ދިވެހިންގެ އުފާވެރިކަން މިންކުރަން "ހެޕިނަސް އިންޑެކްސް" އިފުތިތާހުކޮށްފި

ލޯކަލް ގަވަމެންޓް މިނިސްޓްރީން އިސްނަގައިގެން ދިވެހި މުޖުތަމައުގެ އުފާވެރިކަން މިންކުރުމަށް ކުރިއަށް ގެންދާ "ހެޕިނަސް އިންޑެކްސް" މިއަދު އިފުތިތާހުކޮށްފި އެވެ.

ސަލްޓަން ޕާކުގައި ބޭއްވި ރަސްމިއްޔާތުގައި ވަނީ ހެޕިނަސް އިންޑެކްސްގެ ލޯގޯ "އުފާވެރި ރާއްޖެ" އިފުތިތާހުކޮށްފަ އެވެ.

އެ ރަސްމިއްޔާތު ޝަރަފުވެރި ކޮށްދެއްވަމުން ރައީސް ޑރ. މުހައްމަދު މުއިއްޒުގެ އަނބިކަނބަލުން އަދި ފަސްޓް ލޭޑީ ސާޖިދާ މުހައްމަދު ވިދާޅުވީ، ދިވެހި ގައުމުގެ އުފާވެރިކަމުގެ ނިސްބަތް ބަލަން މިއަދު ފެށުމަކީ ވަރަށް އުފާފުޅު ކުރައްވާ ކަމެއް ކަމަށެވެ.

ފަސްޓް ލޭޑީ ވިދާޅުވީ، ވަރަށް ގިނަ ގައުމުތަކުގައި އުފާވެރިކަން ވަޒަން ކުރަމުން އަންނަ ކަމަށާއި ގައުމީ އެކި ކަންކަމުގައި ގޮތް ނިންމާއިރު، ރައްޔިތުންގެ އުފާވެރިކަން ބަލާ ކަމަށެވެ. ވަކިން ހާއްސަކޮށް ޑިމޮކްރަސީގެ ރިވެތި އުސޫލުގެ ދަށުން ސަރުކާރުތަކުން އެކަން ބަލާ ކަށަވަރު ކުރާ ކަމަށް އެ ކަމަނާ ވިދާޅުވި އެވެ.

ސާޖިދާ ވިދާޅުވީ ދިވެހި ބަސް ފޮތުގައިވާ ގޮތުން އުފާވެރިކަމަކީ ހިތަށާއި ސިކުނޑި އަށް ލިބޭ ތަނަވަސްކަމާއި އަރާމު ކަމަށެވެ. ދިރިއުޅުމުގެ އަސާސީ ކަންކަން ފުއްދުމުގެ ތަނަވަސްކަން ލިބުމާއި ބޯހިޔާވަހިކަމުގެ އިތުރުން އަމާން ވެއްޓެއް ލިބުމާއި އެކަކު އަނެކަކާ އޮންނަ ގުޅުން ރަނގަޅު ވުމަކީ ވެސް އުފާވެރިކަމުގެ ތެރޭގައި ހިމެނޭ ކަންކަން ކަމަށް ފަސްޓް ލޭޑީ ފާހަގަކުރެއްވި އެެވެ.

އެކަމަނާ ވިދާޅުވިގޮތުގައި، ގައުމެއްގައި އުފާވެރިކަން އަށަގަތުމަށް އެ ބައެއްގެ މާދަރީ ބަހާއި ސަގާފަތާއި ތަރިކަ އާއި ފަންނު މުހިއްމު ދައުރެއް އަދާކުރެ އެވެ. ޖަމާނުއްސުރެ އެ ބައެއްގެ މާދަރީ ބަހުން ލިޔެފައި ހުންނަ ޖޯކުތަކާއި ބުއްދިވެރި ބުނުންތަކާއި ވާހަކަތަކާއި ރޭޑިއޯ ނުވަތަ ޓީވީ ޑްރާމާތަކުން އަދަބީ އުފާ ލިބޭ ކަމަށް ސާޖިދާ ވިދާޅުވި އެވެ.

