ޑްރޯންގެ އެހީގައި ރާއްޖޭގެ އިގުތިސާދީ ސަރަހައްދު ބަލަހައްޓަން މާދަމާ ފަށަނީ

ރާއްޖެ އިން ތުރުކީން ގަތް ދެ ޑްރޯންގެ އެހީގައި ރާއްޖޭގެ އިގުތިސާދީ ސަރަހައްދު ބެލެހެއްޓުމުގެ މަސައްކަތް މާދަމާ ރަސްމީކޮށް އިފުތިތާހުކުރަން ދިވެހި ސަރުކާރުން ނިންމައިފި އެވެ.

އެކަމަށްޓަކައި ހާއްސަ ރަސްމިއްޔާތު ބާއްވަން އެމްއެންޑީއެފުން ނިންމާފައި ވަނީ ނ. މާފަރުގަ އެވެ. މާފަރު އިންޓަނޭޝަނަލް އެއާޕޯޓުގައި އަސްކަރީ ޑްރޯން އޮޕަރޭޝަންތަކަށް ހާއްސަ ބޭސްއެއް ގާއިމުކުރަން ދިވެހި ސިފައިން ވަނީ ނިންމައިފަ އެވެ.

ރާއްޖޭގެ ކަނޑުގެ ސަރަހައްދު ބެލެހެއްޓުމަށް ތުރުކީ އިން ގެނެސްފައިވަނީ އެ ގައުމުން އުފައްދާފައިވާ "ބައިރަކްތާރު ޓީބީ2" ގެ ދެ ޑްރޯން އެވެ.

ރާއްޖޭގެ ކަނޑުގެ ސަރަހައްދު ބެލުމަށް މި ސަރުކާރުން ތުރުކީއާ އެކު ހެދި އެއްބަސްވުމެއްގެ ދަށުން ގަތް ޑްރޯންތައް ރާއްޖެ ގެނެސް މާފަރުގައި އޮޕަރޭޓް ކުރުމަށް ސަރުކާރުން ވަނީ ނިންމައިފަ އެވެ.

އަދި އެ ޑްރޯން ޓެސްޓު ކުރަން ފަށާފައިވާ އިރު، މާފަރު މަތިން ދުއްވާ ވީޑިއޯއެއް ވަނީ ސޯޝަލް މީޑިއާގައި އާންމުވެފަ އެވެ.

އެ ޑްރޯންތަކާބެހޭ މައުލޫމާތު ސަރުކާރުން އަދި ރަސްމީކޮށް ހާމަކޮށްފައިނުވި ނަމަވެސް، ފޮޓޯތަކާއި ވީޑިއޯތަކުން ފެންނަ ގޮތުގައި، ތުރުކީން ގެނެސްފައިވަނީ "ބައިރަކްތާރު ޓީބީ2" ޑްރޯން އެކެވެ.

އެމެރިކާއިން މިލިޓަރީ އާލަތްތައް ތުރުކީ އަށް ފޯރުކޮށްދިނުން ހުއްޓާލުމާ ގުޅިގެން، ތުރުކީގެ ޑްރޯން ކުންފުނި، ބައިކާރު އިން އުފެއްދި ޑްރޯންތަކުގެ ތެރޭގައި "ބައިރަކްތާރު ޓީބީ2" ޑްރޯންގެ އުދުހުންތައް ފަށާފައިވަނީ 2014 ވަނަ އަހަރުގެ ތެރޭގަ އެވެ.

އެންމެ ޒަމާނީ އަސްކަރީ އަދި މުއާސަލާތީ އާލަތްތަކާ އެކު އުފައްދާފައިވާ މި ޑްރޯން އަކީ 27 ގަޑިއިރަށް ވުރެ ގިނަ އިރު 25،000 އަށް ވުރެ ގިނަ ފޫޓު މަތިން އުދުއްސޭ އުޅަނދެކެވެ.

ދިގުމިނުގައި ހަ މީޓަރު، ފިޔަގަނޑުގައި 12 މީޓަރު ހުންނަ ގާތްގަނޑަކަށް 700 ކިލޯގެ ފުލީ އޮޓޮމޭޓަޑް މި އުޅަނދުގައި މުވާސަލާތީ ހިދުމަތްތަކުގެ ރޭންޖު 300 ކިލޯމީޓަރާ ހަމައަށް ހުރެ އެވެ. މި ޑްރޯން އަކީ 70 އާއި 120 ނޮޓުގެ ސްޕީޑުގައި ދުއްވުމުގެ ގާބިލުކަން ދީފައިވާ ޑްރޯން އެކެވެ.

