ފަލަސްތީނުގެ ހައްގުގައި ރާއްޖެ އިން އައިސީޖޭގައި ހޯމަ ދުވަހު ބަޔާނެއް ދެނީ

ފަލަސްތީނުގެ ސަރުކާރުގެ އެދުމުގެ މަތިން ރާއްޖެ އިން އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް ފަލަސްތީނު ރައްޔިތުންގެ ހައްގުގައި ބަޔާނެއް ދޭން ތައްޔާރުވަމުން އަންނަ ކަމަށް ފޮރިން މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

ފަލަސްތީނުގެ ރައްޔިތުންނާ ދެކޮޅަށް އިސްރާއިލުން ހިނގަމުންދާ ލާއިންސާނީ އަމަލުތައް ހުއްޓާލުމަށާއި ފަލަސްތީނުގެ މިނިވަން ދައުލަތަކަށް ގޮވާލައި ރައްޔިތުންގެ މަޖިލީހަށް ވިލިނގިލި ދާއިރާގެ އެމްޑީޕީގެ މެންބަރު ސައުދު ހުސައިން ހުށަހެޅުއްވި ގަރާރާ ގުޅޭ ގޮތުން މިނިސްޓަރު ޒަމީރު މިއަދު ވަނީ ހާރިޖީ ގުޅުންތަކުގެ ކޮމިޓީ އަށް ހާޒިރުކޮށްފަ އެވެ.

އެ ކޮމިޓީ އަށް މިނިސްޓަރު ދެއްވި ބަޔާނުގައި ވިދާޅުވީ، އިރުމަތީ ގުދުސް ހިމެނޭހެން އިސްރާއިލުން ހިފާފައިވާ ބިންތަކުގައި އެ ގައުމުން އަމަލު ކުރަމުންދާ ގޮތާ މެދު އުފެދޭ ގާނޫނީ ސުވާލުތަކާ ގުޅޭ ގޮތުން އދ. ގެ އާންމު މަޖިލީހުން އައިސީޖޭގެ އިސްތިޝާރީ ލަފައަކަށް އެދިފައިވާ މައްސަލާގައި ރާއްޖެ އިން ހަރަކާތްތެރިވަމުންދާ ކަމަށެވެ.

"އެގޮތުން ރާއްޖެ އިން ވަނީ ފަލަސްތީނުގެ ސަރުކާރުގެ އެދުމުގެ މަތިން 25 ޖުލައި 2023 ވަނަ ދުވަހު އައިސީޖޭއަށް ލިޔުމުން ބަޔާނެއް ހުށަހަޅާފައި އަދި މި މައްސަލައާ ގުޅޭ ގޮތުން 26 ފެބުރުއަރީ 2024 ގައި އައިސީޖޭގައި ދިވެހިރާއްޖެ އިން އޯރަލް ސްޓޭޓްމެންޓެއް ދިނުމަށް ތަވާލުކުރެވިފައިވާތީ ދިވެހި ސަރުކާރުން މި ގެންދަނީ މިކަމަށް ވާންޖެހޭ ތައްޔާރީތައް ވަމުން،" ޒަމީރު ވިދާޅުވި އެވެ.

އިޒްރޭލާ ދެކޮޅަށް ސައުތު އެފްރިކާ އިން އައިސީޖޭ އަށް ހުށަހަޅާފައިވާ މައްސަލަ އަށް ވެސް ރާއްޖެ އިން ތަދައްހުލުވެ، ފަލަސްތީނުގެ ހައްގުގައި މަސައްކަތް ކުރަމުން އަންނަ ކަން މިނިސްޓަރު ފާހަގަކުރެއްވި އެވެ.

ޒަމީރު ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން ދޭ ޔަގީންކަމަކީ ރާއްޖެ އޮންނާނީ ފަލަސްތީނަށް އެއްބާރުލުން ދިނުމުގައި ސާބިތުވެކަން ކަމަށެވެ. ރާއްޖެ އިން ތާއީދު ކުރަނީ ޓޫ ސްޓޭޓް ސޮލިއުޝަނަކަށް ކަމަށާއި ގަބޫލު ކުރާ ގޮތަކީ ދެ ގައުމުގެ ވަކިވެ ބޯޑަރު އޮންނަން ޖެހޭނީ އިސްރާއިލް ގަދަ ބާރުން ފަލަސްތީނަށް އަރައިގަތުމުގެ ކުރިން 1967 ގެ ކުރިން އޮންނަ ބޯޑަރަށް ކަމަށް ޒަމީރު ވިދާޅުވި އެވެ.

