އިންޑިއާ ސިފައިން ބޭލުމުގެ ފުރަތަމަ ބައްދަލުވުން ރާއްޖޭގައި ފަށައިފި!

ރާއްޖޭގައި ތިބި އިންޑިއާގެ ސިފައިން އަނބުރާ ގެންދިއުމުގެ މަޝްވަރާތައް ރާއްޖޭގައި މިއަދު ފަށައިފި އެވެ.

ފޮރިން މިނިސްޓްރީގެ އިސް އޮފިޝަލަކު ވިދާޅުވީ، އެއީ ރާއްޖޭގެ ރައީސް ޑރ. މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޮދީ ދުބާއީގައި ބޭއްވެވި ބައްދަލުވުމުގައި އެ ދެ ލީޑަރުން އެއްބަސްވެވަޑައިގެންނެވި ގޮތަށް އުފައްދާފައިވާ "ހައި ލެވެލް ކޮމިޓީ" ގެ ބައްދަލުވުމެއް ކަމަށެވެ.

އެ ބައްދަލުވުމަށް އިންޑިއާގެ އިސް ޓީމު ރާއްޖެ އައީ އިއްޔެ އެވެ.

ފޮރިން މިނިސްޓްރީގައި ކުރިއަށް ގެންދާ އެ ބައްދަލުވުމުގައި ރާއްޖޭގެ ފަރާތުން ބައިވެރިވެވަޑައިގަންނަވަނީ އެމްބެސެޑާ އެޓް ލާޖް އަލީ ނަސީރު މުހައްމަދާއި ޗީފް އޮފް ޑިފެންސް ފޯސް ލެފްޓިނަންޓް ޖެނެރަލް އަބްދުއްރަހީމް އަބްދުއްލަތީފައި ސެކްރެޓަރީ ހާލާ ހަމީދު އަދި އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބެވެ.

ރައީސް އޮފީހުން ބުނީ، ދެ ގައުމުގެ މަތީ ފެންވަރުގެ ބޭފުޅުންގެ ބައްދަލުވުން ނިމުމުން ތަފުސީލު ހާމަކުރައްވާނެ ކަމަށެވެ. އެ ބޭފުޅުންގެ މަޝްވަރާތަކުގައި އިންޑިއާ ސިފައިންގެ މައްސަލައިގެ އިތުރުން ރާއްޖޭގައި އެ ގައުމުން ހިންގާ މަޝްރޫއުތަކުގެ ވާހަކަ ވެސް ދައްކާނެ ކަމަށް ދިވެހި ސަރުކާރުން ބުންޏެވެ.

މިދިޔަ ނޮވެމްބަރު މަހުގެ ފަހުކޮޅު ދުބާއީގައި ބޭއްވި ކޮޕް ސަމިޓްގެ ހަވާސާގެ ތެރެއިން ރައީސް ޑރ. މުއިއްޒާއި އިންޑިއާގެ ބޮޑުވަޒީރު މޮދީ ބައްދަލުކުރައްވައި ކުރެއްވި މަޝްވަރާތަކަށް ފަހު ރައީސް ޑރ. މުއިއްޒު ވިދާޅުވެފައި ވަނީ ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް އެ ގައުމުން އެއްބަސްވެފައިވާ ކަމަށެވެ.

"އަޅުގަނޑުމެންނާ އެކު ކުރެވުނު މަޝްވަރާތަކުގައި އިންޑިއާގެ ސަރުކާރުން އެއްބަސްވެފައި ވަނީ އިންޑިއާ ސިފައިން އަނބުރާ ގެންދާނެ ކަމަށް. މިހާރު ޓެކްނިކަލް ލެވެލްގެ މަސައްކަތްތައް އެބަކުރެވޭ، ދެ ގައުމުގެ ޓެކްނިކަލް ލެވެލްގައި މަސައްކަތް އެބަ ހިނގާ،" ރައީސް ޑރ. މުއިއްޒު މިދިޔަ ޑިސެމްބަރު 3 ގައި ދިވެހި ނޫސްވެރިން ގާތު ވިދާޅުވި އެވެ.

"އަދި މިހާރު އެއްބަސްވެފައި މިވަނީ ހައި ލެވެލް ކޮމިޓީއެއް ވެސް އެކުލަވާލަން މަޝްރޫއުތައް ކުރިއަށް ގެންދިއުމުގައި ދިމާވާ މައްސަލަތައް ހައްލުކުރުމަށް. މިސާލަކަށް މާލެ ކައިރީގައި މި ހިނގާ ބްރިޖު މަޝްރޫއު އާއި އެކިއެކި ލޯނުތަކުގައި މި ދިމާވާ ކަންކަމާ، ގައުމަށް މި ދިމާވެފައިވާ ބޮޑެތި މައްސަލަތަކާ."

ރާއްޖޭގައި ތިބި އިންޑިއާގެ ސިފައިން ބޭލުމަކީ ރައީސް ޑރ. މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރައްވަން އެ މަނިކުފާނު ނިންމަވާފައިވާ ކަމަކެވެ.