ބައިކާރުން ދުނިޔޭގެ ބޭރުގެ ގިނަ ގައުމުތަކަށް ސަޕްލައިކޮށްފައިވާ ޑްރޯންގައި ލޭޒާ ގައިޑަޑް މިސައިލް ހަރުކުރުމުގެ ގާބިލުކަން ވެސް ވަނީ ގާއިމުކޮށްފަ އެވެ. މިގޮތުން، މި ޑްރޯންގެ ޕޭލޯޑް ކެޕޭސިޓީއަކީ 150 ކިލޯ އެވެ.

ސާޖިކަލް ޕްރިޒިޝަން ސްޓްރައިކްތައް ހެދުމުގެ ގާބިލުކަން ލިބިފައިވާ މި ޑްރޯން އޮޕަރޭޓް ކުރުމަށް އެމްއެންޑީއެފްގެ ހާއްސަ ޓީމެއް މާފަރަށް ވަނީ ގޮސްފަ އެވެ.

އެނގިފައިވާ ގޮތުގައި އެމްއެންޑީއެފްގެ ޓީމެއް ވަނީ ތުރުކީ އަށް ގޮސް މި ޑްރޯންތައް އޮޕަރޭޓު ކުރުމުގެ ތަމްރީންތައް ވެސް ހަދައިފަ އެވެ.

ރައީސް ޑރ. މުހައްމަދު މުއިއްޒު ވަނީ ރާއްޖޭގެ ކަނޑުގެ ސަރަހައްދު 24 ގަޑިއިރު އަމިއްލައަށް ބެލެހެއްޓުމުގެ ގާބިލްކަން މި ސަރުކާރުން ގާއިމްކުރާނެ ކަމަށް ވިދާޅުވެފަ އެވެ. މިދިޔަ ހޮނިހިރު ދުވަހު ރ. މީދޫގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ ރާއްޖޭގެ ކަނޑުގެ ސަރަހައްދު 24 ގަޑިއިރު ބެލެއްޓުމުގެ ނިޒާމު މި މަހު ހަމަޖެހި، އެ މަސައްކަތް ފަށާނެ ކަމަށެވެ.

ރައީސް މުއިއްޒު ބޭނުންފުޅުވަނީ ރާއްޖޭގެ އިގުތިސާދީ ސަރަހައްދު ބެލެހެއްޓުން ދިވެހި ސިފައިންގެ އަތްމައްޗަށް ދޫކޮށްލައި، އެކަމުގައި ބޭރުގެ މީހުންގެ ބައިވެރިވުން ހުއްޓާލައްވާށެވެ. ރާއްޖޭގެ އިގުތިސާދީ ސަރަހައްދު މިހާތަނަށް ބަލަހައްޓަމުން އައީ އިންޑިއާގެ ސިފައިންގެ އެހީތެރިކަމާ އެކު އެވެ. ރާއްޖޭގެ އުތުރުގައި ބަހައްޓާފައިވާ ރާޑަރު ސިސްޓަމްގެ ކޮންޓްރޯލް ވެސް އޮންނަނީ އިންޑިއާގެ އަތުގަ އެވެ.

ނަމަވެސް ރާއްޖޭގައި ތިބި އިންޑިއާގެ ސިފައިން އަނބުރާ ފޮނުވާލަން ރައީސް މުއިއްޒު ނިންމެވުމާ އެކު، ދެ ގައުމުގެ ގުޅުމަށް ވަނީ ކޮންމެވެސް ވަރެއްގެ ބުރުލެއް އަރައިފަ އެވެ. ރާއްޖޭގައި ތިބި އިންޑިއާ ސިފައިންގެ ތެރެއިން ފުރަތަމަ ގުރޫޕް މިހާރު ވަނީ ފުރައިފަ އެވެ. އެއީ ހެލިކޮޕްޓަރުގެ ބޭނުމަށް އައްޑޫ ގަމުގައި ގާއިމުވެ ތިބި އިންޑިއާގެ ސިފައިންނެވެ. ދެ ސަރުކާރުން އެއްބަސްވެފައި ވަނީ ރާއްޖޭގައި ތިބި އިންޑިއާގެ ހުރިހާ ސިފައިން މި އަހަރުގެ މޭ 10 ގެ ނިޔަލަށް ބޭލުމަށެވެ.