ރައީސް ވަކި ކުރުމުގެ މަސައްކަތް ފަށަން އެމްޑީޕީގެ ޕީޖީ އަށް ހުށަހަޅާނަން: ޝިފާއު

މިވަގުތަށް އޮތް އެންމެ މުހިންމު މަސައްކަތަކީ ރައީސް ޑރ. މުހައްމަދު މުއިއްޒު މަގާމުން ވަކިކުރުން ކަމަށާއި އެކަން އެމްޑީޕީގެ ޕާލިމެންޓްރީ ގުރޫޕަށް ހުށަހަޅުއްވާނެ ކަމަށް އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެ އެވެ.

ރައްޔިތުންގެ މަޖިލީހުގައި ޝިފާއު ވިދާޅުވީ މިވަގުތު ރާއްޖޭގައި ހިނގަނީ ގާނޫނީ ހުކޫމަތެއް އޮތް ވެރިކަމެއް ނޫން ކަމަށާއި ވެރިކަން އެކުލަވާލަން ވެސް އުޅެނީ ނޭނގިގެން ކަމަށެވެ. އަދި، ސަރުކާރުން ގެންދަނީ ގާނޫނުތަކަށް ބެލުމެއް ނެތި، ގާނޫނުތަކާ ފުށުއަރާ ގޮތަށް ނިންމުންތައް ނިންމަމުން ކަމަށް ވެސް އޭނާ ވިދާޅުވި އެވެ.

"މިއަދު ސަރުކާރު ހިނގަމުން މިދާ ގޮތާމެދު އަޅުގަނޑުމެން ވިސްނަން އެބަ ޖެހޭ. މި ހިނގާ ސަރުކާރުގައި ގާނޫނީ ހުކޫމަތެއް ނެތޭ މި ބުނަނީ އިއްޔެ އިކޮނޮމިކް މިނިސްޓްރީން ވެބްސައިޓްގައި ހުރި މައުލޫމާތުތައް ނަގާ ގާނޫނާ ހިލާފަށް އެ ނިންމި ނިންމުން ހެއްކަކަށް ފުދޭނެ،" ޝިފާއު ވިދާޅުވި އެވެ.

ޝިފާއު ވަނީ ޝަރުއީ ދާއިރާ އަށް ވެސް ރައީސް ނުފޫޒު ފޯރުވަމުންގެންދަވާ ކަމަށާއި ކުރީގެ ރައީސް އަބްދުﷲ ޔާމީންގެ މައްސަލަ ހުއްޓުވަމުންގެންދާ ކަމަށް ވެސް ތުހުމަތު ކުރައްވައިފަ އެވެ. އެކަމާ ގުޅިގެން ޔާމީންގެ ސަޕޯޓަރުން ވެސް ރައީސް މަގާމުން ވަކިކޮށްދޭން އެދެމުން އަންނަ ކަމަށް އޭނާ ވިދާޅުވި އެވެ.

"ދިވެހި ރައްޔިތުން އެ ފާޅުކުރަމުން އަންނަ ހިޔާލުތަކާ އެކީ އަޅުގަނޑަށް ޔަގީންވެ ކަށަވަރުވާ ކަމަކީ މިއަދު މި ރައްޔިތުންގެ މަޖިލީހުން ކުރަން ޖެހޭ އެންމެ އިސްކަމެއް ދޭން ޖެހޭ މަސައްކަތަކީ މިހާރުގެ ރައިސުލްޖުމްހޫރިއްޔާ އަޒުލް ކުރުމުގެ މަސައްކަތް. އަޅުގަނޑު އިރާދަކުރެއްވިއްޔާ އެ މައްސަލަ ޕީޖީ ގުރޫޕަށް ހުށަހަޅާނަން،" ޝިފާއު ވިދާޅުވި އެވެ.

ރައީސް މަގާމުން ވަކި ކުރުމުގެ މަސައްކަތް ފަށަން ޝިފާއު ގޮވާލެއްވިއިރު، އޭނާ ވަނީ މަޖިލީހުގެ ގަވައިދަށް ވެސް އިސްލާހުތަކެއް ހުށަހަޅުއްވައިފަ އެވެ.

