މޫސުން ގޯސްވާނެ ކަމަށް ލަފާކޮށް ރާއްޖޭގެ ބޮޑު ބަޔަކަށް ރީނދޫ އެލާޓް

މޫސުން ގޯސްވާނެ ކަމަށް ލަފާކޮށް، ރާއްޖޭގެ ބޮޑު ބަޔަކަށް މިރޭ ރީނދޫ އެލާޓް ނެރެފި އެވެ.

މެޓް އޮފީހުން ބުނީ މިރޭ 12:00 އާ ހަމައަށް ބ. އަތޮޅުން ފެށިގެން އައްޑު އަތޮޅުގެ ރަށްތަކަށް މޫސުން ގޯސްވާނެ ކަމަށެވެ.

އެ ރަށްތަކަށް ބޯކޮށް ވާރޭވެހި، ގަޑިއަކު 25 މޭލާއި 30 މޭލާ ދެމެދުގެ ބާރު މިނުގައި ވައި ޖެހި، ވިލާގަނޑުގައި ގަޑިއަކު 50 މޭލަށް ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭ ކަމަށް މޫސުމާ ބެހޭ ގައުމީ އިދާރާއިން ބުންޏެވެ.

ރާއްޖޭގެ ބޮޑު ބަޔަކަށް މިރޭ ރީނދޫ އެލާޓް ނެރުނީ، ހުޅަނގު މޫސުމުގެ ބާރުގަދަވެ ކުރިއަށް އޮތް ދުވަސްތަކުގައި ރާއްޖޭގެ ހުރިހާ ހިސާބަކަށް ވައިގަދަވެ، ކަނޑުތައް ވެސް ގަދަވެ އަދި ވިއްސާރަކުރާނެ ކަމަށް މިދިޔަ ބުދަ ދުވަހު މެޓް އޮފީހުން ބުނެފައިވަނިކޮށެވެ.

ރެއިން ފެށިގެން ފަސް ދުވަހަށް ރާއްޖޭގެ ހުރިހާ ހިސާބަކަށް އާންމުކޮށް ވައިބާރުވެ، ކަނޑުތައް ގަދަވެ އަދި ވިއްސާރަކުރާނެ ކަމަށް ލަފާކުރެވޭ ކަމަށް ވެސް އެ އިދާރާއިން ބުންޏެވެ.