ޕާކިސްތާނުން ވެސް އެމްޕޮކްސް ފެނިއްޖެ

މުޅި ދުނިޔެއަށް ނުރައްކަލެއް ކަމަށް ޑަބްލިޔުއެޗްއޯ އިން ކަނޑައަޅާފައިވާ އެމްޕޮކްސްގެ ސްވިޑެން އިން ފުރަތަމަ ފަހަރަށް ފެނުނު ކަމަށް ރިޕޯޓްކުރިތާ އެއް ދުވަސް ފަހުން މިއަދު ޕާކިސްތާނުން ވެސް މި ބަލީގެ ފުރަތަމަ ކޭސް ފެނި އެކަން ހާމަކޮށްފި އެވެ.

ދުނިޔެއަށް ނުރައްކާވާ ހާލަތަށް ޑިމޮކްރެޓިކް ރިޕަބްލިކް އޮފް ކޮންގޯ އާއި އެފްރިކާ ސަރަހައްދުގެ އެހެން ބައެއް ގައުމުތަކުގައި އެމްޕޮކްސް (މަންކީ ޕޮކްސް) ފެތުރެމުންދާ ކަމަށް ޑަބްލިޔުއެޗްއޯ އިން ކަނޑައެޅީ މިދިޔަ ބުދަ ދުވަހު އެވެ. ސްވިޑެން އިން ބުނެފައިވާ ގޮތުގައި އެ ގައުމުން ފެނުނީ ކޮންގޯގައި ފެތުރެމުންދާ އެމްޕޮކްސް ވައިރަސްގެ ނުރައްކާ ބާވަތެވެ.

ޑިމޮކްރެޓިކް ރިޕަބްލިކް އޮފް ކޮންގޯގައި ފެތުރެމުން ދަނީ ކްލޭޑް 1ބީ ސަބްކްލޭޑް އެވެ. މި ސްޓްރެއިން މިދިޔަ އަހަރުގެ ސެޕްޓެމްބަރު މަހުން ފެށިގެން ދަނީ ހަލުވިކަމާ އެކު ފެތުރެމުންނެވެ. އަދި މިހާތަނަށް އެ ބަލީގައި 548 މީހަކު ވަނީ މަރުވެފަ އެވެ.

ކޮންގޯގެ އިތުރުން ބުރުންޑީ، ކެންޔާ، ރުވާންޑާ އަދި ރުވާންޑާއިން ވެސް ދަނީ އެމްޕޮކްސްގެ ކޭސްތައް ފެންނަމުންނެވެ.

ސްވިޑެން އިން ބުނީ ބަލިޖެހިފައިވަނީ އެފްރިކާގައި އެމްޕޮކްސްގެ ނުރައްކާ ބޮޑު ސަރަހައްދަށް ދިޔަ މީހަކަށް ކަމަށެވެ.

ޕާކިސްތާނުން ފެނިފައިވަނީ އެމްޕޮކްސްގެ ކޮން ވައްތަރެއް ކަމެއް އަދި ހާމައެއް ނުކުރެ އެވެ.

"ބަލިޖެހިފައިވަނީ ގަލްފުގެ ގައުމަކުން އައި މީހަކަށް،" ޕާކިސްތާނުގެ ހެލްތު މިނިސްޓްރީން ނެރުނު ބަޔާނުގައި ބުންޏެވެ.

މިއީ އުމުރުން 34 އަހަރުގެ ފިރިހެނެއް ކަމަށާއި އެއީ މި އަހަރު ޕާކިސްތާނުން ފެނުނު އެމްޕޮކްސްގެ ފުރަތަމަ ކޭސް ކަމަށް ވެސް އެ ގައުމުން ބުންޏެވެ.

އެމްޕޮކްސްގެ ނުރައްކާ ދުނިޔެއަށް އާންމުވެއްޖެ ކަމަށް ޑަބްލިޔުއެޗްއޯ އިން ކަނޑައެޅުމާ އެކު ގައުމުތަކުން އަންނަނީ ރައްކާތެރިކަމުގެ ފިޔަވަޅުތައް އަޅަމުންނެވެ.

މެއި 2022 ގައި ދުނިޔޭގެ އެކި ހިސާބުތަކުން މި ބަލި ފެނުނެވެ. އޭރު މި ބަލި ގިނައިން ޖެހެމުން ދިޔައީ އެއް ޖިންސުން ގުޅުން ހިންގާ ފިރިހެނުންނަށެވެ. އެ މީހުންނަށް ޖެހުނީ ކްލޭޑް 2ބީ ސަބްކްލޭޑް އެވެ. އެފަހަރު މިއީ ދުނިޔެއަށް ސިއްހީ ނުރައްކަލެއްގެ ގޮތުގައި ޑަބްލިޔުއެޗްއޯ އިން ކަނޑައެޅި އެވެ.

ޖުލައި 2022 އިން ފެށިގެން މެއި 2023 އަށް އެ ހާލަތު ދެމެހެއްޓުމަށް ފަހު އުވާލީ ބަލީގެ ކޭސްތައް މަދުވުމުންނެވެ. އެކަމަކު މިދިޔަ އަހަރުގެ ސެޕްޓެމްބަރު މަހުން ފެށިގެން ޑިިމޮކްރެޓިކް ރިޕަބްލިކް އޮފް ކޮންގޯއިން 11،000 އަށް ވުރެ ގިނަ މީހުންނަށް މި ބަލި ޖެހިފައިވެ އެވެ.

އެމްޕޮކްސް

ކުރިން މަންކީޕޮކްސްގެ ނަން ދީފައިވާ މި ބަލީގެ ވައިރަސް އިންސާނުންނަށް ވާސިލްވަނީ ބަލި ޖެހިފައިވާ ޖަނަވާރުގެ ފަރާތުންނެވެ. އިންސާނެއްގެ ހަށިގަނޑަށް މި ވައިރަސް ވަދެއްޖެ ނަމަ އެ ވައިރަސް ހުންނަ މީހެއްގެ ފަރާތުން އެހެން މީހުންނަށް ވެސް މި ވައިރަސް އަރަ އެވެ. އެކަމަކު އެއީ އެކަކު އަނެކަކު ގައިގައި ޖެހި، ވަރަށް ގައިގޯޅިކޮށް އުޅުމުން ނޫނީ އާންމުކޮށް ދިމާވާ ކަމެއް ނޫނެވެ.

އިންސާނުންގެ ހަށިގަނޑުން އެންމެ ފުރަތަމަ މި ވައިރަސް ފެނުނީ 1970 ވަނަ އަހަރު ޑިމޮކްރެޓިކް ރިޕަބްލިކް އޮފް ކޮންގޯއިންނެވެ.

މި ބަލި ޖެހުމުން ހުން އައިސް ގައިގައި ރިއްސައި ދޮސް ލާފައި ހުންނަ މުލިހިތަކެއް ފާޑު ބިހިތަކެއް ގައިގައި ނަގަ އެވެ.

މި ވައިރަހުގެ ދެ ބާވަތެއް ފާހަގަވެފައިވެ އެވެ. އެއީ މެދުތެރޭ އެފްރިކާގެ ކޮންގޯ ސަރަހައްދުގައި އާންމުވެފައިވާ ކްލޭޑް 1 އާއި ހުޅަނގު އެފްރިކާ ސަރަހައްދުގައި އާންމު ކްލޭޑް 2 އެވެ. މީގެ ތެރެއިން ނުރައްކާތެރިކަން ބޮޑީ ކްލޭޑް 1 ގަ އެވެ.