އޭނާ ހުށަހެޅުއްވި އިސްލާހުގައިވާ ގޮތުން، މަޖިލީހުގެ މި ދައުރުގައި ކުރިއަށް އޮތް މުއްދަތަށް މެންބަރުންގެ ޖުމްލަ އަދަދު ކަމަށް ގުނާނީ އެ ވަގުތު މަޖިލީހުގެ މެންބަރު ކަމުގައި ދެމިތިބި މެންބަރުންގެ ޖުމްލަ އަދަދަށެވެ. އެއީ އާ ސަރުކާރާ ގުޅިވަޑައިގަނަވަން މަޖިލީހުން ވަކިވެވަޑައިގެންނެވި ހަތް މެންބަރުން ނުހިމަނައި 80 މެންބަރުންނެވެ.

ޝިފާއުގެ އިސްލާހުގައި ހުށަހެޅީ:

- މަޖިލީހުގެ ދައުރު ހަމަވުމުގެ ކުރިން އެއްވެސް ދާއިރާއެއްގެ ގޮނޑި ހުސްވެއްޖެ ނަމަ އެ ދާއިރާއެއްގެ ގޮނޑި އަށް މެންބަރަކު އިންތިހާބު ކުރުވެންދެން މެންބަރުންގެ ޖުމްލަ އަދަދު ކަމަށް ބަލާނީ އެ ދާއިރާތައް ނުހިމަނާ.

- މަޖިލީހުގެ ދައުރެއްގައި މެންބަރުންގެ ޖުމްލަ އަދަދަށް ބަދަލެއް އައިސްފި ނަމަ، އެ ބަދަލެއް އެންމެ އަވަހަށް ބާއްވާ ޖަލްސާއެއްގައި މަޖިލީހުގެ ރައީސް އިއުލާންކުރަން ޖެހޭނެކަން.

ޝިފާއުގެ މި އިސްލާހާ އެކު، މަޖިލީހުގެ ކޯރަމް ގުނާ އަދަދާއި މަޖިލީހުގެ ޖުމްލަ މެންބަރުންގެ ވަކި އަޣުލަބިއްޔަތަކުން ފާސްކުރަން ގާނޫނުއަސާސީގައި ކަނޑައަޅާފައިވާ ކަންކަމުގެ އަދަދަށް ބަދަލު އަންނާނެ އެވެ. އޭގެ ތެރޭގައި މަޖިލީހުން ރައީސާއި ނައިބު ރައީސް މަގާމުން ވަކިކުރުން ހިމެނެ އެވެ.

ރައީސާއި ނައިބު ރައީސް މަގާމުން ވަކި ކުރެވޭނީ ގާނޫނުއަސާސީގައިވާ ގޮތުން އެކަމަށް ހުށަހަޅާ ގަރާރު މަޖިލީހުގެ ޖުމްލަ މެންބަރުންގެ ތިންބައިކުޅަ ދެބައިގެ އަޣުލަބިއްޔަތުން ފާސްވެގެންނެވެ. ޝިފާއުގެ އިސްލާހު ފާސްވެއްޖެ ނަމަ އެމްޑީޕީގައި މިހާރު އޮތް މެޖޯރިޓީން ރައީސާއި ނައިބު ރައީސް މަގާމުން ދުރުކުރެވޭނެ އެވެ. އެ ހާލަތުގައި މައްސަލަ ފާސްކުރަން ބޭނުންވާނީ 54 މެންބަރުންގެ ވޯޓެވެ. އެމްޑީޕީ ޕާލިމެންޓަރީ ގުރޫޕުގައި މިވަގުތު ތިއްބަވަނީ 56 މެންބަރުންނެވެ.

އެހެންވެ، މި އިސްލާހަކީ ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލަން އެމްޑީޕީން ކުރާ މަސައްކަތެއް ކަމަށް ބުނެ ސަރުކާރުގެ ބައެއް ބޭފުޅުން ވަނީ އެމްޑީޕީއަށް ފާޑުކިޔައިފަ އެވެ. ނަމަވެސް ޝިފާއު އޭރު ވިދާޅުވީ ސަރުކާރުގެ ބޭފުޅުން ކަންބޮޑުވެގެން އުޅުއްވާ ފަދަ ކަމެއް ނުވަތަ ރައީސާއި ނައިބު ރައީސް މަގާމުން ވަކިކުރުމާ ގުޅޭ އެއްވެސް މަޝްވަރާއަކާއި މަސައްކަތެއް މިހާތަނަށް އެމްޑީޕީން ނުކުރާ ކަމަށެވެ.