ރާއްޖޭގެ ހިރިގަލުގެ މިސްކިތްތައް އިސެސްކޯގެ ތަރިކައިގެ ލިސްޓުގައި ހިމަނަން މަޝްވަރާކޮށްފި

ރާއްޖޭގެ ހިރިގަލުގެ މިސްކިތްތައް އިސްލާމިކް ވޯލްޑް އޮފް އެޑިއުކޭޝަނަލް، ސައިންޓިފިކް އެންޑް ކަލްޗަރަލް އޯގަނައިޒޭޝަން (އިސެސްކޯ)ގެ ދުނިޔޭގެ ތަރިކައިގެ ދާއިމީ ލިސްޓުގައި ހިމަނަން މަޝްވަރާކޮށްފި އެވެ.

ހެރިޓޭޖް މިނިސްޓްރީން މިއަދު ނެރުނު ނޫސްބަޔާނެއްގައި ބުނީ ރާއްޖޭގެ ހިރިގަލުގެ މިސްކިތްތައް އިސެސްކޯގެ ދުނިޔޭގެ ތަރިކައިގެ ދާއިމީ ލިސްޓުގައި ހިމެނުމާ ބެހޭ މުހިންމު މަޝްވަރާތަކެއް މިނިސްޓަރު އާދަމް ނަސީރު އިބްރާހިމް އާއި އިސެސްކޯގެ ޑިރެކްޓަރު ޖެނެރަލް ހިޒް އެކްސެލެންސީ ޑރ. ސާލިމް އަލްމާލިކާ ކުރައްވާފައިވާ ކަމަށެވެ.

މިނިސްޓަރުގެ މި ދަތުރަކީ ވެސް އިސެސްކޯގެ ޑިރެކްޓަރު ޖެނެރަލްގެ ދައުވަތަކަށް ކުރައްވާ ދަތުރެއް ކަމަށް މިނިސްޓްރީން ބުންޏެވެ.

އެ މަޝްވަރާ ބައްދަލުވުން ބޭއްވީ އަޒަރްބައިޖާނުގެ ވެރިރަށް ބަކޫގަ އެވެ. އިސެސްކޯގެ ޑިރެކްޓަރު ޖެނެރަލްގެ އިތުރުން އެ ޖަމިއްޔާގެ ބައެއް އިސް އޮފިޝަލުން ވެސް އެ ބައްދަލުކުރެއްވުމުގައި ބައިވެރިވެވަޑައިގެންނެވި އެވެ.

މިނިސްޓްރީން ބުނީ "ޝޫޝާ – ކަލްޗަރަލް ކެޕިޓަލް އޮފް ދަ އިސްލާމިކް ވޯލްޑް 2024"ގައި ރާއްޖޭގެ ފަރާތުން ބައިވެރިވެވަޑައިގަތުމަށް އާދަމް ނަސީރު އިބްރާހީމް މިހާރު ހުންނެވީ އަޒަރްބައިޖާނުގައި ކަމަށެވެ.

މި ދަތުރުގެ މައިގަނޑު މަގުސަދުތަކުގެ ތެރޭގައި ރާއްޖޭގެ ހިރިގަލުގެ މިސްކިތްތައް އިސެސްކޯގެ ދުނިޔޭގެ ތަރިކައިގެ ދާއިމީ ލިސްޓުގައި ހިމެނުމަށް މަސައްކަތް ކުރުން ހިމެނޭ ކަމަށް މިނިސްޓްރީން ބުންޏެވެ.

އިސެސްކޯގެ ޑިރެކްޓަރު ޖެނެރަލް ވަނީ ރާއްޖޭގެ އާސާރީ މިސްކިތްތަކުގެ ތެރޭގައި ހިމެނޭ ހިރިގަލުގެ މިސްކިތްތައް އިސެސްކޯގެ ދުނިޔޭގެ ތަރިކައިގެ ދާއިމީ ލިސްޓުގައި ހިމެނުމަށް ބަލަން ޖެހޭ ކަންކަން ބަލައި އެ މަސައްކަތް ކުރިއަށް ގެންދާނެ ކަމަށް ވިދާޅުވެފައި ކަމަށް މިނިސްޓްރީން ބުންޏެވެ.

"މިއާ އެކު ރާއްޖޭގެ ހިރިގަލުގެ މިސްކިތްތައް އިސެސްކޯގެ ދުނިޔޭގެ ތަރިކައިގެ ދާއިމީ ލިސްޓުގައި ހިމެނުމަށް ކުރެވެމުން އަންނަ މަސައްކަތް ކާމިޔާބު ވާނެ ކަމުގެ ފެހި ސިގުނަލް މި ވަނީ ލިބިފަ އެވެ،" މިނިސްޓްރީގެ ބަޔާނުގައިވެ އެވެ.

އިސެސްކޯގެ ދުނިޔޭގެ ތަރިކައިގެ ދާއިމީ ލިސްޓުގައި މިސްކިތްތަކާއި އާސާރީ އެހެނިހެން ބިނާ ހިމެނުމުގެ ކަންކަން ބަލަހައްޓަނީ އެ ޖަމިއްޔާގެ އެއް ގުނަވަން ކަމަށްވާ އިސްލާމިކް ވޯލްޑް ހެރިޓޭޖް ކޮމިޓީންނެވެ. މިދިޔަ ޑިސެމްބަރު މަހު މޮރޮކޯގެ ރަބާތުގައި ހުންނަ އެ ޖަމިއްޔާގެ މައި އޮފީހުގައި ކުރިއަށް ގެންދިޔަ ކޮމިޓީގެ ބައްދަލުވުމުގައި ވަނީ އިސެސްކޯގެ ދުނިޔޭގެ ތަރިކައިގެ ލިސްޓަށް 213 އާސާރީ ތަންތަނާއި ތަކެތި އިތުރުކޮށްފަ އެވެ.

އެ ލިސްޓުގައި މިހާރު 634 އާސާރީ ތަންތަނާއި ތަކެތި ހިމަނާފައިވެ އެވެ. އެ ލިސްޓަކީ މާއްދީ ތަރިކަ އާއި މައުނަވީ ތަރިކަ ވެސް ދަފްތަރު ކުރެވޭ ލިސްޓެކެވެ.