އަލިފާނުގެ ހާދިސާގައި 57 މީހަކު ހާލުގައި ޖެހިފައިވޭ: އެންޑީއެމްއޭ

ސޯސަން މަގުގައި ހުންނަ ގާމަގު ކެފޭގައި ހިނގި އަލިފާނުގެ ހާދިސާގެ ސަބަބުން 57 މީހަކު ހާލުގައި ޖެހިފައިވާ ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީ (އެންޑީއެމްއޭ) އިން މިރޭ ބުނެފި އެވެ.

އެ އިދާރާ އިން އެކްސްގައި ކުރި ޕޯސްޓެއްގައި ބުނީ ހ. ދޫހިމިރިގޭގައި ހުންނަ ގާމަގު ކެފޭގައި ހިނގި އަލިފާނުގެ ހާދިސާގެ ސަބަބުން 37 މީހަކު ހާލުގައި ޖެހިފައިވާ ކަމަށެވެ. އެއީ 37 ދިވެހިންނާއި 20 ބިދޭސީން ކަމަށް އެ އޮތޯރިޓީން ބުންޏެވެ.

"މި މީހުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގެ މަސައްކަތައް މި އޮތޯރިޓީން މިވަގުތު އަންނަނީ ކުރަމުން،" އެންޑީއެމްއޭ އިން ބުންޏެވެ.

ގާމަގު ކެފޭ ހުންނަ އިމާރާތުގައި ތިން ފްލޯ ހުރެ އެވެ. އެ އިމާރާތުގެ މަތީ ދެ ފްލޯ ހަދާފައި ވަނީ ޑެގު އަޅައި، ވަށައިގެން ޓިނު ޖަހައިގެންނެވެ.

އެނގިފައިވާ ގޮތުގައި، އެ ކެފޭގެ މަތީ ދެ ފްލޯ ބޭނުންކުރަނީ ބިދޭސީންގެ އެކޮމޮޑޭޝަން ބްލޮކެއްގެ ގޮތުގަ އެވެ. އެ ތަނުގައި 50 އަށް ވުރެ ގިނަ ބިދޭސީން ދިރިއުޅޭ ކަމަށް ވެސް ވެ އެވެ. ބިދޭސީން ހިންގާ އެ ކެފޭއާ އެކު، އިމާރާތް ވަނީ ބޭނުންނުކުރެވޭ ވަރަށް އަނދައި ހުލިވެފަ އެވެ.

އެ ކެފޭއާ ޖެހިގެން ހުރި، ދިވެހިން ދިރިއުޅޭ ގެއަކަށް ވެސް އަލިފާނުގެ އަސަރުކޮށްފައިވެ އެވެ.

އަލިފާން ރޯވީ ކެފޭގެ ބަދިގޭގަ އެވެ. މިއަދު މެންދުރު ފަހު 3:30 ހާއިރު ރޯވި އެ އަލިފާންގަނޑު އެމްއެންޑީއެފްގެ ފަޔާ އެންޑް ރެސްކިއު އިން ނިއްވާލީ ގަޑިއިރެއް ހާއިރުވި ފަހުންނެވެ.

މި ހާދިސާގައި އެއްވެސް މީހަކަށް މާ ބޮޑު އަނިޔާއެއް ނުވި ނަމަވެސް، ދުމުގެ އަސަރުކޮށްގެން ބިދޭސީ ދެ މީހަކު ހޮސްޕިޓަލަށް ގެންގޮސްފައިވާ ކަމަށް ފުލުހުން ކުރިން ބުންޏެވެ.