ކިންގްސްޓޮން ކުންފުނިން ސައިކަލު ގަންނަން ފައިސާ ދެއްކި މީހުންގެ މައުލޫމާތު ހިއްސާކުރަން ފުލުހުން އެދިއްޖެ

ކިންގްސްޓޮން ހޯލްޑިންގްސް ކުންފުނިން ސައިކަލު ގަންނަން ފައިސާ ދެއްކި މީހުން މައުލޫމާތު ހިއްސާކުރަން ފުލުހުން މިއަދު އެދިއްޖެ އެވެ.

އެ އިދާރާއިން ކުރި އިއުލާނެއްގައި ބުނީ ކިންގްސްޓޮން ހޯލްޑިންސް މޯލްޑިވްސް ކުންފުނިން ސައިކަލު ވިއްކާ ކަމަށް ބުނެ މަކަރާއި ހީލަތުން ފައިސާ ނަގާފައިވާ ކަމަށް ތުހުމަތު ކުރެވޭ މައްސަލަތަކެއް އެ ތަނަށް ހުށަހަޅާފައި ވާތީ އެ މައްސަލަތައް ތަހުގީގު ކުރަމުން އަންނަ ކަމަށެވެ. އެހެންވެ، އެ ކުންފުނިން ސައިކަލު ގަތުމުގައި މަކަރާއި ހީލަތުގެ ޝިކާރައަކަށް ވެފައިވާ ނަމަ އިކޮނޮމިކް ކްރައިމް އިންވެސްޓިގޭޝަންގެ ނަންބަރު 9790048 އަށް ގުޅައި މައުލޫމާތު ހިއްސާކޮށްދިނުމަށް ވަނީ އެދިފަ އެވެ.

އެނގިފައިވާ ގޮތުގައި އެ ކުންފުނިން ސައިކަލު ގަތުމަށް ބައެއް މީހުން ފައިސާ ދެއްކިތާ އަހަރަކަށް ވުރެ ގިނަ ދުވަސްވެގެން ދިޔައިރު ވެސް ސައިކަލު ހަވާލެއް ނުކުރެ އެވެ. ކިންގްސްޓޮންގެ އޮފީހަށް ގުޅުމުން ފޯނު ނުނަގާ ކަމަށް ވެސް، ސައިކަލު ގަންނަން ފައިސާ ދެއްކި ބައެއް މީހުން ބުނެފައި ވެ އެވެ.