ފުލުހެއްގެ ގައިގައި ޖެހުނު ޓެކްސީ ގަވައިދާ ހިލާފްވި ކަމަކަށް ނުބެލެވޭ، ކޯޓުން ޑްރައިވަރު ދޫކޮށްލައިފި

ވެލާނާ އިންޓަނޭޝަނަލް އެއާޕޯޓުން ބްރިޖަށް އަރަން ދިޔަ ޓެކްސީއަކުން ޓްރެފިކް ފުލުހެއްގެ ގައިގައި ޖެހުނު މައްސަލައަށް ބަލާއިރު އެ ޓެކްސީ ގަވައިދާ ހިލާފުވި ކަމަށް ނުބެލެވޭ ކަމަށް ކޯޓުން ބުނެފި އެވެ.

މިދިޔަ ހޮނިހިރު ދުވަހުގެ ހަވީރު ހިނގި އެ އެކްސިޑެންޓުގައި ޓެކްސީ ކޮންޓްރޯލް ނުކުރެވި، ގޮސް ޖެހުނީ މަގުގެ މެދުގައި ހުރި ފުލުހެއްގެ ގައިގަ އެވެ. ޖެހުމާ އެކު އޭނާ ވިއްސައިގެން ގޮސް ވެއްޓޭ މަންޒަރު އާންމުވި ވީޑިއޯއަކުން ފެނެ އެވެ.

އެ އެކްސިޑެންޓުވުމުން 37 އަހަރުގެ ޑްރައިވަރު ހައްޔަރުކޮށް އިއްޔެ ބަންދުގެ މުއްދަތު އިތުރުކުރަން ކޯޓަށް ގެންދިއުމުން ބުނީ އެއީ ގަސްތުގައި ކުރި ކަމެއް ނޫން ކަމަށެވެ. ޖެހުމާއި ޖަހާފާނެކަމުގެ ބިރު ދެއްކުމާއި އެހެނިހެން ބިރު ދެއްކުމުގެ ކުށުގެ ތުހުމަތުކޮށް ބަންދުގެ މުއްދަތު އިތުރުކޮށްދޭން ފުލުހުން އެދުނަސް ކޯޓުން ވަނީ އެ މީހާ ޝަރުތުކޮށް ދޫކޮށްލައިފަ އެވެ.

ކޯޓު އަމުރުގައިވާ ގޮތުން އެ ހާދިސާގެ ރިޕޯޓަށް ބަލާއިރު ޓެކްސީ ދުއްވާފައި ވަނީ ގަވާއިދާ ހިލާފަށް ކަމަށް ނުބެލެވޭ ކަމަށެވެ.

ކުށުގެ އެއްވެސް ރެކޯޑެއް މީގެ ކުރިން ނެތް އެ ޑްރައިވަރު ކޯޓުގައި ބުނީ އޭނާގެ ކާރުން ޕޮލިސް މީހާގެ ގައިގައި ޖެހުނު ކަމަށް އެއްބަސްވާ ކަމަށާއި އެ އެކްސިޑެންޓު ހިނގުމާ އެކު ވަގުތުން ކާރު ހުއްޓައި ފުލުސް މީހާގެ ގާތަށް ގޮސް މާފަށް އެދިފައިވާނެ ކަމަށެވެ. ފުލުހުންގެ ތަހުގީގަށް އެއްބާރުލުން ދޭނެ ކަމަށް ވެސް އޭނާ ބުނެފައިވެ އެވެ.

މި މައްސަލައިގައި ޑްރައިވަރުގެ ލައިސަންސް ހިފަހައްޓައި ކާރު ވެސް ޓޯކޮށްފައިވާ ކަމަށް ކޯޓުގައި ފުލުހުން ބުންޏެވެ.

ފުލުހުން ބުނި ގޮތުގައި އެކްސިޑެންޓުވި ފުލުސް މީހާގެ އަތުގެ މުލައްދަނޑިއާއި އަތްތިލައިން ހަން މަށައިގެން ދިއުން ފިޔަވައި އަނިޔާއެއް ނުވެ އެވެ.

އާންމުވި ވީޑިއޯ އިން ފެންނަ ގޮތުގައި ބްރިޖަށް އަރަން ދިޔަ އެ ޓެކްސީގެ މިސްރާބު ބަދަލުކޮށްލަނީ ހުޅުމާލެ ހައިވޭ ކޮޅުން ސައިރެން އަޅަމުން ދިޔަ ފުލުހުންގެ ކާރަކުން ނެއްޓުމަށެވެ. އެކަމަކު އެ ވަގުތު ކާރު ކޮންޓްރޯލް ނުކުރެވި ގޮސް ޖެހުނީ ފުލުސް މީހާގެ ގައިގަ އެވެ.