ރާއްޖެ ވަޑައިގަތުމަށް ރަސްގެފާނު ޗާލްސްއަށް ދައުވަތު ދެއްވައިފި

ރާއްޖެ ވަޑައިގަތުމަށް އިނގިރޭސިވިލާތުގެ ރަސްގެފާނު ޗާލްސްއަށް ރާއްޖޭގެ ނައިބު ރައީސް ހުސެއިން މުހައްމަދު ލަތީފް މިއަދު ދައުވަތު ދެއްވައިފި އެވެ.

ކޮމަންވެލްތު ހެޑްސް އޮފް ގަވާމަންޓް މީޓިންގައި (ޗޮގަމް 2024) ބައިވެރިވެވަޑައިގަތުމަށް ސަމޯއާ މިހާރު ކުރައްވާ ދަތުރުފުޅުގައި، ރަސްގެފާނު ޗާލްސްއާ އެކު ނަންގަވާފައިވާ ފޮޓޯއެއް ނައިބު ރައީސް ވަނީ އެކްސްގައި ހިއްސާ ކުރައްވައިފަ އެވެ. ކޮމަންވެލްތުގެ އެންމެ އިސްވެރިއަކީ ވެސް ރަސްގެފާނު ޗާލްސް އެވެ.

އެ ޕޯސްޓުގައި ނައިބު ރައީސް ވިދާޅުވީ ރަސްގެފާނު ޗާލްސް ރާއްޖެ ވަޑައިގަތުމަށް ރައީސް ޑރ. މުހައްމަދު މުއިއްޒުގެ ފަރާތްޕުޅުން އެމަނިކުފާނަށް ދައުވަތު އަރުވާފައިވާ ކަމަށެވެ.

ރަސްގެފާނު ޗާލްސްގެ މަންމާފުޅު އަދި އިނގިރޭސިވިލާތުގެ ކުރީގެ ރާނީ އެލިޒަބަތު ދެވަނަ ވަނީ މީގެ 52 އަހަރު ކުރިން، 1972 ވަނަ އަހަރު ރައީސް އިބްރާހިމް ނާސިރުގެ ވެރިކަމުގައި ރާއްޖެ އަށް ރަސްމީ ދަތުރުފުޅެއް ކުރައްވައިފަ އެވެ. އެއީ އިނގިރޭސި ރަސްކަލަކު ރާއްޖެއަށް ކުރެއްވި ހަމައެކަނި ދަތުރުފުޅެވެ.

ކޮންމެ ދެ އަހަރަކުން އެއް އަހަރު އޮންނަ ކޮމަންވެލްތުގެ މި އަހަރުގެ ސަމިޓް ކުރިއަށް ދަނީ ސަމޯއާގެ ވެރިރަށް އަޕިއާގަ އެވެ.