ޖިންސީ ގޯނާކުރާ މީހުންނަށް މާފުދިނުމާއި ލުއިދިނުން ބަލައިނުގަނެވޭ: ރައީސް

ކުޑަކުދިންނަށް ޖިންސީ ގޯނާކުރާ ކަމުގެ ތުހުމަތުކުރެވޭ މީހުންނާއި އެފަދަ މައްސަލަތަކުގައި ހުކުމްކޮށްފައިވާ މީހުންނަށް މައާފުދިނުމާއި ލުއި ދިނުމަކީ އެއްގޮތަކަށް ވެސް ބަލައިގަނެވޭ ކަމެއް ނޫން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ތ. ވޭމަންޑޫގައި އަމިއްލަ ކާފަ ދަރިފުޅަށް ޖިންސީ ގޯނާކުރި ކަމުގެ ތުހުމަތުގައި މިދިޔަ އަހަރު ހައްޔަރުކުރި މީހަކު ދޫކޮށްލި މައްސަލައެއް ބޮޑުވެފައިވަނިކޮށް ރައީސް އެކްސްގައި ކުރެއްވި ޕޯސްޓުގައި ވަނީ އެކަމުގެ ކަންބޮޑުވުންފާޅުކުރައްވައިފަ އެވެ.

ރައީސް ވިދާޅުވީ ޖިންސީ ގޯނާގެ ތުހުމަތުގައި ހައްޔަރުކުރާ މީހުން ދޫކޮށްލުމަށް ކޯޓުތަކުން ނިންމާ ނިންމުންތައް ލަސްނުކޮށް އިސްތިއުނާފު ކުރުމަށް ސަރުކާރުން ޕްރޮސެކިއުޓާ ޖެނަރަލަށް ދަންނަވާފައިވާ ކަމަށެވެ.

"ކުޑަކުދިިންނަށް ޖިންސީ ގޯނާކުރިކަމުގެ ތުހުމަތުގައި ހައްޔަރުކޮށް، ނުވަތަ ހުކުމް ކޮށްފައިވާ މީހުންނަށް މައާފުދިނުން، ނުވަތަ ލުއިދީ ދޫކޮށްލުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން. މިގޮތަށް ނިންމާ ނިންމުންތައް ލަސްނުކޮށް އިސްތިޢުނާފު ކުރުމަށް ސަރުކާރުން ޕީޖީގައި މިދަނީ ދަންނަވަމުން،" ރައީސް ވިދާޅުވި އެވެ.

ރައީސް ވަނީ އެފަދަ ނުބައި ފަރާތްތަކުގެ ވަކިތަކުން ރާއްޖެ ސަލާމަތްކުރުމަށް މުޅި މުޖުތަމައު އެކުގައި މަސައްކަތް ކުރެއްވުމަށް ވެސް އިލްތިމާސްކުރައްވައިފަ އެވެ.

ވަކި މައްސަލައަކަށް އިޝާރާތް ނުކުރައްވާ ރައީސް އެގޮތަށް ވިދާޅުވިއިރު ވޭމަންޑޫގައި 13 އަހަރުގެ ކާފަ ދަރިފުޅާ ބެހުނު ކަމަށް ބުނާ މައްސަލާގައި މިދިޔަ އަހަރުގެ އޮގަސްޓު މަހުގެ ތެރޭގައި ހައްޔަރުކުރި، 69 އަހަރުގެ ކާފަ ޝަރުތުތަކަކާ އެކު ވޭމަންޑޫ މެޖިސްޓްރޭޓް ކޯޓުން ވަނީ ދޫކޮށްލައިފަ އެވެ.

އޭނާ ދޫކޮށްލިއިރު އޭނާގެ މައްޗަށް ކުރާ ޖިންސީ ގޯނާގެ ދައުވާގެ ޝަރީއަތް ވެސް ދިޔައީ ކޯޓުގައި ހިނގަމުންނެވެ.

އެ މައްސަލާގައި ޕީޖީ އޮފީހުން ކުރިން، "މިހާރު" އަށް ބުނީ މީހާ ބަންދުން ދޫކޮށްލި މައްސަލަ އިސްތިއުނާފު ކުރަން މާދަމާ ހުށަހަޅާނެ ކަމަށެވެ.

ރަށުގެ ގިނަ ބަޔަކު ވަނީ ސޯޝަލް މީޑިއާގައި ވެސް ނުރުހުން ފާޅުކޮށްފަ އެެވެ. އެ ކުއްޖާއަށް ޖިންސީ ގޯނާ ކުރި ކަމަށް ތުހުމަތު ކުރެވެނީ ދިރިއުޅޭ ގޭގެ ތެރޭގަ އެވެ. ފުރަތަމަ ޓީޗަރަކާ އެކަން ހިއްސާކޮށް، ފަޅާއެރުމުން، ތަކުރާރުކޮށް ކާފަ ޖިންސީގޯނާކުރި ކަން މަންމައަށް ވެސް ކިޔައިދީފައިވާ ކަމަށް ވެ އެވެ. ފުލުހަށް އެ މައްސަލަ ރިޕޯޓުކުރީ މަންމަ އެވެ.