ޑްރަގް ޓްރެފިކް ކުރި 314 މީހަކަށް ކުރީގެ ސަރުކާރުން މާފުދީ، ދޫކޮށްލި: މިނިސްޓަރު

ޑްރަގް ޓްރެފިކިންގެ ތުހުމަތުގައި އުމުރަށް ޖަލަށް ލާފައިވާ 314 މީހަކަށް މިިދިޔަ ސަރުކާރުގައި މާފުދީ، ދޫކޮށްލާފައިވާ ކަމަށް ހޯމް ލޭންޑް، ސެކިއުރިޓީ މިނިސްޓަރު އަލީ އިހުސާން މިއަދު ވިދާޅުވެއްޖެ އެވެ.

ހޯމް މިނިސްޓްރީ އާއި އެ މިނިސްޓްރީގެ ދަށުން ހިންގާ އިދާރާތަކުން ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ އުމުރަށް ޖަލަށް ލާން ހުކުމް ކޮށްފައިވާ މީހުންގެ ތެރެއިން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފަސް އަަހަރުތެރޭ މާފު ދީ، ދޫކޮށްލާފައިވާ އަދަދު މި ސަރުކާރުން ބެލިއިރު، އުމުރު ދުވަހުގެ ޖަލު ހުކުމުގައި ތިބި ގިނަ ބަޔަކު އޭގެ ތެރޭގައި ހިމެނޭ ކަމަށެވެ.

"ފާއިތުވެ ދިޔަ ފަސް އަހަރުގެ ތެރޭގައި، އުމުރަށް ޖަލށް ލާފައި ތިބި މީހުން، ޑްރަގް ޓްރެފިކް ކުރުމުގެ ކުށުގައި އުމުރަށް ޖަލަށްލާފައި ތިބި މީހުންގެ ތެރެއިން 314 މީހަކަށް އެބައިން ފާއިތުވެ ދިޔަ ފަސް އަހަރު ތެރޭގައި މައާފު ދީފައި،" މިނިސްޓަރު ވިދާޅުވި އެވެ.

އެ ފަަދަ ބޮޑެތި ކުށްވެރިން މިނިވަންކޮށްފައި ތިބުމަކީ ކަންބޮޑުވާ ކަމެއްކަން ފާހަގަ ކުރައްވައި އޭނާ ވިދާޅުވީ، މީހަކު އުމުރަށް ޖަލަށްލުމަށް ހުކުމްކުރަނީ ފުލުހުން އެ މީހަކާ މެދު ހިންގާ ވަރަށް ބުރަ ތަހުގީގަކަށް ފަހު، ސާބިތުވާ ވަރަށް ކަންކަން ފާހަގަވުމުން ކަމަށެވެ.

އެފަދަ ކުށްވެރިން ތަކުރާކުކޮށް، ކުށްތަކަށް އަރައިގަންނަކަން ވެސް އިހުސާން ފާހަގަކުރެއްވި އެވެ.

މަސްތުވާތަކެތީގެ ފަރުވާ ބޭނުންވާ، އެކަމަކު އެ ފަރުވާގެ ނިޒާމުގެ ތެރެއިން ބޭރުން ވަރަށް ގިނަ ބަޔަކު މަގުމައްޗަށް ދޫވެފައިވާ މައްސަލަ ވެސް މި ފަހުން ހޯމް މިނިސްޓްރީން ވަނީ ކަންބޮޑުވުމާ އެކު ފާހަގަކޮށްފަ އެވެ. އެކަން ވެސް ކޮށްފައި ވަނީ ކުރީގެ ސަރުކާރުން ކަމަށް ހޯމް މިނިސްޓްރީން ބުނެފައި ވެ އެވެ.