ގައުމީ ރެކޯޑަކާ އެކު އެންމެ މޮޅު އެތުލީޓްގެ އެވޯޑް ފަސޫހާއަށް

ގައުމީ އެތުލެޓިކްސް ޗެމްޕިއަންޝިޕްގައި ހެދި ރެކޯޑާ އެކު، އެ މުބާރާތުގެ އެންމެ މޮޅު އަންހެން އެތުލީޓްގެ އެވޯޑް ފަސޫހާ އަހްމަދު އަލީ ހޯދައިފި އެވެ.

މިޑްލް ޑިސްޓެންސް ރޭސްތަކަށް ހާއްސަ، ފަސޫހާ ގައުމީ ރެކޯޑް ހެދީ އިއްޔެ އޮތް 1،500 މީޓަރު ރޭހުންނެވެ. ކުރިން ވެސް އޭނާ އަތުގައި އޮންނަ ރެކޯޑް ފަސޫހާ މުގުރާލީ ފަސް މިނެޓާއި 3.51 ސިކުންތުންނެވެ. މިދިޔަ އަހަރުގެ ގްރޭންޑް ޕްރީ މުބާރާތުގައި ފަސޫހާ އޭރު ރެކޯޑް ހެދީ 5 މިނެޓާއި 04.02 ސިކުންތުންނެވެ.

މުބާރާތުގައި ޓްރެކް އިވެންޓްތަކުން ގައުމީ ރެކޯޑެއް ހެދި ހަމައެކަނި އެތުލީޓަކީ ފަސޫހާ އެވެ. އޭނާ ވަނީ 800 މިޓަރުގެ ރޭހުގައި ވެސް ވާދަކޮށް އެއްވަނަ ހޯދައިފަ އެވެ. އެ އިވެންޓް އޭނާ ކާމިޔާބު ކުރީ 2 މިނެޓާއި 15.96 ސިކުންތުންނެވެ.

މުބާރާތުގެ އެންމެ މޮޅު ފިރިހެން އެތުލީޓްގެ އެވޯޑް ހޯދީ އިބާދުﷲ އާދަމެވެ. ފިރިހެން ޑިވިޝަނުން އެންމެ މޮޅު ކްލަބްގެ އެވޯޑް ހޯދީ ދިވެހި ސިފައިންގެ ކްލަބެވެ. އަންހެން ޑިވިޝަނުން އެންމެ މޮޅު ކްލަބްގެ އެވޯޑް ހޯދީ ފަސޫހާގެ ކުރީގެ ކްލަބް ޓްރެކް އެންޑް ފީލްޑެވެ.