ލ. ކައްދޫ ބޭރުގައި އޮތް ޔޮޓަކުން ޑައިވްކުރަން ފޭބި ޓޫރިސްޓަކު މަރުވެފައި އޮއްވައި ފެނިއްޖެ

ލ. ކައްދޫ ބޭރުގައި އޮތް ޔޮޓަކުން ފްރީ ޑައިވް ކުރުމަށް މިއަދު މެންދުރު ފޭބި ޓޫރިސްޓަކު މަރުވެފައި އޮއްވައި ފެނިއްޖެ އެވެ.

އެ މީހާ މަރުވެފައި އޮއްވައި ފެނުނީ ސިކްސް ސެންސަސް ރިސޯޓުގެ ޑައިވަރުންނާ ގުޅިގެން އޭނާ ހޯދަމުން އަންނަނިކޮށް، މިރޭ ހަތެއް ޖަހާކަން ހާއިރު ކަމަށް އެމްއެންޑީއެފުން ބުންޏެވެ. ނަމަވެސް އެ މީހާ ފެނުނީ ކިހާ ހިސާބަކުން ކަމެއް އެމްއެންޑީއެފުން ނުބުނެ އެވެ.

އެމްއެންޑީއެފުން ބުނީ ކައްދޫގެ ހުޅަނގު އުތުރުން ފަސް މޭލުގައި ބޭރުގައި އޮތް ޔޮޓަކުން ޑައިވްކުރަން ފޭބި މީހާ ގެއްލިގެން މެރިޓައިމް ރެސްކިއު ކޯޑިނޭޝަން ސެންޓަރު (އެމްއާރުސީ) އަށް ރިޕޯޓްކޮށްފައި ވަނީ މިއަދު މެންދުރުފަހު 3:30ގައި ކަމަށެވެ. އެއީ ކޮން ގައުމެއްގެ މީހެއް ކަމެއް އަދި ނޭނގެ އެވެ.

"މި ރިޕޯޓް ލިބުމާއެކު ކޯސްޓްގާޑު ސްކޮޑްރަންގެ ޑައިވަރުންގެ ޓީމަކާއެކު އެ ސަރަހައްދަށް ގޮސް އެ މީހާ ހޯދުމުގެ މަސައްކަތް ވަނީ ފަށާފައި،" އެމްއެންޑީއެފުން ބުންޏެވެ. ހަ މީހުންނާއެކު ދަތުރުކުރި ޔޮޓުން ފްރީޑައިވް ކުރުމަށް، ޓޫރިސްޓް މީހާ މޫދަށް ފައިބައިފައި ވަނީ މިއަދު މެންދުރު ފަހު ގާތްގަނޑަކަށް 2:30ގައި ކަމަށް އެމްއެންޑީއެފުން ބުނެ އެވެ.