ރާއްޖޭގައި ހެޕިނެސް އިންޑެކްސްއެއް ކަނޑައެޅުމުގެ މަސައްކަތް ފަށައިފި

ދިވެހިންގެ އުފާވެރިކަމުގެ އިންޑެކްސްއެއް ފުރަތަމަ ފަހަރަށް ރާއްޖޭގައި ކަނޑައެޅުމަށްޓަކައި ދިރާސާއެއް ހެދުމުގެ މަސައްކަތް ސަރުކާރުން ފަށައިފި އެވެ.

ސިޓީޒް އެންޑް ލޯކަލް ގަވަމަންޓް މިނިސްޓަރު އާދަމް ޝަރީފް އުމަރު ވިދާޅުވީ ހެޕިނެސް އިންޑެކްސް ނުވަތަ ދިވެހިންގެ އުފާޥެރިކަން ބަލާ މިންގަނޑެއް ކަނޑައެޅުމަށް ދިރާސާއެއް ހެދުމުގެ މަސައްކަތް ފަށާފައިވާ ކަމަށެވެ.

އެ މަސައްކަތް ކުރަނީ އިސްލާމިކް ޔުނިވާސިޓީއާ ގުޅިގެން ކަމަށާއި އެކަމާ ގުޅޭ ގޮތުން މިއަދު ބޭއްވި ވޯކްޝޮޕްގެ ތެރެއިން އެ މަސައްކަތް ކުރުމަށް ބޭނުންވާ ތަފާތު ހިޔާލުތަކާއި ނަޒަރިއްޔާތުތަކާ ބެހޭ ގޮތުން މަޝްވަރާ ކުރެއްވި ކަމަށް މިނިސްޓަރު ވިދާޅުވި އެވެ.

ހެޕިނަސް އިންޑެކްސް އަކީ އެ ގައުމެއްގައި ދިރިއުޅޭ ރައްޔިތުންގެ ދިރިއުޅުމަށް ބަލައި އުފާވެރިކަން އޮތް ވަރު ދެނެގަތުމަށް ހަދާ އިންޑެކްސް އެކެވެ. ދުނިޔޭގައި ކޮންމެ އަހަރަކު އެކި ގައުމުތަކުން ހެޕިނަސް އިންޑެކްސް އާންމު ކުރެ އެވެ.

ދުނިޔޭގެ ހެޕިނަސް އިންޑެކްސްގައި އެންމެ ކުރީގައި އުޅެނީ ފިންލޭންޑެވެ. މި ސަރަހައްދުގެ އިންޑިއާ އަދި ސްރީ ލަންކާ ފަދަ ގައުމުތައް އުޅެނީ 100 އަށް ވުރެ ފަހަތުގަ އެވެ.