ޔާމީންގެ ޝަރީއަތުގެ އިސްތިއުނާފު ލަސްވާ މައްސަލަ އަސްލަމް ޖޭއެސްސީ އަށް ހުށަހަޅަނީ

މަނީ ލޯންޑަރިން އާއި ރިޝްވަތުގެ ކުށުގައި 11 އަހަރުގެ ޖަލު ހުކުމެއް އައިސްފައިވާ ކުރީގެ ރައީސް އަބްދުﷲ ޔާމީންގެ އިސްތިއުނާފުގެ މައްސަލަ ކުރިއަށް ނުގެންގޮސް ލަސްވާ ކަމަށް ބުނެ، އެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ )އަށް ހުށަހަޅުއްވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު އަސްލަމް ރޭ ވިދާޅުވެއްޖެ އެވެ.

މި މަހުގެ 21 ގައި ބާއްވާ ރައްޔިތުންގެ މަޖިލީހުގެ އިންތިހާބުގެ ކެމްޕެއިނަށް އައްޑޫގައި ބޭއްވި ކެމްޕެއިނު ޖަލްސާއެއްގައި އަސްލަމް ވަނީ ޔާމީން އިސްވެ އުފައްދަވާ ޕީޕަލްސް ނެޝަނަލް ފްރޮންޓު (ޕީއެންއެފް) އުފެއްދުމުގެ ޖަލްސާ ބާއްވަން ކުރި މަސައްކަތަށް މި ސަރުކާރުން ހުރަސް އެޅި ކަމަށް ވިދާޅުވެ އެކަން ކުށްވެރި ކުރައްވައިފަ އެވެ.

އަސްލަމް ވިދާޅުވީ، ކުރީގެ ރައީސުންނަށް ދޭން ޖެހޭ އިހުތިރާމާއި ގަދަރު ދޭން ޖެހޭ ކަމަށާއި ޔާމީނަށް އިންސާފު ނުލިބުން ބަލައިނުގަނެވޭ ކަމަށެވެ.

ރައްޔިތުންގެ މަޖިލީހުގެ ރައީސްގެ ހައިސިއްތުން ޖޭއެސްސީގައި އިންނަވާ އަސްލަމް ވިދާޅުވީ، ޔާމީންގެ އިސްތިއުނާފުގެ އަޑުއެހުމެއް ނުބޭއްވި މިހާ ދިގުލައިގެން ދިއުމުން މި ސަރުކާރުން އެ މައްސަލައިގެ ތެރެއަށް އަތްބާނައި، ނުފޫޒު ފޯރުވަމުންދާ ކަން ހާމަވާ ކަމަށެވެ.

އަސްލަމް ވިދާޅުވީ، ޔާމީންގެ އިސްތިއުނާފުގެ މައްސަލަ އޭނާ ޖޭއެސްސީ އަށް ހުށަހަޅުއްވައިގެން ކުރިއަށް ގެންދަވާނެ ކަމަށެވެ.

"ރައްޔިތުންގެ މަޖިލީހުގެ ރައީސްގެ ހައިސިއްޔަތުން ޖޭއެސްސީގެ މެންބަރެއްގެ ގޮތުގަ އަޅުގަނޑު އިންނާތީ، މާދަމާ އެ [ޔާމީންގެ] މައްސަލަ އަޅުގަނޑު ލާނަމޭ [ޖޭއެސްސީއަށް]، އެ މައްސަލަ ބަލުވާނަމޭ،" އަސްލަމް ވިދާޅުވި އެވެ.

ވ. އާރަށް ކުއްޔަށް ދިނުމުގައި ރިޝްވަތު ހުށަހެޅުމާއި މަނީ ލޯންޑަރިން ހިންގި މައްސަލައިގެ ހުކުމުގެ އިސްތިއުނާފު ޝަރީއަތް މިހާރު ހައި ކޯޓުގައި ވަނީ ހުކުމާ ހަމައަށް ގޮސްފަ އެވެ. އެ މައްސަލަ އިސްތިއުނާފު ކުރެއްވީ ޔާމީންގެ ފަރާތުންނެވެ.