ސިޔާމް އާއި ޒާރާގެ ކައިވެނި؛ ހަވާ އެރުވުމާ އެކު ކަމަދޫގައި ބޮޑު ހަފުލާއެއް

ރައްޔިތުންގެ މަޖިލިހުގެ މެމްބަރު އަހުމަދު ސިޔާމް މުހައްމަދު (ސަން ސިޔާމް) އާއި އާމިނަތު ޒާރާގެ ކައިވެނީގެ އުފަލުގައި ޒާރާގެ އުފަން ރަށް ބ. ކަމަދޫގައި މިރޭ ބޮޑު ހަފުލާއެއް ބާއްވައި ހަވާ އަރުވައިފި އެވެ.

މިދިޔަ ބޮޑު އީދުގައި ކަމަދޫން ގިނަ ބައެއްގެ ލޯބި ހޯދި ނެށުންތެރިޔާ ޒާރާ އާއި ސަން ސިޔާމް ރިސޯޓްސްގެ ވެރިޔާ އަދި މީދޫ ދާއިރާގެ މެމްބަރު ސަން ސިޔާމް ކައިވެނި ބައްލަވައިގަތީ މިދިޔަ ބުރާފަސްތި ދުވަހުގެ ހަވީރު އެވެ.

އުމުރުން 55 އަހަރުގެ ސިޔާމް އާއި 23 އަހަރުގެ ޒާރާގެ ކައިވެނީގެ ހަފުލާ ބޭއްވީ މާލެ އަތޮޅުގައި އޮންނަ ސިޔާމްގެ އޮޅުވެލި ރިސޯޓުގަ އެވެ. އެ ހަފުލާއަށް ފަހުގައި އެ ރޭ ރިސޯޓުގައި ވެސް ބޮޑު ޕާޓީއެއް ބޭއްވި އެވެ. އެނގިފައިވާ ގޮތުގައި، އެ ޕާޓީ އަށް ދައުވަތު ދީގެން ހާހެއްހާ މީހުން ދިޔަ އެވެ.

އެ ޕާޓީގައި ދިވެހި ބޭންޑުތަކުގެ މިއުޒިކްގެ އިތުރުން ޒާރާ އާއި ކަމަދޫ ކުދިންގެ ހާއްސަ އައިޓަމްތައް ވެސް އޮތެވެ.

ރާއްޖޭގައި މި އަހަރު އެންމެ ގިނަ ބައެއްގެ ޝައުގުވެރިކަން ހޯދި މި ކައިވެނީގެ ހަފުލާގެ ކުރިން ވަނީ ރަންކިޔުމުގެ ހަފުލާއެއް ވެސް އެ ރިސޯޓުގައި ބާއްވައިފަ އެވެ. އޭގެ ކުރިން ޒާރާގެ ބްރައިޑަލް ޝަވާ ވެސް ބޭއްވި އެވެ. މިއަދު ހަވީރު ވަނީ ކަމަދޫގައި ކުޑަކުދިންގެ ހަވީރެއް ވެސް ބާއްވައިފަ އެވެ.

މިދިޔަ ބޮޑު އީދު ބަންދުގައި ޒާރާގެ ސަބަބުން މުޅި ރާއްޖޭގެ ސަމާލުކަން ލިބުނު ކަމަދޫގައި މިރޭ އޮތީ ޒާރާ އާއި ސިޔާމްގެ ކައިވެނީގެ އުފަލުގައި ބޭއްވި ހަ ވަނަ ހަފުލާ އެވެ.

އެ ހަފުލާގައި ވަނީ އާބާދީގައި 560 މީހުން ހިމެނޭ ކަމަދޫގެ ހުރިހާ ރައްޔިތުންނަށް ކެއުމެއް ދީފަ އެވެ. ކައިރި ރަށްރަށުން ވެސް ދައުވަތު ދީގެން މީހުން ހަފުލާ އަށް ދިޔަ އެވެ. ރާއްޖޭގެ ބޭންޑުތަކާ އެކު އެ ހަފުލާގައި ހާއްސަ މިއުޒިކް ޝޯއެއް ވެސް އޮތެވެ. އެ ހަފުލާ ނިންމާލީ ހަވާ އެރުވުމުންނެވެ. މިދިޔަ ބުރާސްފަތި ދުވަހުގެ ރޭ އޮޅުވެލި ރިސޯޓުގައި ބޭއްވި ކައިވެނި ޕާޓީގައި ވެސް ހަވާ އެރުވި އެވެ.

ސިޔާމް އާއި ޒާރާގެ ކައިވެނި ވެފައި ވަނީ މި ފަހުން ރާއްޖޭގައި ގިނަ ބައެއްގެ ސަމާލުކަން އެންމެ ބޮޑަށް ލިބުނު ކައިވެންޏަށެވެ. ސިޔާމާއި ޒާރާގެ ލޯބީގެ ގުޅުން ވެފައި ވަނީ ރާއްޖޭގައި ކުރު މުއްދަތެއްގެ ތެރޭގައި އެންމެ ބޮޑު މަޝްހޫރުކަން ވެސް ލިބުނު ގުޅުމަށެވެ.

މި ކައިވެނީގެ ރަނަކީ ގެސްޓް ހައުސްއެއް ކަމަށް ބުނެ އަޑު ފެތުރިފައިވީ ނަމަވެސް ކަށަވަރުވެފައިވާ ގޮތުގައި އެއީ ހަގީގަތާ ހިލާފު ވާހަކައެކެވެ. ޒާރާ ރަންކީ 2،024ރ. އަށެވެ.

ސިޔާމް އާއި ޒާރާގެ ރަންކިޔުމުގެ ހަފުލާއަށް ވެސް ގިނަ ބައެއްގެ ސަމާލުކަން ލިބުނެވެ. އެ ހަފުލާގެ ވީޑިއޯއެއް ސޯޝަލް މީޑިއާގައި އާންމުވި އިރު، އެ ވީޑިއޯ އިން ފެންނަ ގޮތުގައި ޒާރާ ވަނީ ސިޔާމަށް ވަރަށް އަސަރުގަދަ ލަވައެއް ވެސް ކިޔައިދީފަ އެވެ. އެ ލަވަ ހަދާފައި ވަނީ އެ ދެ މީހުންގެ ކައިވެންޏާއި ސިޔާމާ މެދު އޭނާ ދެކޭ ގޮތުގެ މައްޗަށެވެ.