ތިން ވަނަ ދަތުރުގައި އިންޑިއާ އިން ސީދާ އައްޑު އަށް 800 ޓަނުގެ މުދާ!

އިންޑިއާގެ ޓުޓިކޮރިން އިން އައްޑު އަށް ދާއިމީ ގޮތެއްގައި މުދާ އުފުލުމަށް އެމްޕީއެލް މެދުވެރިވެގެން ފެށި ދަތުރުތައް ވަރަށް ކާމިޔާބު ކަމަށާއި މިއަދު 800 ޓަނުގެ މުދާ އެ އަތޮޅަށް ގެންގޮސްފައިވާ ކަމަށް އެ ކުންފުނިން ބުނެފި އެވެ.

އިންޑިއާގެ ޓުޓިކޮރިން އިން އައްޑު އަށް ޕެރިޝަބްލް ކާގޯ އާއި އާންމު މުދާ ގެންދިއުމުގެ ދަތުރުތައް ފެށީ މި މަހުގެ 10 ގަ އެވެ. އެ ފަހަރު ގެންދިޔަީ 150 ޓަނުގެ މުދަލެވެ. އެކަމަކު، އޭގެ ފަހުން މިއަދު ހިތަދޫ ޕޯޓަށް ވަނީ 800 ޓަނުގެ މުދަލާ އެކު، ކާގޯ ބޯޓެއް ކައިރި ކޮށްފަ އެވެ.

އެ ބޯޓުން އައްޑު އަށް ގެންދިޔައީ ފިޔާ، އަލުވި، ކަރާ އަދި ބިސްތަކެވެ. އަދި ޖެނެރަލް ކާގޯ ވެސް ހިމެނެ އެވެ.

އިންޑިއާ އިން ސީދާ އައްޑު އަށް ކާގޯ ބޯޓުފަހަރުތަކުގައި މުދާ ގެންދަން ފެށީ އެމްޕީއެލް އައި ހިތަދޫ ޕޯޓުން ކުރި މަސައްކަތާ އެކު އިންޑިއާގެ ފައިނެންސް ގުރޫޕް މެދުވެރިކޮށެވެ.

ތިން ވަނަ ބޯޓުން އައްޑު އަށް މުދާ ބޭލުމުގެ ކަންކަން ހިނގަމުންދާ ގޮތް ބައްލަވަން އެމްޕީއެލްގެ ސީއީއޯ މުހައްމަދު ވަޖީހު ވެސް މިއަދު އައްޑު އަށް ވަޑައިގަތެވެ.

ވަޖީހު ކުރިން ވިދާޅުވެފައި ވަނީ އަމާޒަކީ ކޮންމެ 10 ނުވަތަ 15 ދުވަހަކުން އިންޑިއާ އިން މުދާ ހިފައިގެން އައްޑު އަށް ސީދާ ދަތުރުތައް ބޭއްވުން ކަމަށެވެ.

ވަޖީހު ވިދާޅުވެފައިވާ ގޮތުގައި އިންޑިއާގެ ފައިނެންސް ކުންފުނިން އޭނާގެ ކިބައިން އެދުނީ ސެކިއުރިޓީ ކަށަވަރު ކޮށްދިނުމާއި ޑިމާންޑު އިތުރު ކޮށްދިނުމަށެވެ. އޭގެ ތެރެއިން ސެކިއުރިޓީގެ އެއްވެސް މައްސަލައެއް ދިމާނުވާނެ ކަމުގެ ޔަގީންކަން ދެއްވާފައިވާ ކަަމަށް އޭނާ ވިދާޅުވި އެވެ.

ވަޖީހުގެ ވިސްނުމަކީ އިންޑިއާ އިން ސީދާ އައްޑު އަށް ގެންދާ ތަރުކާރީ އާއި މޭވާގެ ބާވަތްތައް ފެރީގެ ނިޒާމުގެ ތެރެއިން ފުވައްމުލަކަށް ވެސް ގެންދާށެވެ.