ރާއްޖޭގެ ސްޓޭންޑަކީ މިނިސްޓަރު ވިދާޅުވި ގޮތުގައި، ފަަލަސްތީނުގެ މިނިވަން ދައުލަތެއް އޮންނަން ޖެހޭނެ ކަމާއި އެ ދައުލަތަށް ހުރިހާ ހައްގުތަކެއް ވެސް ލިބުމެވެ.

"އަޅުގަނޑުމެން މި ގެންގުޅޭ ޕޮސިޝަންއަކީ ފަލަސްތީނުގެ ސަރުކާރާއި އަރަބި ގައުމުތަކާއި އެހެން ވެސް ވަރަށް ގިނަ ގައުމުތަކާއި ޖަމިއްޔާތަކުން ވެސް ގެންގުޅޭ ކޮމަން ޕޮސިޝަން. ނަވާރަ ސަތޭކަ ފަސްދޮޅަސް ހަތެއްގެ ބޯޑަރަށް މި ޕޮސިޝަންއަކީ ގާތްގަނޑަކަށް ފަލަސްތީނުގެ ހައްގުގައި ހެޔޮއެދޭ ހުރިހާ ފަރާތަކުން ވެސް ގެންގުޅޭ ޕޮސިޝަން،" ޒަމީރު ވިދާޅުވި އެވެ.

"އިސްރާއިލް އަށް ވެސް ކޯ-އެކްޒިސްޓް ވެވޭނެ ކަމަށް އަޅުގަނޑުމެން ގަބޫލު ކުރަނީ. އިސްރާއިލް އަށް ވެސް އިސްރާއިލްގެ ހައްގުތައް ލިބިފައި އެކަމަކު ފަލަސްތީނަށް ވެސް އެ ގައުމުގެ ހައްގުތައް ލިބިގެން ވަކިން ދެ ގައުމެއްގެ ގޮތުގައި ތިބެވެންޖެހޭނެ ކަމަށް މި ކޮމަން ޕޮސިޝަންގައި މި ގަބޫލު ކުރެވެނީ."

ހަމާސް އިން އިޒްރޭލަށް ހަމަލާ ދިން އޮކްޓޯބަރު މަހުގެ ހަތް ވަނަ ދުވަހު ހަނގުރާމަވެރިން ގާތްގަނޑަކަށް 250 މީހުން ރަހީނުކުރި އިރު ގާތްގަނޑަކަށް 1،160 މީހުން ހަމަލާތަކުގައި އިޒްރޭލުން މަރާލި އެވެ. ބަދަލުގައި އިޒްރޭލުން ދޭން ފެށި ހަމަލާތަކުގައި ފަލަސްތީނުގެ 29،000 އެއްހާ މީހުން މިހާތަނަށް ޝަހީދުކޮށްލާފައި ވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށް ހެލްތު މިނިސްޓްރީން ބުނެ އެވެ.

ދެކުނު އެފްރިކާގައި 1994 ވަނަ އަހަރުގެ ކުރިން އޮތް ނަސްލީ ތަފާތުކުރުމަށް ވުރެ މާ ބޮޑަށް އިޒްރޭލުން ފަލަސްތީނުގެ ސަރަހައްދުތަކުގައި އެފަދަ އަމަލުތައް ހިންގާ ކަމަށް ދުނިޔޭގެ އެންމެ މަތީ ކޯޓު، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި އިއްޔެ ދެކުނު އެފްރިކާއިން ވަނީ ބުނެފަ އެވެ.

އިޒްރޭލުން ފަލަސްތީނު އަޅުވެތިކޮށްފައި އޮތުމުގެ ގާނޫނީ ނަތީޖާއާ މެދު އިސްތިޝާރީ ލަފަޔަކަށް އެދި ހުށަހަޅާފައިވާ މައްސަލައިގައި ދެކުނު އެފްރިކާއިން މިހެން ބުނެފައި ވާއިރު އެ ގައުމުގެ ހުށަހެޅުމަށް 52 ގައުމަކުން ކޯޓުގައި ތާއީދުކުރެ އެވެ.