ބީއެމްއެލްގެ ބޯޑުން އައިޝަތު ނޫރައްދީން ވަކިކޮށްފި

ރާއްޖޭގެ އެންމެ ގިނަ ކަސްޓަމަރުން ތިބި ބޭންކް، ބޭންކް އޮފް މޯލްޑިވްސް (ބީއެމްއެލް) ގައި 42 އަހަރު ވަންދެން ހިދުމަތް ކުރައްވާފައިވާ އާއިޝަތު ނޫރައްދީން (އައިސްތު ނޫރައްދީން) އެ ކުންފުނީގެ ބޯޑުން އިއްޔެ ވަކިކޮށްފި އެވެ.

"މިހާރު" އަށް އެނގިފައިވާ ގޮތުގައި ބީއެމްއެލްގެ ބޯޑުގެ ޑިރެކްޓަރުގެ މަގާމުން އައިސްތު ވަކިކުރި ކަން އަންގައި ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ސިޓީ ފޮނުވީ އިއްޔެގަ އެވެ.

ނަމަވެސް ބީއެމްއެލްއަކީ އާންމުންގެ ހިއްސާ އޮންނަ ކުންފުންޏަކަށް ވާތީ އެ ތަނުގެ ބޯޑަށް މީހުން އައްޔަންކޮށް ވަކިކުރެވޭނީ ހިއްސާދާރުންގެ އާންމު ޖަލްސާއަކުންނެވެ.

ޕީސީބީގެ މި ނިންމުމާ ގުޅޭ ގޮތުން އެ ބޯޑު އަދި ސަރުކާރުގެ ބަހެއް ނުލިބެ އެވެ.

ބީއެމްއެލްގެ ޑެޕިއުޓީ ސީއީއޯގެ މަގާމުގައި ވެސް މިހާރު ހުންނެވި އައިސްތު އަކީ އެ ބޭންކުގައި މިހާރު ދެ ވަނަ އަށް އެންމެ ގިނަ ދުވަސްވީ ބޭފުޅާ އެވެ. އޭނާ ބީއެމްއެލްއާ ގުޅިވަޑައިގަތީ 1982 ގަ އެވެ.

ބީއެމްއެލްގެ ބައެއް ޑިރެކްޓަރުން މިދިޔަ ޖެނުއަރީ މަހު ވެސް ޕީސީބީގެ ސިޓީއަކުން ވަކިކުރި އެވެ. އެއީ ގާނޫނީ ގޮތުން ޕީސީބީ އަށް ކުރެވޭނެ ކަމަކަށް ނުވާތީ އަލުން އެ ބޭފުޅުން އައްޔަންކުރި އެވެ. ފަހުން އެ ބޭފުޅުން ބޯޑުން ވަކިކުރީ ބީއެމްއެލްގެ އެކްސްޓްރާ އޯޑިނަރީ ބައްދަލުވުމަކުންނެވެ.