ސަން ސިޔާމްގެ އެހީގައި ކަމަދޫ އެންމެންނަށް ހިލޭ ބޭސް ފަރުވާ ދެނީ

މަޝްހޫރު ވިޔަފާރިވެރިޔާ އަދި މީދޫ ދާއިރާގެ މެމްބަރު އަހުމަދު ސިޔާމު މުހައްމަދުގެ ހަރަދުގައި ބ. ކަމަދޫ ރައްޔިތުންނަށް ހިލޭ ބޭސް ފަރުވާ ފޯރުކޮށްދޭން ނިންމައިފި އެވެ.

އެ ރަށު ކައުންސިލުގެ ރައީސް ހަސަން ޒަރީރު "މިހާރު" އަށް މިއަދު ވިދާޅުވީ "ސަން ސިޔާމް ކެއާ" ގެ ފަރާތުން ކަމަދޫގެ ރައްޔިތުންނަށް ބޭސް ފަރުވާ ފޯރުކޮށްދޭން ނިންމާފައިވާ ކަމަށެވެ.

އާބާދީގައި 564 މީހުން އުޅޭ ކަމަދު އަށް ސަން ސިޔާމް ކެއާގެ ފަރާތުން އެހީ ދޭން ނިންމީ ކީއްވެތޯ ސުވާލު ކުރުމުން އޭނާ ވިދާޅުވީ، ރާއްޖޭގެ އެހެން ރަށްރަށަށް ވެސް އެ ޖަމާއަތުގެ ފަރާތުން އެކި އެހީތައް ފޯރުކޮށްދެމުން ގެންދާ ކަމަށެވެ.

"އެގޮތަށް ހަމަ އަޅުގަނޑުމެންނަށް ވެސް މި ފުރުސަތު ލިބުނީ،" ޒަރީރު ވިދާޅުވި އެވެ.

އެކަމާ ގުޅިގެން ކަމަދޫ ކައުންސިލުން ނެރުނު އިއުލާނެއްގައި ބުނީ، އެ ކައުންސިލާ އެކު ކުރި މަޝްވަރާގެ ތެރެއިން ސަން ސިޔާމް ކެއާގެ ފަރާތުން ވަނީ ކަމަދޫ ރައްޔިތުންނަށް ރާއްޖެއިންނާއި ރާއްޖެއިން ބޭރުން ބޭސް ފަރުވާ ކުރުމަށް ބޭނުންވާ މާލީ އެހީތެރިކަން އުސޫލެއްގެ ދަށުން ދޭން ނިންމާފައިވާ ކަމަށެވެ.

އެހީ ބޭނުންވާ މީހުން އެކަމާ ގުޅޭ ފޯމާއި ލިޔެކިޔުންތައް ކައުންސިލް އިދާރާ އަށް ހުށަހެޅުމުން، އެ ރަށު ކައުންސިލުން އެ އެހީ ހޯދުމަށް މަސައްކަތް ކޮށްދޭނެ ކަމަށް އިއުލާނުގައި ވެ އެވެ.