27 އަހަރަށް ފަހު ރައީސް މުއިއްޒު ސީއެޗްއެސްއީ އަށް، ލިބުނީ ސަޕްރައިޒެއް!

ރައީސް ޑރ. މުހައްމަދު މުއިއްޒު، އެ މަނިކުފާނު ސާނަވީ ތައުލީމު ފުރިހަމަ ކުރެއްވި ސީއެޗްއެސްއީގެ އަހަރީ ދުވަސް ފާހަގަކުރުމަށް އެ ސްކޫލަށް މިއަދު ވަޑައިގަތުމުން ހޫނު މަރުހަބާއެއް ކިޔައިފި އެވެ.

އެ ސްކޫލުގެ 45 ވަނަ އަހަރީ ދުވަސް ފާހަގަކުރުމަށް ހެނދުނު ވަނީ ހާއްސަ އެސެމްބްލީއެއް ބާއްވައިފަ އެވެ. ހުޅުމާލޭގައި މިހާރު ހިންގާ ސީއެޗްއެސްއީގެ އެސެމްބްލީގައި އެ މަނިކުފާނު ބައިވެރިވެވަޑައިގަތީ އެ ސްކޫލުގެ އިސް ދަރިވަރެއްގެ ހައިސިއްޔަތުންނެވެ.

ރައީސް ސީއެޗްއެސްއީގައި ކިޔަވާ ވިދާޅުވީ 1995 އިން 1997 އަށެވެ. މަތީ ސާނަވީ އިމްތިހާނުގައި އެ މަނިކުފާނު ވަނީ ގައުމީ ގަދަ 10 ގައި ހިމެނިފަ އެވެ.

ސީއެޗްއެސްއީގެ އަހަރީ ދުވަހުގެ ހާއްސަ އެސެމްބްލީގައި ބައިވެރިވެވަޑައިގަތުމަށް ރައީސް މުއިއްޒު އެ ސްކޫލަށް ވަޑައިގަތުމުން، މެނޭޖްމަންޓާއި ކުދިންގެ ފަރާތުން ރަތްދޫލައިގެ ހޫނު މަރުހަބާއެއް ކިޔެވެ.

އޭގެ ތެރެއިން އެންމެ ބޮޑު ސަޕްރައިޒެއް ރައީސަށް ލިބިވަޑައިގަތީ، އެ މަނިކުފާނު ސީއެޗްއެސްއީގައި ކިޔަވާ ވިދާޅުވިއިރު ބޭނުން ކުރެއްވި އިންޑެކްސް ނަމްބަރާ އެކު، ކުދިން ހިފަހައްޓައިގެން ތިބި ބެނާއަކުންނެވެ. އެ ބެނާގައި ލިޔެފައި ވަނީ "ސީއެޗްއެސްއީ އަށް އަނެއްކާ ވެސް މަރުހަބާ" އެވެ.

ސީއެޗްއެސްއީގެ ޕްރިންސިޕަލް ޒުހުދުލް ހައްގު (ޒުހުދު) ވިދާޅުވީ އެއީ ރައީސް މުއިއްޒަށް ސަޕްރައިޒެއް ދިނުމަށް ސްކޫލުން ރޭވި ކަމެއް ކަމަށެވެ.

"ވަރަށް ސަޕްރައިޒް ވެފައި ހުންނެވީ އެ ފެނުނީމާ. އެއްވެސް ވަރަކަށް އެކްސްޕެކްޓެއް ނުކުރާނެ ކަން ނޭނގޭ އެ ކަހަލަ ކަމެއް ކުރައްވަފާނެ ކަމަކަށް،" ޕްރިންސިޕަލް

ރައީސްގެ އަރިހުގައި ހުންނެވި މިހާރުގެ އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވެސް އޭލެވެލް ކިޔަވައި ވިދާޅުވީ އެ ސްކޫލުންނެވެ.

ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ޖުލައި 3، 1979 ގައި ސައިންސް އެޑިޔުކޭޝަން ސެންޓަރުގެ ނަމުގައި ކިޔވައިދޭން ފެށީ 47 ދަރިވަރުންނާ އެކު އެވެ. މާލެ ސަރަހައްދުގައި މަތީ ސާނަވީ އަށް ކިޔަވައިދޭ ހަމައެކަނި ސްކޫލުގެ ނަން ސީއެޗްއެސްއީއަށް ބަދަލުކުރީ 2001ގަ އެވެ.

މިހާރު 1،000 އަށް ވުރެ ގިނަ ކުދިން ކިޔަވާ އެ ސްކޫލުގެ އާ އިމާރާތް، ހުޅުމާލޭގައި ހަދައި، ކިޔަވައިދޭން ފަށާފައި ވަނީ މިދިޔަ އަހަރުގެ މެދުތެރޭގަ އެވެ.