އާސަންދަ ދެމެހެއްޓޭނީ ކޯ-ޕޭމެންޓް ނިޒާމަކަށް ގޮސްގެން: ޒީނިއާ

އާސަންދަ ދެމެހެއްޓެނިވި ގޮތެއްގައި ހިންގުމަށް އާންމުންގެ ކޮންޓްރިބިއުޝަނެއް ނުވަތަ ކޯ ޕޭމެންޓް ނިޒާމަކަށް ދާން ޖެހޭ ކަމަށް އެ ކުންފުނީގެ މެނޭޖިން ޑިރެކްޓަރު އައިމިނަތު ޒީނިއާ ވިދާޅުވެއްޖެ އެވެ.

ރައްޔިތުންގެ މަޖިލީހުގެ އެސްއޯއީ ކޮމިޓީގައި މިއަދު މެންބަރަކު ކުރެއްވި ސުވާލަކަށް ޖަވާބު ދެއްވަމުން އޭނާ ވިދާޅުވީ، އާސަންދަ ނިޒާމަށް ގެންނަ އެފަދަ ބަދަލުތަކާ މެދު ގޮތެއް ނިންމާނީ އެންސްޕާއިން ކަމަށެވެ. އާސަންދައަށް ގެންނަ ކޮންމެ ބަދަލެއް ތަންފީޒު ކުރައްވާނެ ކަމަށް ވެސް އޭނާ ވިދާޅުވި އެވެ.

"އެންސްޕާގެ ސްކީމެއްވީމަ އެ ސްކީމަށް ގެންނަ ހުރިހާ ބަދަލެއް ގެނެވޭނީ އެންސްޕާއަށް އެކަނި. ސްކީމުގެ ބޯޑު ވެސް އޮންނަނީ އެންސްޕާގައި. ތިޔަ ވިދާޅުވިހެން ކޯޕޭމެންޓަށް ދާން އަޅުގަނޑުމެން ވަރަށް ތާއީދު. ކޯ ޕޭމެންޓެއް ނުލާ މި ސްކީމު ސަސްޓެއިން ނުކުރެވޭނެ،" އޭނާ ވިދާޅުވި އެވެ.

އާސަންދަ ސްކީމަށް ސަޕްލިމެންޓްރީ ބަޖެޓުން އިތުރު ކުރި އަދަދާ އެކު ޖުމްލަ ބަޖެޓު ވަނީ 2.3 ބިލިއަން ރުފިޔާއަށް އަރާފަ އެވެ. އެ ސްކީމު އެއް އަހަރުން އަނެއް އަހަރަށް ބޭނުން ކުރާވަރު އިތުރު އިރު ވޭތުވެދިޔަ ފަސް އަހަރު އާސަންދަ އަށް 7.4 ބިލިއަން ރުފިޔާ ހޭދަކޮށްފައިވެ އެވެ.

ވޯލްޑް ބޭންކުގެ ހިސާބުތައް ދައްކާ ގޮތުގައި އާސަންދައަށް ކުރާ ހޭދަ 2014 އިން 2019 ވަނަ އަހަރަށް 18 ޕަސެންޓު ވަނީ އިތުރުވެފަ އެވެ.

ނަމަވެސް، އާސަންދަ ބޭނުން ކުރާ މީހުންގެ އަދަދު އެ މުއްދަތުގައި އިތުރުވީ އެންމެ ތިން ޕަސެންޓަށެވެ. އާސަންދަ ބޭނުން ކުރާ މީހުންގެ އަދަދު އިތުރުވި މިންވަރާ ނުބައްދަލު އަދަދަކަށް އެ ސްކީމުގެ ހަރަދުތައް އެހާ ބޮޑަށް އިތުރުވީ ބޭހުގެ ހަރަދާއި ސިއްހީ ހިދުމަތްތަކުގެ އަގުތައް އިންތިހާއަށް އުފުލުމުންނެވެ.