ގައުމިއްޔަތުގެ ދިރާސާތަކަށް ހާއްސަ ކޮލެޖު "އިސްވަރު" އިފުތިތާހުކޮށްފި

ގައުމިއްޔަތުގެ ދިރާސާތައް ކުރުމަށް ސަރުކާރުން އުފައްދަން ނިންމި ހާއްސަ ކޮލެޖު "ދިވެހި ގައުމިއްޔަތުގެ އިސްވަރު" ރައީސް ޑރ. މުހައްމަދު މުއިއްޒު މިއަދު އިފުތިތާހުކޮށްދެއްވައިފި އެވެ.

ރައީސް މި ކޮލެޖު އިފުތިތާހު ކޮށްދެއްވީ މިއަދު ފާހަގަކުރާ ގައުމީ ދުވަހުގެ މުނާސަބަތުގައި ދަރުބާރުގޭގައި ބޭއްވި ރަސްމީ ޖަލްސާގަ އެވެ.

"ދިވެހި ގައުމިއްޔަތުގެ އިސްވަރު" އުފެއްދީ ދިވެހި ގައުމިއްޔަތު ދިރުވައި އާލާކޮށް، ދިވެހިންގެ ހިތްތަކުގައި ގައުމާއި ގައުމިއްޔަތަށް އޮތް ލޯބި އިތުރުކުރުމުގެ މަގުސަދުގައި ސަރުކާރުން ކުރަމުން އަންނަ މަސައްކަތްތަކުގެ ދަށުންނެވެ.

މިއަދުގެ ޖަލްސާގައި އެ ކޮލެޖާ ގުޅޭ ގޮތުން ހުށަހެޅި ޕްރެޒެންޓޭޝަންގައި ބުނި ގޮތުގައި، އެއީ ރައީސް މުއިއްޒު އެކުލަވާލައްވާފައިވާ ގައުމިއްޔަތު އިޔާދަކުރެއްވުމުގެ ގައުމީ ނިޒާމުގެ އެންމެ މުހިންމު އެއް ގުނަވަނެވެ.

މި ކޮލެޖު އެކުލަވާލާފައި ވަނީ މައިގަނޑު ފަސް ދާއިރާއެއްގެ މައްޗަށެވެ. އެއީ، ދިވެހި ބަސްގެ ވަރު، ދިވެހި ތާރީހުގެ ވަރު، ދިވެހި ތަރިކައިގެ ވަރު، ދިވެހި ސުމޭކުގެ ވަރު އަދި ދިވެހި ފަންނުގެ ވަރެވެ.

އެ އިން ކޮންމެ ދާއިރާއަކަށް މިއަދުގެ ޖަލްސާގައި ރައީސް ވަނީ އިސް ބޭފުޅުން އައްޔަންކުރައްވައިފަ އެވެ. އެ ބޭފުޅުންނަކީ މި ކޮލެޖުގެ ކައުންސިލްގައި ތިއްބަވާނެ ފަސް ބޭފުޅުންނެވެ. އެއީ؛

• މަރިޔަމް ތައުފީގާ، މ. ޑްރީމީ ލައިޓް (ދިވެހި ބަހުގެ އިސްވާރު)

• ކަށިމާ އަހްމަދު ޝާކިރު، މއ. ކަށިމާ (ދިވެހި ތާރީހުގެ އިސްވާރު)

• ހަސަން ޒަރީރު، ލޮނުފެން، ސ. މަރަދޫ (ދިވެހި ތަރިގައިގެ އިސްވާރު)

• މުހައްމަދު އަބްދުލްގާދިރު، ގ. ގޯޅިތޭރެގެ (ދިވެހި ސުމޭކުގެ އިސްވާރު)

• މަރިޔަމް އިޝާ އަޒީޒް، ހ. ހާދި (ދިވެހި ފަންނުގެ އިސްވާރު)

ދިވެހި ބަހާއި ތަރިކައާ ގުޅޭ މިނިސްޓަރު އާދަމް ނަސީރު އިބްރާހިމް ވިދާޅުވި ގޮތުގައި، "ވަރު" އަކީ ގައުމީ ދުވަހުގެ ބަތަލު ރާއްޖެ މިނިވަންކުރުމަށް ފަހު، ކަންކަން ބެލެހެއްޓުމަށް އުފެއްދި ގްރޫޕްތަކަށް ކިޔާ އުޅުނު ނަމެކެވެ. އެ ކޮލެޖަށް "އިސްވަރު" ކިޔަން ނިންމެވީ އެހެންވެ އެވެ.

އެ ޖަލްސާގައި ރައީސް މުއިއްޒު ދެއްކެވި ވާހަކަފުޅުގައި ވިދާޅުވީ މިދިޔަ ނުވަ މަސްދުވަހުގެ ތެރޭ ދިވެހި ތަރިކަ ދިރާސާކުރާ ގައުމީ މަރުކަޒުގެ ވިލަރެސްވެރީން ވަނީ ދުނިޔޭގެ 180 އަށް ވުރެ ގިނަ ގައުމުގައި އެ ގައުމުތަކުގެ އަމިއްލަވަންތަކަން ދަމަހައްޓާ ގޮތުގެ ދިރާސާތައް ހަދައިފައި ކަމަށެވެ. އަދި އިލްމީ ފަންނީ އެކި ދާއިރާތަކުން، 800 އަށް ވުރެ ގިނަ ބޭފުޅުންނަށް މިހާރު ވަނީ ދިވެހި ގައުމިއްޔަތުގެ އަސާސީ އަސްލުތައް އިލްމީ ގޮތުގާ ފޯރުކޮށްދީފައި ކަމަށް ވެސް ރައީސް ވިދާޅުވި އެވެ.

"މިއަދު ދިވެހި ގައުމިއްޔަތުގެ އިސްވަރު މި ވަނީ އުފެދިފައި. މުސްތަގުބަލުގައި ދިވެހި ގައުމިއްޔަތުގެ އިސްވަރު ވާނީ ގާނޫނުން ބާރުލިބިދޭ ދިވެހި ގައުމީ ތަރިކައިގެ ކޮލެޖަކަށް،" ރައީސް ވިދާޅުވި އެވެ.

"މި ކޮލެޖަކީ ރާއްޖޭގައި މިހާތަނަށް އަދި ނުއުފައްދާ ބާވަތެއްގެ ކޮލެޖެއް. އެއީ މެންބާޝިޕް ކޮލެޖެއް. މެންބަރުންގެ ވިޔުގަތަކެއްގެ މައްޗަށް އެކުލެވިގެންވާނެ ކޮލެޖެއް."

ރައީސް ވިދާޅުވި ގޮތުގައި، އެ ކޮލެޖުގެ މައިގަނޑު ބޭނުމަކީ ދިވެހީންގެ ތަރިކަ އާއި ސަގާފަތާއި ތާރީހާ އަމިއްލަވަންތަ އަސްލުތަކަށް އިލްމީ ލެންސުތަކުން މީގެ ފަހުން އަބަދުވެސް ބަލަހައްޓަމުން ގެންދިޔުމެވެ. އަދި ދިވެހި ގައުމިއްޔަތަކީ ދިވެހީންގެ ދިރިއުޅުމުގެ ބައެއްކަމުގައި ހެދުމެވެ.