ހަށިގަނޑަށް އެންމެ ބަލަން ޖެހޭ އުމުރަށް އެޅީތަ؟

އުމުރުން 30 އަހަރަށް ވުރެ މަތިވުމުން، މީހާ ކަންނެތްވެ، ހަށިގަނޑަށް ދޭންވާ ސަމާލުކަން ކުޑަ ކޮށްލެވެ އެވެ. އެކަމަކު އެ އުމުރަށް އެޅުމަކީ ހަށިގަނޑަށް އެންމެ ބަލަން ޖެހޭ އުމުރެ އެވެ. ފަރުވާ ކުޑަކޮށްލެވިއްޖެ ނަމަ ސިއްހީ ގިނަ މައްސަލަތަކެއް ކުރިމަތި ވެދާނެ އެވެ.

އެ އުމުރުގައި، ހަށިގަނޑަށް ސަމާލުކަން ދޭން ޖެހޭ ގޮތް އެންމެ ގިނައިން ކިޔައިދޭ އެކަކީ، ފިޓްނަސް އިންސްޓްރަކްޓަރު ފާޒިލް އިސްމާއިލް (ފިޓް ފާޒިލް) އެވެ. ސޯޝަލް މީޑިއާގެ އެކި ޕްލެޓްފޯމު ތަކުގައި ފިޓްނަސް އާ ބެހޭ ގިނަ މައުލޫމާތު އޭނާ ހިއްސާކުރެ އެވެ.

ފާޒިލް ބުނި ގޮތުގައި އުމުރުން 30 އަހަރުވުމުން ހަށިގަނޑަށް ދޭން ޖެހޭ ސަމާލުކަން އިތުރު ކުރަންޖެހެ އެވެ. ގަވާއިދުން ކަސްރަތު ކުރުމާއި، ވޯކްއައުޓްތަކާއި ޔޯގާ ނުވަތަ ސްޓްރެޗިން ފަދަ ހަރަކާތްތަކަށް އިސްކަން ދިނުން ވަރަށް މުހިންމު ކަމަށް އޭނާ ބުންޏެވެ.

އަދި ރެޖިމަންޓެއް ފެށުމުގެ ކުރިން ސިއްހީ މާހިރެއްގެ ލަފާ ހޯދައި މަޝްވަރާ ކުރުމަކީ އެފަދަ ކަމަކަށް ކުރިމަތިލާއިރު، ފައިދާ ކަށަވަރުކޮށްދޭނެ ކަމެއް ކަމަށެވެ. ހާއްސަކޮށް ސިއްހީ މައްސަލަ އެއް ހުންނަ މީހެއް ނަމަ މިފަދަ ކަންކަމަށް ސަމާލުކަން ދޭން ޖެހޭނެ ކަމަށް ފާޒިލް ބުންޏެވެ.

ފާޒިލް ބުނި ގޮތުގައި ކަސްރަތުގެ ރޫޓިންތައް އެއްގޮތަކަށް ބެހެއްޓުމަކީ ވެސް ވަރަށް މުހިއްމު ކަމެކެވެ. އަދި ބަރު އެއްޗިހި އުފުލުމަށް ވުރެ މުހިއްމީ އެއްކަމަކަށް ފޯކަސްވެގެން ގަވާއިދުން އެކަމެއް ކުރެމެވެ.

ދުޅަ ހެޔޮ ސިއްހަތެއްގައި ހުރުމަށް ނިއުޓްރިޝަން އަކީ ވަރަށް މުހިއްމު މާއްދާއެކެވެ. އޭނާ ބާރުއަޅަނީ ފައިދާ ހުރި ކާނާ ކެއުމަށް އިސްކަން ދިނުމަށެވެ.

ދިވެހިންގެ ތެރޭގައި ކުޅިކޮށް ކެއުމަކީ ވަރަށް އާންމުކަމެކެވެ. އަދި މިފަދަ ކަންކަމުން ދުރުވާން މަސައްކަތް ކުރަން ޖެހޭކަން ވެސް އޭނާ ބުންޏެވެ. ކުޅިކޮށް ކެއުމުން ހަޖަމު ކުރަން އުނދަގޫ ވާނެތީ އެވެ.

ފިޓްނެސްގައި ހައިޑްރޭޝަން އަކީ ވަރަށް މުހިއްމު ކަމެކެވެ. ގިނައިން ފެން ބުއިމަށް ހަނދާން ކުރަން ވާނެ ކަމަށާއި ހާއްސަކޮށް ވޯކައުޓު ކުރަމުންދާ ގަޑި ތަކުގައި ގިނައިން ފެން ބޯންޖެހޭނެ ކަމަށް އޭނާ ބުންޏެވެ.

ގޭގައި ހުންނައިރު، ބޮޑީ ވެއިޓް ކަސްރަތު ވެސް މުހިއްމެވެ.

ފާޒިލް ބުނީ ޖިމަކަށްދާ ނަމަ، ރެޒިސްޓެންޓް ޓްރެއިނިން އެއް އިތުރު ކޮށްލަން ވިސްނާލަން ޖެހޭނެ ކަމަށެވެ.

އަދި ފިޓްނެސްގައި މުހިއްމީ އަވަހަށް ނަތީޖާ ފެނުމެއް ނޫނެވެ. މުހިއްމީ ކެތްތެރިކަމާ އެކު މަޑުމަޑުން ކުރިއަށް ގެންދިއުމެވެ. ހަށިގަނޑަށް އަންނަ ކުރިއެރުން ލަސްވެދާނެ އެވެ. ނަމަވެސް ހިތްވަރު އެލުވައި ނުލައި މަސައްކަތް ކުރުމުން ނަތީޖާ ފެންނާނެ ކަމުގެ ޔަގީންކަން ފާޒިލް ދެ އެވެ.