ހަމާސްގެ މެންބަރުންގެ 60 ޕަސެންޓް ވަނީ މަރުވެ ނުވަތަ ޒަހަމްވެފައި: އިޒްރޭލު

ހަމާސް އިން އޮކްޓޫބަރު ހަތް ވަނަ ދުވަހު އިޒްރޭލަށް ދިން ހަމަލާއަށް ފަހު އިޒްރޭލުން ދޭން ފެށި ހަމަލާތަކުގައި ހަމާސްގެ ހަނގުރާމަވެރިންގެ 60 ޕަސެންޓް "ނައްތާލެވިފައި ނުވަތަ ޒަޚަމްވެފައިވާ" ކަމަށް އިޒްރޭލުގެ ޑިފެންސް މިނިސްޓަރު ޔޯވް ގަލަންޓް ބުދަ ދުވަހު ބުނެފި އެވެ.

ހަމަލާތަކަށް ނުވަ މަސް ފުރުމާ ދިމާކޮށް، ގާނޫނު ހަދާ މަޖިލީހަށް ދިން ބަޔާނެއްގައި ގަލަންޓް ބުނީ ހަމާސް ނައްތާލުމާއި ރަހީނުކޮށްފައިވާ އިޒްރޭލުން އެންމެން ސަލާމަތްކުރުމަކީ އަސްކަރިއްޔާގެ އަމާޒު ކަމަށެވެ.

ހަމާސްގެ ހަނގުރާމަވެރިންގެ 60 ޕަސެންޓް ނައްތާލާފައި ނުވަތަ ޒަހަމްކޮށްލާފައިވާ ކަމަށް ބުނި ބަޔާނުގައިވާ ގޮތުން އެ ޖަމާއަތުގެ 24 ފައުޖެއް ވެސް ވަނީ ރޫޅާލައިފަ އެވެ.

މި އަދަދުތަކުގެ ތަފްސީލް ހާމަކޮށްފައި ނުވާއިރު އިޒްރޭލުގެ އަސްކަރިއްޔާއިން ބުނީ އަދި މި ތަފާސް ހިސާބު އެކުލަވާލާފައި ނެތް ކަމަށެވެ. އެކަމަކު އިޒްރޭލުގެ ބޮޑުވަޒީރުގެ އޮފީހުން ބުނެފައިވާ ގޮތުގައި ހަމާސްގެ 14،000 މީހަކު ވަނީ ހަމަލާތައް ފެށި ފަހުން "ނައްތާލައިފަ" އެވެ.

ހަމާސްގެ ހަމަލާތަކުގައި އިޒްރޭލުގެ 1،195 މަރާލައި 251 މީހަކު ރަހީނުކުރުމުން ދޭން ފެށި ހަމަލާތަކުގައި ފަލަސްތީނުން މިހާތަނަށް 38،000 އަށް ވުރެ ގިނަ މީހުން ޝަހީދުވެފައި ވާއިރު އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށް ފަލަސްތީނުން ބުނެ އެވެ. އދ. އާއި އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ވެސް ބުނަމުން އަންނަނީ އިޒްރޭލުގެ ހަމަލާތައް އާންމުންގެ ސަރަހައްދުތަކަށް އަމާޒުކޮށް އާންމުންނަށް ގެއްލުން ދެމުންދާ ކަމަށެވެ. -- އޭއެފްޕީ