ނަޝީދު، ރަސްގެފާނު ޗާލްސްއާ ބައްދަލުކުރައްވައިފި

ސިޔާސީ ކަންކަމުން މިހާރު ދުރުގައި ހުންނެވި ކުރީގެ ރައީސް އަދި ރައްޔިތުންގެ މަޖިލިހުގެ ކުރީގެ ރައީސް މުހައްމަދު ނަޝީދު އިނގިރޭސިވިލާތުގެ ރަސްގެފާނު ޗާލްސްއާ އިއްޔެ ބައްދަލުކުރައްވައިފި އެވެ.

ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ރަސްގެފާނު ޗާލްސްއާ ބައްދަލުކުރެއްވުމުގެ ފުރުސަތު އިއްޔެ އެމަނިކުފާނަށް ލިބިވަޑައިގެންނެވި ކަމަށެވެ.

ތަރައްގީވަމުން އަންނަ ގައުމުތަކުގައި ތިމާވެއްޓާއި ސާފު ހަކަތައާ ބެހޭ މަޝްރޫއުތައް ހިންގުމަށް ފަންޑު ހޯދުމުގެ ބޭނުންތެރިކަން ހިމެނޭ ގޮތަށް ވަރަށް ގިނަ ކަންބޮޑުވުންތަކާ ގުޅޭ ގޮތުން އެ ބައްދަލުކުރެއްވުމުގައި މަޝްވަރާކުރެއްވި ކަމަށް ނަޝީދު ވިދާޅުވި އެވެ.

ނަޝީދު ވަނީ އޭނާގެ ދިރިއުޅުއްވުން ވަގުތީ ގޮތުން ގާނާ އަށް ބަދަލުކުރައްވައިފަ އެވެ. ރާއްޖޭގެ ސިޔާސީ މައިދާނުގައި އެންމެ މަގުބޫލު އެއް ޝަހުސިއްޔަތު ކަމަށްވާ ނަޝީދު ގާނާ އަށް ވަޑައިގަތީ ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމަށެވެ. އޭނާ ރަސްގެފާނު ޗާލްސްއާ ބައްދަލުކުރެއްވީ ވެސް އެ މަގާމުގެ ހައިސިއްޔަތުންނެވެ.

ސީވީއެފްގެ މިހާރުގެ ރިޔާސަތަކީ ގާނާ އެވެ.

ރާއްޖޭގެ ސިޔާސީ މައިދާނުން ނަޝީދު ދުރަށް ވަޑައިގަންނަވަން ނިންމެވީ ސީވީއެފްގެ މަގާމު ގާނާގެ ރައީސް އެ މަނިކުފާނަށް ހުށަހެޅުއްވުމާ އެކު އެވެ. ސީވީއެފްގެ އެ ކޮންފަރެންސްއަށް ނަޝީދު ވަޑައިގެންނެވީ މަޖިލީހުގެ ރައީސް ކަމުން އިސްތިއުފާ ދެއްވުމަށް ފަހު އެވެ. އެކަމަކުު އެމަނިކުފާނު އަދިވެސް ހުންނެވީ މައްޗަންގޮޅި މެދު ދާއިރާގެ މަޖިލިސް މެމްބަރުގެ ގޮތުގަ އެވެ.