ރިޕޯޓު ފޮތް ދީ، ދަރިވަރުން 17 ދުވަހުގެ ޗުއްޓީއަކަށް

ދަރިވަރުންނަށް ރިޕޯޓު ފޮތް ދީ، ފުރަތަމަ ޓާމުގެ ކުއާޓާ ބްރޭކް މިއަދު ފަށައިފި އެވެ.

މި އަހަރުގެ ކިޔެވުން ފެށީ މިދިޔަ އޮގަސްޓް މަހުގެ ހަ ވަނަ ދުވަހު އެވެ. އެއީ 216 ސްކޫލެއްގައި ޖުމުލަ 84،200 ދަރިވަރުންނާ އެކު އެވެ.

އެކަޑެމިކް ކަލަންޑަރުގައިވާ ގޮތުން ފުރަތަމަ ޓަމުގެ ދެވަނަ ކުއާޓާ ކިޔަވައިދޭން ސްކޫލުތައް ދެން ހުޅުވާނީ ޖެނުއަރީ ހަތެއްގަ އެވެ.

ދަރިވަރުންނަށް ލިބޭ 17 ދުވަހުގެ ޗުއްޓީއަކަށް ފަހު އަންނަ މަހުން ފެށިގެން ސްކޫލުތަކުގެ ކިޔެވުން ފަށަން ނިންމާފައި ވަނީ ގައުމީ ސަލާމުންނެވެ.

ރައީސް ޑރ. މުހައްމަދު މުއިއްޒު، އެ ނިންމެވުން ނިންމެވީ ގައުމު ދެކެ ލޯބިވާ ކުދި ބަޔަކަށް ދަރިވަރުން ހެދުމަށް ކަމަށާއި ގައުމީ ސަލާމާއި ގައުމީ ދިދަ ދެކެ ލޯބިވާ ބަޔަކަށް ތުއްތު ކުދިން ހެދުމަށް ކަމަށް ރައީސް ވަނީ ވިދާޅުވެފަ އެވެ.

ދިރާސީ އާ އަހަރު ފެށުން 2025 ވަނަ އަހަރު އަނެއްކާ ވެސް ޖެނުއަރީ މަހަށް ބަދަލުކުރަން ވެސް މި ސަރުކާރުން ވަނީ ނިންމައިފަ އެވެ. ނަމަވެސް އެ ބަދަލު ގެނެސް ކިޔަވައިދޭން ފަށާނެ ގޮތެއް އަދި ސަރުކާރުން ހާމައެއް ނުކުރެ އެވެ.