ބިން އަތުލި މައްސަލައިގައި 6.5 ބިލިއަން ރުފިޔާ ހޯދަން ކޮރަލް ބޮލެވާޑުން ދައުލަތާ ދެކޮޅަށް ދައުވާކޮށްފި

ރަސްފަންނު ކުރިމަތީގައި ރެސިޑެންޝަލް ކޮމްޕްލެކްސްއެއް އަޅަން ކޮރެލް ބޮލެވާޑަށް ދިން ބިން އަތުލުމަށް ފަހު އެހެން ބިމެއް އެ ކުންފުންޏަށް ނުދިނުމުން ގެއްލުމުގެ ބަދަލުގައި 426 މިލިއަން ޑޮލަރު (6.5 ބިލިއަން ރުފިޔާ) ހޯދަން ދައުލަތާ ދެކޮޅަށް އެ ކުންފުނިން ދައުވާކޮށްފި އެވެ.

ކުރީގެ ރައީސް އަބްދުﷲ ޔާމީންގެ ސަރުކާރުގައި ސިންގަޕޫރުގެ ކުންފުންޏެއް ކަމަށްވާ ކޮރެލް ބޮލެވާޑަށް ރަސްފަންނު ކުރިމަތިން ދިން ބިން އަތުލުމަށްފަހު ހުޅުމާލެއިން އެ ކުންފުންޏަށް ބިމެއް ދޭން ނިންމީ ކުރީގެ ސަރުކާރުގައި 2019 ވަނަ އަހަރު އެވެ. ނަމަވެސް އާ ބިމަށް އެތަން ބަދަލެއް ނުކުރެ އެވެ.

އެ މައްސަލާގައި ކޮރެލް ބޮލެވާޑް ކުންފުނިން ޕްލޭނިން މިނިސްޓްރީ އާއި ފިނޭންސް މިނިސްޓްރީގެ އިތުރުން ދައުލަތާ ދެކޮޅަށް ސިވިލް ކޯޓުގައި ދައުވާކުރީ އާ ބިމަށް އެތަން ބަދަލު ކުރެވިފައި ނުވާތީ އެކަމުގެ ސަބަބުން ލިބުނު ގެއްލުމުގެ ބަދަލުގެ ގޮތުގައި 426 މިލިއަން ޑޮލަރު ދައުލަތުގެ ކިބައިން ހޯދުމަށެވެ.

އެ ދައުވާ އެގޮތުގައި ކުރިއަށް ގެންދިއުމާ މެދު ދައުލަތުން ދެކޮޅު ހެދީ ފިނޭންސް މިނިސްޓްރީ އާއި ދައުލަތުގެ ބައި އެ ދައުވާގައި ނުހިމެނޭނެ ކަމަށް ބުނެ އެވެ. އެހެންވެ، ސިވިލް ކޯޓުން ވެސް ނިންމީ ފިނޭންސް މިނިސްޓްރީ އާއި ދައުލަތުގެ މައްޗަށް އެ ދައުވާ ނުކުރެވޭނެ ކަމަށެވެ.

ނަމަވެސް ޕްލޭނިން މިނިސްޓްރީގެ މައްޗަށް އެ ދައުވާ ކުރެވޭނެ ކަމަށް ކޯޓުގެ ނިންމުމުގައިވެ އެވެ.