ކަމަލާއަށް މަލާމަތްކުރާތީ ކަންގަނާ ރުޅިގަދަވެއްޖެ

އެމެރިކާގެ ރިޔާސީ ރޭހުގައި އެ ގައުމުގެ ނައިބު ރައީސް ކަމަލާ ހެރިސް ވާދަކުރަން އުޅުއްވާތީ ސޯޝަލް މީޑިއާގައި އެކަމަނާއަށް މަލާމަތް ރައްދުވާ ގޮތަށް މީމްސް ހަދައި ޝެއާކުރާތީ ބޮލީވުޑްގެ އެކްޓްރެސް އަދި އިންޑިއާގެ މަޖިލިސް މެމްބަރު ކަންނަގާ ރަނާވަތު ހިތްހަމަނުޖެހިއްޖެ އެވެ.

އެމެރިކާގެ ރިޔާސީ އިންތިހާބުގައި މިހާރުގެ ރައީސް ޖޯ ބައިޑެން ވާދަނުކުރައްވަން ނިންމަވައި، ޕާޓީގެ ފަރާތުން ވާދަކުރައްވާނެ އާ ކެންޑިޑޭޓަކަށް މިހާރުގެ ނައިބު ރައީސް ކަމަލާގެ ނަން ވަނީ ހުށަހަޅުއްވައިފަ އެވެ. އެއާ އެކު، ކަމަލާއަށް ރައްދުވާ ގޮތަށް ވަރަށް ބައިވަރު މީމްސްތައް ހަދައި ޝަލް މީޑިއާގައި ދަނީ ދައުރުކުރަމުންނެވެ.

ކަމަލާއަށް ރައްދުވާ ގޮތަށް ހަދާފައިވާ މީމްއެއް އިންސްޓަގްރާމް ސްޓޯރީގައި ހިއްސާކުރަމުން ކަންގަނާ ބުނީ ޑިމޮކްރެޓްސްގެ ފަރާތުން ވާދަކުރައްވާނެ ކެންޑިޑޭޓަކަށް ކަމަލާގެ ނަން ހުށަހެޅި ފަހުން މި ކަހަލަ ބޭއަދަބީ ކަންކަން އިތުރުވެފައިވާ ކަމަށެވެ.

"އަހަންނަކީ ޑިމޮކްރެޓްސްއަށް ތާއީދުކުރާ މީހަކަށް ނުވިޔަސް، ކެލިފޯނިއާގެ އެޓާނީ ޖެނެރަލްކަން ކުރައްވާފައިވާ އަދި ދުވަސްވީ ސިޔާސީ ޝަހުސިއްޔަތަކަށް މިގޮތަށް ޖިންސީ ތަފާތުކުރުން ބަލައިނުގަނެވޭ،" ކަންނަގާ ބުންޏެވެ.

"މި އެމެރިކާ މީހުންނަށް ހީވަނީ އެމީހުންނަކީ ވަރަށް ޒަމާނީ ބައެކޭ، އެކަމަކު ހަގީގަތަކީ އެމީހުންނަކީ އިންޑިއާ މީހުންނަށް ވުރެ ވެސް މާ ނާތަހުޒީބު ބައެއް. ލަދުވެތި."

ކަންގަނާއަކީ އަބަދުވެސް ސޯޝަލް މީޑިއާގައި އެކި ކަންކަމުގައި މީހުންނަށް ފާޑުކިޔާ މީހެކެވެ.

މިދިޔަ ޖޫން މަހު ބޭއްވި އިންޑިއާގެ އާންމު އިންތިހާބުގައި ކަންގަނާ ވަނީ ބީޖޭޕީގެ ފަރާތުން ވާދަކޮށް، އޭނާގެ އުފަން ސްޓޭޓް ހިމާޗަލް ޕްރަދޭޝްގެ މަންޑީގެ ގޮނޑި ކާމިޔާބުކޮށްފަ އެވެ. މަޖިލިސް މެމްބަރަކަށް ވުމުން އޭނާ މިހާރު ވަނީ ފިލްމީ މަސައްކަތްތަކާ ދުރަށް ޖެހިލައިފަ އެވެ. ނަމަވެސް، އިންތިހާބުގެ ކުރިން އޭނާ ކުޅެފައި ހުރި ބައެއް ފިލްމުތައް މި އަހަރު ރިލީޒްކުރަން ވަނީ ނިންމައިފަ އެވެ.