ހުޅުމާލޭގެ މުނިސިޕަލް ހިދުމަތްތައް ބަދަލުކުރަން އެޗްޑީސީ އާއި ސިޓީ ކައުންސިލުން މަޝްވަރާކޮށްފި

ހުޅުމާލޭގެ މުނިސިޕަލް ހިދުމަތްތައް މާލޭ ސިޓީ ކައުންސިލްގެ ދަށަށް ބަދަލުކުރުމުގެ އަމަލީ މަސައްކަތް ކުރިއަށް ނުދާތާ ދުވަސްތަކެއް ފަހުން، އެޗްޑީސީ އާއި މާލެ ސިޓީ ކައުންސިލުން އެ ކަމާ މެދު އިއްޔެ މަޝްވަރާކޮށްފި އެވެ.

އެ ކުންފުނިން އިއްޔެ ސޯޝަލް މީޑިއާގައި ކުރި ޕޯސްޓެއްގައި ބުނީ ދެ ފަރާތުގެ މެނޭޖްމެންޓާ އެކު ބޭއްވި ބައްދަލުވުމުގައި، ހުޅުމާލޭގައި އެޗްޑީސީން ދޭ މުނިސިޕަލް ހިދުމަތްތައް ކައުންސިލްގެ ދަށަށް ބަދަލުކުރަން މަޝްވަރާ ކޮށްފައިވާ ކަމަށެވެ.

އެކަމަކު، އެ މަޝްވަރާތަކުގެ އެއްވެސް ތަފުސީލެއް ނުދެ އެވެ.

މާލޭގެ މޭޔަރު އާދަމް އާޒިމް "މިހާރު" އަށް ކުރިން ވިދާޅުވީ، ދެ ފަރާތުން އެއްބަސްވުމުގައި ސޮއިކުރިތާ ހަ މަސް ދުވަހަށް ވުރެ ގިނަ ދުވަސްވި އިރު ވެސް އެ އަށް އަމަލެއް ނުކުރާ ކަމަށެވެ. އެހެންވެ، އެޗްޑީސީއާ މަޝްވަރާކުރަން މީގެ ކުރިން މަސައްކަތް ކުރެއްވި ކަމަށާއި އެކަން ކާމިޔާބީއެއް ނުވި ކަމަށް އޭރު އޭނާ ވިދާޅުވި އެވެ.

ކެބިނެޓުން މިދިޔަ އަހަރުގެ ޑިސެމްބަރު މަހުގެ ފަހުކޮޅު ނިންމި ނިންމުމާ އެއްގޮތަށް، އެޗްޑީސީން ވަނީ ހުޅުމާލޭގެ މުނިސިޕަލް ހިދުމަތްތައް ސިިޓީ ކައުންސިލްގެ ދަށަށް ބަދަލުކުރުމުގެ އެއްބަސްވުމުގައި ވެސް ޖެނުއަރީ 4، 2024 ގައި ސޮއިކޮށްފަ އެވެ.

"އަޅުގަނޑުމެން މި ތިބީ މާލޭގެ ބައިވަރު ރައްޔިތުންތަކެއް އެ ތަނުގައި ތިބީމާ ސިޓީ ކައުންސިލުން ދޭންޖެހޭ ހިދުމަތްތައް ނުދީ. ބަނދަރުގެ ހިދުމަތްތަކާއި މުނިސިޕަލް އެކި ހިދުމަތްތައް ނުދެވިފައި މި ތިބީ. މި ޝަކުވާ އަޅުގަނޑަށް ވެސް ލިބޭ،" އާޒިމް ވިދާޅުވި އެވެ.

"ހުޅުމާލޭގެ ވެސް އެތައް ރައްޔިތުންގެ ވޯޓާއެކު އަޅުގަނޑު ހޮވަނީ. ހޮވީމަ، އެ މީހުންގެ ސޯޝަލް ހައުސިންގެ ތެރޭގައި ހިނގާ ކަންތަކަށް ވެސް އެޓެންޑު ނުކުރެވި، އެ ހުރިހާ ކަމެއް ވެސް އެބަ ހިނގާ. ގާނޫނީ ގޮތުން ކުރަންޖެހޭ ކަންތައްތަކެއް، ކުރަންޖެހޭ މީހުން ނުކޮށް އޮތީމަ އަސްލު ދަތިކަން މި އަންނަނީ."