މިއަދުގެ ރަސްމިއްޔާތުގައި ލޯކަލް ގަވަމެންޓް މިނިސްޓަރު އާދަމް ޝަރީފު ވިދާޅުވީ، ދިވެހިންގެ ދިރިއުޅުމުގެ ވައްޓަފާޅި އަށް މިދިޔަ ތިރީހަކަށް އަހަރުގެ ތެރޭގައި ބޮޑެތި ބަދަލުތަކެއް އައިސްފައިވާ ކަމަށެވެ. އޭގެ ތެރޭގައި ތަރައްގީގެ މަޝްރޫއުތައް ހިންގުމުން ދިރިއުޅުމަށް އައި ބަދަލުތަކާއި މަސްތުވާތަކެތި ފަދަ ބޮޑެތި ވަބާތައް އެކި ރަށްރަށުގައި އޮތުމުގެ ސަބަބުން އައިސްފައިވާ ނޭދެވޭ ބަދަލުތަކަށް މިނިސްޓަރު އަލި އަޅުއްވާލެއްވި އެވެ.

އާދަމް ޝަރީފު ވިދާޅުވީ ރާއްޖޭގެ ހެޕިނެސް އިންޑެކްސް އެކުލަވައިލަން ޖެހެނީ ކޮންމެ ރަށެއްގައި އެ ރަށެއްގެ ކަންތައްތައް ދަނެގަނެވޭނެ އޮނިގަނޑެއްގެ ދަށުން ކަމަށް ގަބޫލު ކުރައްވާ ކަމަށެވެ.

ހެޕިނެސް އިންޑެކްސްގެ މަސައްކަތް ކުރިއަށް ގެންދާނީ ލޯކަލް ކައުންސިލުތަކާ ގުޅިގެން ކަމަށާއި އެ ކަމަށް އަހުލުވެރިކުރުމަށް ކުރަންޖެހޭ ކަންކަން ވެސް ކުރާނެ ކަމަށް މިނިސްޓަރު ވިދާޅުވި އެވެ. އަދި އުފާވެރިކަމުގެ މިންތީގައި އެންމެ މަތީގައި އޮންނަ ރަށްތަކަށް އެވޯޑު ދިނުމުގެ ވިސްނުން ގެންގުޅުއްވާ ކަމަށް ވެސް އޭނާ ވިދާޅުވި އެވެ.

"ހެޕިނެސް އިންޑެކްސްގެ ދަށުން ކުރިއެރުން ހޯދާ ރަށްތަކަށް އެވޯޑު ދެވޭނެ ގޮތެއް އޮތުމަކީ އަޅުގަނޑު ދެކޭ ގޮތުގައި މުހިއްމު ކަމެއް،" އާދަމް ޝަރީފު ވިދާޅުވި އެވެ.

ރާއްޖެއަކީ އުފާވެރި ތަނަކަށް ހެދޭނީ މުޅި މުޖުތަމައު ގުޅިގެން ކުރާ މަސައްކަތުން ކަމަށް ވެސް މިނިސްޓަރު ވިދާޅުވި އެވެ.

ރާއްޖޭގެ އުފާވެރިކަމުގެ މިންގަނޑު އެކުލަވައިލުމުގެ ދިރާސާ ކުރަނީ އިސްލާމިކް ޔުނިވާސިޓީންނެވެ.

ރާއްޖޭގެ ކޮންމެ ރަށެއްގައި ދިރިއުޅޭ ކޮންމެ ރައްޔިތަކީ ވެސް އުފާވެރި ބަޔަކަށް ހެދުމަށް ތަފާތު ހަރަކާތްތައް ކުރިއަށް ގެންދަން ވަނީ ރާވައިފަ އެވެ.