ޝިޔާމްގެ "ފޮތް އަލަމާރި" އިން 700 ފޮތް ލައިބްރަރީއަށް

ފޮތްތައް ކިޔުއްވުމާއި ލިޔުއްވުމުގައި އުފެދުނު ޝައުގުވެރިކަމާ އެކު، ގިނަ އަހަރުތަކެއް ވަންދެން އެއްކުރި ފޮތްތައް، ލިޔުންތެރިޔާ މުހައްމަދު ޝިޔާމް ގައުމީ ކުތުބުހާނާ އަށް އިއްޔެ ހަދިޔާ ކުރައްވައިފި އެވެ.

ދައުލަތަށް 35 އަހަރަށް ވުރެ ގިނަ ދުވަސް ވަންދެން ހިދުމަތް ކުރެއްވި ޝިޔާމް "މިހާރު" އަށް މިއަދު ވިދާޅުވީ، އޭނާގެ "ފޮތް އަލަމާރި" ގައި ހުރި 700 ފޮތް ނޭޝަނަލް ލައިބްރަރީ އަށް ހަދިޔާކުރީ، ގިނަ ބަޔަކަށް އިލްމު ފޯރުކޮށްދިނުމުގެ މަގްސަދުގައި ކަމަށެވެ.

"ފޮތްތައް އަލަމާރީގައި ހުރީމާ ބޭނުންކުރެވޭނީ އަޅުގަނޑަށް އެކަނި. އެކަމަކު ގައުމީ ކުތުބުހާނާ އަށް ލީމާ، އޭގެ ބޭނުން ގިނަ ބަޔަކަށް އެބަ ކުރެވޭ. އިލްމު އެބަ ލިބޭ ގިނަ ބަޔަކަށް،" އޭނާ ވިދާޅުވި އެވެ.

އޭނާ ވިދާޅުވީ ފޮތްތައް "ފޮރުވައިގެން" ގިނަ ދުވަސްތަކެއް ވަންދެން ގެންގުޅުއްވިޔަސް އޭނާ ނެތް ދުނިޔެއެއްގައި ދެން އެތަކެތި އުކާލަައިފި ނަމަ، އޭގެ ބޭނުން އެއްވެސް މީހަކަށް ނުކުރެވޭނެ ކަމަށެވެ. އެހެންވެ، ރައްކާތެރިކޮށް، އެ ތަކެތި ގެންގުޅޭނެ ތަނަކަށް ފޮތްތަައް ހަދިޔާކުރީ ކަމަށް ވިދާޅުވީ އެވެ.

ޝިޔާމް ހަދިޔާ ކުރެއްވި ފޮތްތަކުގެ ތެރޭގައި މަޖައްލާތަކާއި ދީނީ ފޮތްތަކާއި ތާރީހީ ފޮތްތައް ހިމެނެ އެވެ. އޭގެ ތެރޭގައި ކުތުބުހާނާގައި ނެތް ފޮތްތައް ވެސް ހިމެނެ އެވެ.

އޭނާ ހަދިޔާކުރެއްވި އެންމެ ދުވަސްވީ ފޮތަކީ 1966 ގައި ނެރެފައިވާ "އެކުވެރިންގެ ރޫހު" އެވެ.

"އަޅުގަނޑަށް ވެސް މި ފޮތް ލިބުނީ މަންމަ ފަރާތުން. މި ފޮތެއް ވެސް ނެތް ކުތުބުހާނާގައި. ފޮތް އޮތީ ވެސް ރަތްކުލަ އަރައި، ހީރަސްތައް ވެސް ނެއްޓިފައި،" ޝިޔާމް ވިދާޅުވި އެވެ.

ޝިޔާމް ވިދާޅުވި ގޮތުގައި ކުރީގެ ރައީސް މައުމޫނު އަބްދުލްގައްޔޫމުގެ ވެރިކަމުގައި އެ މަނިކުފާނު ދެއްވި ހިތާބުތަކާއި ތަގުރީރުތައް ވެސް އެ ފޮތްތަކުގެ ތެރޭގައި ހިމެނެ އެވެ. އެހެންވެ، އިލްމީ ދިރާސާތައް ކުރާ ފަރާތްތަކަށް ވެސް މި ފޮތްތަކަކީ މުހިއްމު ފޮތްތަކަކަށް ވާނެ ކަމަށް ވިދާޅުވި އެވެ.

އެ ފޮތްތަކުގެ ތެރޭގައި ޝިޔާމް ލިޔުއްވާފައިވާ ފޮތްތައް ހަތަރު ފޮތެއް ވެސް ހިމެނެ އެވެ. އެއީ ދެ ވާހަކަ ފޮތާއި ސިނަމާލޭ ބްރިޖާ ގުޅޭ ގޮތުން ލިޔުއްވި ފޮތް ހިމެނެ އެވެ.