ޣައްޒާގައި ދެ ދުވަހަށް ހަމަލާތައް މެދުކަނޑާލަން މިސްރުން ހުށަހަޅައިފި

އިޒްރޭލާއި ހަމާސްއާ ދެމެދު ހަމަލާތައް ބަދަލުކުރުން ދެ ދުވަހަށް މެދުކަނޑާލަން މިސްރުގެ ރައީސް އަބްދުލްފައްތާހު އައް-ސީސީ ހުށަހަޅުއްވައިފި އެވެ.

މި ހުށަހެޅުމުގައި ހިމެނެނީ ހަމާސް އިން ރަހީނުކޮށްފައިވާ އިޒްރޭލު މީހުންގެ ތެރެއިން ހަތަރު މީހަކު ދޫކޮށްލުމާއި އޭގެ ބަދަލުގައި އިޒްރޭލުގެ ޖަލުތަކުން ފަލަސްތީނު ބަޔަކު މިނިވަންކުރުމެވެ.

މިކަން ހުށަހަޅާފައި މި ވަނީ އިޒްރޭލުން އީރާނަށް ހަމަލާދީ އަދި ޣައްޒާއަށް ހަމަލާތައް ވަރުގަދަކޮށް އަދި ލުބްނާންގެ ހިޒްބުﷲއާ ދެކޮޅަށް ވެސް ހަމަލާ ދެމުން ގެންދާ ވަގުތެއްގަ އެވެ. އިޒްރޭލުން އީރާނަށް ދިން ހަމަލާގައި އީރާން ސިފައިންގެ ހަތަރު މީހަކު މަރުވި އެވެ.

އޮކްޓޯބަރު 7 ވަނަ ދުވަހު ހަމާސްއިން އިޒްރޭލަށް ދިން ހަމަލާގައި 1,206 މީހުން މަރުވި އެވެ. ރައްދުގައި އިޒްރޭލުން މީގެ އަހަރެއް ކުރިން ދޭން ފެށި ހަމަލާތަކުގައި މިހާތަނަށް ފަލަސްތީނުގެ 42,924 މީހަކު ވަނީ ޝަހީދުވެފަ އެވެ. އޭގެ ތެރޭގައި ގިނައީ އާންމު ރައްޔިތުންނެވެ.

އދ. އިން ބުނެފައިވާ ގޮތުގައި، ޣައްޒާގެ އުތުރުގައި ދިރިއުޅޭ މީހުންގެ ހާލަތު ވަނީ ވަރަށް ނާޒުކު ހާލަތެއްގަ އެވެ. ކާބޯތަކެއްޗާއި އެހެނިހެން އަސާސީ ޚިދުމަތްތައް ލިބުމުގައި ވަރަށް ބޮޑެތި ދަތިތައް އެބަހުރި ކަމަށް ވަނީ ބުނެފަ އެވެ.

މިސްރުގެ ރައީސް ވިދާޅުވި ގޮތުގައި ވީހާ ވެސް އަވަހަކަށް އެހީތެރިކަން ފޯރުކޮށްދިނުމަކީ ވަރަށް މުހިންމު ކަމެކެވެ.

އިޒްރޭލުން ލުބްނާންގެ ދެކުނަށް ދިން ހަމަލާތަކުގައި މަދުވެގެން 21 މީހުން މަރުވެފައިވެ އެވެ. ސެޕްޓެމްބަރު 23 އިން ފެށިގެން ލުބްނާންގައި މަރުވެފައިވާ މީހުންގެ އަދަދު ވަނީ 1,615 އަށް އަރައިފަ އެވެ.