އިހުސާސް ކުރެވޭ ހޫނުމިން 40 ޑިގްރީ ސެލްސިއަސް އަށް ވުރެ މައްޗަށް

ރާއްޖޭގެ އުތުރާއި މެދުރާއްޖެތެރޭގެ ހިސާބުތަކަށް އިހުސާސް ކުރެވޭ ހޫނުމިން 40 ޑިގްރީ ސެލްސިއަސް އަށް ވުރެ މައްޗަށް އަރައިފި އެވެ.

މެޓް އޮފީހުން އާންމުކޮށްފައިވާ ތަފާސްހިސާބުތަކުން އެނގޭ ގޮތުގައި ހުޅުލެ އަށް އިހުސާސް ކުރެވޭ ހޫނުމިން މިއަދު މެންދުރު ފަހު 2:00 ގައި ހުރީ 40.4 ޑިގްރީ ސެލްސިއަސްގަ އެވެ. ހަނިމާދުއަށް ހޫނުމިން ހުރީ 40.3 ޑިގްރީ ސެލްސިއަސްގަ އެވެ.

އިހުސާސް ކުރެވޭ ފިނިހޫނުމިން ބިނާވަނީ އެ ސަރަހައްދެއްގެ އަސްލު ފިނިހޫނުމިނާއި ވައިގެ ތެތްކަމުގެ އެވްރެޖް ނިސްބަތަށެވެ.

ރާއްޖޭގެ އެކި ހިސާބުތަކަށް އަސްލު ހޫނުމިން މިއަދު އުޅެނީ 25-39 ޑިގްރީ ސެލްސިއަސްއާ ދެމެދުގަ އެވެ.

އިރުވައި މޫސުން ފަށައި، ޖެނުއަރީ އިން ޖޫން މަހާ ހަމައަށް އެއީ އާންމުކޮށް ރާއްޖެ އަށް އެންމެ ހޫނުގަދަ ދުވަސްވަރެވެ. އާންމުކޮށް އެންމެ ހޫނުގަދަވަނީ އެޕްރީލް މަހު އެވެ.

މިދިޔަ އަހަރު އެންމެ ހޫނުގަދަވި ދުވަސްވަރު މާލެ ސަރަހައްދުގައި އިހުސާސްކުރެވޭ ހޫނުމިން 45 ޑިގްރީ ސެލްސިއަސް އަށް ވެސް އަރާފައިވެ އެވެ.

މެޓް އޮފީހުން ބުނީ މިއަދު ދެކުނުގެ ބައެއް ރަށްތަކަށް ވިއްސާރަކޮށް، ބޯކޮށް ވާރޭވެހުން އެކަށީގެންވާ ކަމަށެވެ. ނަމަވެސް ރާއްޖޭގެ އެހެން ހިސާބުތަކަށް މޫސުން ރަނގަޅުވާނެ ކަމަށް އެ އޮފީހުން ބުންޏެވެ.

މެދުރާއްޖެތެރެ އާއި އުތުރުގެ އަތޮޅުތަކުގައި ވައިގަދަވެ، ކަނޑުތައް ވެސް ގަދަވާނެ ކަމަށް މެޓުން ބުންޏެވެ.