ޕީއެންއެފް ރަޖިސްޓްރީކުރަން ހުށަހަޅާނީ ޔާމީން މިނިވަންވުމުން: މަލީހު

ކުރީގެ ރައީސް އަބްދުﷲ ޔާމީން އުފައްދަވާ ސިޔާސީ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) ރެޖިސްޓްރީކުރުމަށް ބޭނުންވާ މެންބަރުންގެ އަދަދު ހަމަވެފައިވާކަމަށާއި ނަމަވެސް، އެކަމަށް އެދި އިލެކްޝަންސް ކޮމިޝަން (އީސީ) އަށް ހުށަހަޅާނީ ޔާމީން މިނިވަންވުމުން ކަމަށް އެ ޕާޓީ އުފެއްދުމުގައި އިސްކޮށް ހަރަކާތްތެރިވާ ކުރީގެ މިނިސްޓަރު މަލީހު ޖަމާލު ވިދާޅުވެއްޖެ އެވެ.

ޔާމީންގެ ދަރިކަލުން ޒެއިން އަބްދުﷲ ޔާމީންގެ މުއައްސިސްކަމުގައި އުފައްދާ ޕީއެންއެފް އުފެއްދުމުގެ ހުއްދަ މިދިޔަ މަހުގެ 29 ވަނަ ދުވަހު އީސީން ވަނީ ހުއްދަ ދީފަ އެވެ. ހަފްތާއެއް ތެރޭގައި ރެޖިސްޓްރީކުރަން ބޭނުންވާ އަދަދު ހަމަކޮށް ހުށަހަޅާނެ ކަމަށް އޭރު ބުނި ނަމަވެސް އަދި ހުށައެއްނާޅަ އެވެ.

އެކަމާ ގުޅިގެން "މިހާރު" އިން ސުވާލުކުރުމުން މަލީހު ވިދާޅުވީ، ރެޖިސްޓްރީކުރަން ބޭނުންވާ އަދަދަށް ވުރެ އިތުރަށް ވެސް ފޯމު ލިބިފައިވާ ކަމަށާއި އެ ޕާޓީން ފޯމުތައް ވެރިފައި ވެސް ކޮށްފައިވާ ކަމަށެވެ.

ޔާމީން މިނިވަން ވުމުން ރެޖިސްޓަކުރަން ބޭނުންވަނީ އެކަމަށް ބާއްވަން ޖެހޭ ޖަލްސާގައި ޔާމީންގެ ބައިވެރިވުން މުހިންމު ކަމަށް އެ ޕާޓީން ދެކޭތީ ކަމަށް އޭނާ ވިދާޅުވި އެވެ.

އޭނާ ވިދާޅުވީ، އަމާޒަކީ 4،000 މެންބަރުންގެ ފޯމު ހުށަހެޅުން ކަމަށާއި ރާއްޖޭގެ ކޮންމެ ރަށަކުން ވެސް މެންބަރަކު އެ ޕާޓީއަށް ވަންނަން އެދޭ ކަމަށެވެ.

"އަޅުގަނޑުމެން ކޮންމެހެން އަވަސް އަރުވާލައިގެން ޕާޓީ ރެޖިސްޓާ ކުރަން ހުށަހަޅަން ބޭނުމެއް ނުވޭ. ޕީޕީއެމް/ޕީއެންސީގެ މަޖިލިސް ޕްރައިމަރީގައި ވެސް އެބަތިބި އަޅުގަނޑުމެންގެ ސަޕޯޓަރުން. ޕްރައިމަރީއަށް ހިޔަނި އެޅެން ބޭނުން ނުވޭ. އެ ބޭފުޅުން އަދި ގުޅިވަޑައިގަންނަވާނެ ޕީއެންއެފްއާ،" މަލީހު ވިދާޅުވި އެވެ.

ޔާމީންގެ ފަރާތްޕުޅުން ޕާޓީ އުފެއްދުމުގައި އިސްކޮށް އުޅުއްވަނީ މަލީހުގެ އިތުރުން ޔާމީންގެ އިސް ވަކީލް ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދެވެ.

ޔާމީން، ޕީޕީއެމް ދޫކޮށްލެއްވީ އެ ޕާޓީގެ ލީޑަޝިޕާ މެދު އުފެދިފައިވާ ހިޔާލުތަފާތުވުންތަކާ ގުޅިގެންނެވެ. އެމަނިކުފާނުގެ ފަރާތްޕުޅުން ވާހަކަ ދައްކަވަމުން ޖަމީލް ވިދާޅުވެފައިވާ ގޮތުގައި ޕީޕީއެމާއި ޕީއެންސީގެ އިސް ބޭފުޅުން ޔާމީން ދޫކޮށްލެއްވީ އެވެ.