ސްޓެލްކޯގެ ސަބްސްޓޭޝަނަކުން ކޭބަލުތަކެއް ވަގަށް ނެގި މީހަކު ހައްޔަރުކޮށްފި

މަޖީދިއްޔާ ސްކޫލް ކައިރީގައި ހުންނަ ސްޓެލްކޯގެ ސަބްސްޓޭޝަނަކުން ކޭބަލުތަކެއް ވަގަށް ނެގި މީހަކު މިއަދު ހައްޔަރުކޮށްފި އެވެ.

ފުލުހުން ބުނީ މި މައްސަލާގައި 32 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަދި އެ މައްސަލަ ތަހުގީގުކުރަމުން އަންނަ ކަމަށް ވެސް އެ އިދާރާ އިން ބުންޏެވެ.

މި ކޭބަލްތައް ވަގަށް ނެގީ މިދިޔަ އަންގާރަ ދުވަހު އެވެ. ފުލުހުންނަށް އެ މައްސަލަ ރިޕޯޓްކޮށްފައި ވަނީ އެ ދުވަހުގެ ހެނދުނު 6:21 ހާއިރެވެ.

ސްޓެލްކޯގެ ސަބްސްޓޭޝަންތަކުން ވައްކަންކުރާ މައްސަލަ މިދިޔަ ރޯދަމަހު ވެސް ވަރަށް ބޮޑުވި އެވެ. އެގޮތަށް ވައްކަން ކުރަނިކޮށް މީހަކު ކަރަންޓުގައި ޖެހިގެން ވަނީ މަރު ވެސް ވެފަ އެވެ.