދިޔަ ބުރާސްފަތި ދުވަހުގެ ރޭ ޕީޕީއެމުން ވަކިވެ، އާ ޕާޓީއެއް އުފައްދަން ނިންމައިފަ އެވެ. އެކަމާ ގުޅޭގޮތުން އެ ފަރާތްތަކުން ވަނީ އިލެކްޝަންސް ކޮމިޝަން (އީސީ) އާ މިއަދު ވެސް ބައްދަލުކުރައްވައިފަ އެވެ.

ޕީއެންފީ އުފެއްދުމުގައި އިސްކޮށް ހަރަކާތްތެރިވެވަޑައިގަންނަވާ، ކުރީގެ މިނިސްޓަރު މަލީހު ޖަމާލު ވިދާޅުވީ ޕާޓީ އުފެއްދުމުގެ ހުއްދަ އީސީން ލިބުމާއެކު، ޕާޓީއެއް އުފެއްދުމުގެ ރިކޯޑު މުގުރާލާނެ ކަމަށެވެ. އެ ޕާޓީން މާލެ ސިޓީގެ މޭޔަރުކަމަށް ވާދަކުރައްވާނެ ކަމަށާއި މަޖިލީހުގެ އިންތިހާބުގައި ވާދަކޮށް ބޮޑު ކާމިޔާބީއެއް ހޯދާނެ ކަމަށް ވެސް އޭނާ ވިދާޅުވި އެވެ.

މަލީހު ވިދާޅުވި ގޮތުގައި އާއްމުންގެ އިހުތިރާމާއި ލޯބި ލިބިފައިވާ ލީޑަރަކީ ޔާމީނެވެ. ބަޔަކު ޕީޕީއެމް ފޭރިގެންފައިވާ ކަމަށް ވިދާޅުވެ، އަލަށް އުފައްދާ ޕާޓީއާ ގުޅުމަށް ޔާމީން އެދިވަޑައިގަންނަވާ ކަމަށް މަލީހު ވިދާޅުވި އެވެ.

އޭނާ ވިދާޅުވި ގޮތުގައި މިދިޔަ ފަސް އަހަރުގެ ތެރޭގައި ޔާމީނަށް ވަރަށް ބޮޑެތި އަނިޔާތައް ލިބުނެވެ. އޭގެ ތެރެއިން ވެސް އެންމެ ބޮޑު އަނިޔާ ކުރުމަތިވީ އެ މަނިކުފާނަށް ރިޔާސީ އިންތިހާބުގައި ވާދަނުކުރެވޭނެ ކަމަށް ސުޕްރީމް ކޯޓުން ނިންމި ބޭއިންސާފު ޝަރީއަތުގެ ސަބަބުން ކަމަށާއި އޭގެ ސަބަބުން އިންތިހާބުން ފުރުސަތު ގެއްލި، ޕާޓީ ވެސް ވަގަށް ނަގާފައިވާ ކަމަށް މަލީހު ވިދާޅުވި އެވެ.

އެ ކަންކަމުގައި އަޑީގައި ހުންނެވީ، އޭނާ ވިދާޅުވި ގޮތުގައި، ރައީސް ޑރ. މުހައްމަދު މުއިއްޒުގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ އެވެ.

ޕީއެންއެފް އުފެއްދުމުގައި އިސްކޮށް އުޅުއްވާ، ކުރީގެ ނައިބު ރައީސް ޑރ. މުހައްމަދު ޖަމީލް ވިދާޅުވީ އެ ޕާޓީއަކީ ސިޔާސީ މައިދާނުގައި އުފެދިގެންވާ އެންމެ ބިޔަ އަދި ވަރުގަދަ ޕާޓީއަށް ވާނެ ކަމަށެވެ.

ރާއްޖޭގައި ދެން ވެރިކަން ކުރާނެ ޕާޓީއަކީ ވެސް، މަލީހު ވިދާޅުވި ގޮތުގައި، ޕީއެންއެފް އެވެ.

"ރައީސް ޔާމީން ގެއަށް ވަޑައިގަތުމަށްފަހު ކީއްވެގެންތޯ ލީޑަޝިޕްގައި ހިމެނޭ، އަޅުގަނޑު އެއްވެސް ބޭފުޅެއްގެ ނަމެއް ދަންނަވާކަށް ބޭނުމެއް ނޫން، އެއްވެސް ބޭފުޅަކު ރައީސް ޔާމީނާ ހަމައަށް ވަޑައިނުގަތީ. އެއީ އެހާ އަގެއް ނެތް ބޭފުޅަކީ؟ އެއީ އެހާ ދެރަ ބޭފުޅަކީތޯ؟ ގުރުބާނީވެވަޑައިގަންނަވާ ބޭފުޅަކަށް ނުވަނީތޯ؟ އެއީ މި ގައުމަށް އެއްވެސް ހިދުމަތެއް ނުކުރައްވާ ބޭފުޅަކީތޯ؟ އެއީ ޕީޕީއެމްގައި އެ ތިބަ ކުޑަކުދިންނާއެކީގައި މި ދަތުރު، ބިޔަ ދަތުރު ކުރައްވައި ވެރިކަން ބަދަލުކުރަން އެއްވެސް އަގެއް އަދާކުރައްވާ ބޭފުޅަކަށް ނުވަނީތޯ؟" ޖަމީލް ސުވާލު އުފެއްދެވި އެވެ.

"ރައީސް ޔާމީންގެ އަސްލު ހަގީގި ވަފާތެރިންނާ އަސްލު ހަގީގީ އެކުވެރިންނާ އެކު މި ފަށާ ސިޔާސީ ދަތުރު ވެގެންދާނީ ދިވެހިރާއްޖެ ބަދަލުކޮށްލާނެ ސިޔާސީ ދަތުރަކަށް އިރާދަކުރެއްވިއްޔާ."