ލ. އަތޮޅުގައި ބަންކަރިންގެ ހިދުމަތް ދޭން އެމްޕީއެލް ޝައުގުވެރިވޭ

ލ. އަތޮޅުގައި ތަރައްގީކުރާ ކޮމާޝަލް ހާބަރުގައި ބަންކަރިންގެ ހިދުމަތް ދޭން އެމްޕީއެލް އިން ޝައުގުވެރިކަން އެބަހުރި ކަމަށާއި އެކަން ކުރުމުގެ ގާބިލްކަން ވެސް ހުންނާނެ ކަމަށް އެމްޕީއެލްގެ ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެ އެވެ.

މިދިޔަ ހަފުތާގައި "މިހާރު" އަށް ދެއްވި ހާއްސަ އިންޓަވިއުގައި ވަޖީހު ވިދާޅުވީ، ލ. އަތޮޅުގައި އޮފްޝޯ ބަންކަރިންގެ ހިދުމަތާއި ސިޓީ ހޮޓަލެއް ގާއިމު ކުރުމަށާއި ސްޓޯރޭޖާއި ޓްރާންސްޝިޕްމަންޓް ހިދުމަތް ދޭނެ ކަމަށެވެ. އެކަމަށް ބޭނުންވާ ދިރާސާތައް ކޮށް ނިންމާފައިވާ ކަމަށް އޭނާ ވިދާޅުވި އެވެ. ވިދާޅުވީ، އެއީ އެމްޕީއެލް އަށް ކުރެވޭނެ މަސައްކަތެއް ކަމަށެވެ.

ވަޖީހު ވިދާޅުވި ގޮތުގައި، އެ ހިދުމަތްތަކާ އެކު. ލ. އަތޮޅުގައި 2،000 އަށް ވުރެ ގިނަ ވަޒީފާގެ އުފެދޭނެ އެވެ.

"އަޅުގަނޑުމެންގެ ވިސްނުން އެބަހުރި މި ކަމުގައި. އަޅުގަނޑުމެން މިދަނީ ސަރުކާރާ އެކު ވާހަކަ ދައްކަމުން. ސަރުކާރުން ވަކި ގޮތަކަށް މަގު ދެއްކެވީމާ، އަޅުގަނޑުމެންގެ ޑިޒިޝަން އާންމުކޮށްލާނަން،" އޭނާ ވިދާޅުވި އެވެ.

ވަޖީހު ވިދާޅުވީ، އެ ޕްރޮޖެކްޓް ހިންގުމަށް ހުޅުވައިލުމުން، އެމްޕީއެލްގެ އިތުރުން ބޭރުގެ ބައެއް ފަރާތްތަކުން ވެސް ޝައުގުވެރިކަން ފާޅުކޮށްފައިވާ ކަމަށެވެ. މިކަމުގައި ސަރުކާރުން އަދި ވަކި ގޮތެއް ނުނިންމަ އެވެ.

"އަޅުގަނޑުމެންނަށް ގަބޫލު ކުރެވޭ އެމްޕީއެލް އަށް އެކަން ކުރެވިދާނެ ކަމަށް. އަދި އަނެއްކާ އެމްޕީއެލްއާ އެކު އެކަން ކުރުމަށް ބައިވެރިވާނެ މީހުން ވެސް އެބަތިބި. ބޭރުގެ ފަރާތްތައް ވެސް،" ވަޖީހު ވިދާޅުވި އެވެ.

އެމްޕީއެލް އިން މިހާރު އަންނަނީ އައްޑޫގައި ވެސް ބަންކަރިންގެ ހިދުމަތް ފެށުމަށް ތައްޔާރުވަމުންނެވެ. ގާތްގަނޑަކަށް ހުރިހާ މަސައްކަތެއް ނިމި ދެން އޮތީ އައްޑޫގައި ބަންކަރިންގެ ހިދުމަތް އެ ކުންފުނިން ފަށައިގަތުމެވެ.

ލ. އަތޮޅުގެ ވިޔަފާރި ބަނދަރުގެ އިތުރުން، އިހަވަންދިއްޕޮޅުގައި ވެސް އެމްޕީއެލް އިން ޓްރާންޝިޕްމެންޓް ޕޯޓެއް ހެދުމުގެ ޝައުގުވެރިކަން ވެސް އެބަހުރި ކަމަށް ވަޖީހު ވިދާޅުވި އެވެ.

ލ. ގާދޫ ކައިރީގައި ކޮމާޝަލް ޕޯޓާއި ލޮޖިސްޓިކްސް ހިމެނޭ ގޮތަށް ކޮމާޝަލް ހާބަރެއް ހެދުމަކީ މި ސަރުކާރުގެ ރިޔާސީ ވައުދެކެވެ. ރައީސް ޑރ. މުހައްމަދު މުއިއްޒުގެ ސަރުކާރުގެ ފުރަތަމަ 100 ދުވަހުގެ ތެރޭގައި ގާދޫގައި ޓްރާންޝިޕްމެންޓް ބަނދަރެއް އެޅުމުގެ މަސައްކަތް ފެށުމަށް ވަނީ ރާވައިފަ އެވެ. އެ ބަނދަރު އެޅުމަށް ފަހު ގާދު އާއި ފޮނަދުއާ ދެމެދު ރިސޯޓެއް އަޅަން ވެސް މުއިއްޒު ވަނީ ކެމްޕެއިން ތެރޭގައި ވައުދުވެވަޑައިގެންފަ އެވެ.

ލ. އަތޮޅުގައި ހަދާ ކޮމާޝަލް ބަނދަރުގެ އިތުރުން އިހަވަންދިއްޕޮޅުގައި ޓްރާންސްޝިޕްމަންޓު ބަނދަރު ތަރައްގީ ކުރުމުގެ މަސައްކަތް ކުރުމަށް މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯން ކުންފުންޏެއް ވަނީ އުފައްދައިފަ އެވެ. އެ ކުންފުނި އުފެއްދީ އެސްޓީއޯ އާއި އާބަންކޯ އާއި އެމްޕީއެލް އާއި އެމްޓީސީސީ އަދި އެމްއޭސީއެލް ހިމެނޭ ގޮތަށެވެ. އިހަވަންދިއްޕޮޅުގައި ތަރައްގީ ކުރާ ޕޯޓް ސިޓީގައި ތެލުގެ ގައުމީ ސްޓްރެޓެޖިކް ރިޒާވެއް ހަދާނެ އެވެ. ބަންކަރިން ހިދުމަތާ އެކު، ޝިޕިން އެޖެންސީ އާއި ކްރޫ ޗޭންޖާއި ޝިޕް ހޭންޑްލިން ނުވަތަ ބޯޓު ފަހަރު ސާވިސް ކުރުމާއި މަރާމާތު ކުރުމާއި ސްޕެއާ ޕާޓްސް ފޯރުކޮށްދޭނެ އެވެ.